أقود احساس عشتوا ملي بديت الميدسين ماشي هو بنادم كيموت قدامك و لا مرا كتولد و لا نتا كتغيانيمي فالأم و فنفس الوقت كتسمع دعاء ولدها من الشرجم ! أقود احساس هو لي كنعيشوا دابا في الانعاش ديال كورونا #Thread
اصعب حاجة هي قرار تدير التنفس الاصطناعي لمريض كوفيد ! حيت عارف انه اشبه بحكم الإعدام. فاش كتعرف انه اغلب لي كيوصل لمرحلة التنفس الاصطناعي راه غادي يودع في 99% من الحالات.
ما كا نقدرش نقاوم فكرة اننا قدام محكوم بالإعدام و حنا لي غادي نفدو الحكم !!! المشكل ان المريض ما عارفش... الخير لي كتدير ليه كتقوليه قرا القرآن و شهد و نتا عارف انه هادشي اخر حاجة غادي يدير.
ما عرفتش كيفاش نشرحها و لكن راه واحد اللقطة غريبة و احساس اغرب ! مراحل العملية كتجيني بحال التحضير لحبل المشنقة... ما كنزيدش فيه، هادشي لي كنحس بيه فكل مرة بكل أمانة ! الله يرفع هاد الوباء و يحفظ لكل واحد فينا الناس لعزاز عليه 🙏🏼
شي مرات كنقول خاص ندخل العائلة يدويو معا المريض آخر مرة و يتوادعوا ! و كنفكر راه كورونا هادي يهديك الله.
هاد الأفكار كاملة كتدوز في جزء من الثانية ! و جزء من الثانية كنتصور الحياة لي عاشها المريض و الناس لي قراب ليه و واش هادي هي النهاية لي كيستحق !؟!
هادشي كامل و انا كنعمر البرا ديال البنج لي هي بمثابة رصاصة الرحمة... "رتاحي آ الحاجة... رتاحي !" و كتقول في خاطرك إنا لله و انا اليه راجعون.