⁃الثريد ادناه شخصي وطويل ربما ،لكن عاوز اقول حبة حاجات شخصية انا شايف انها مفترض تتقال قبل المليونية ،لو عندك زمن ورغبة انك تقرا اقيف -
#هبباي6أبريل
#مليونية6أبريل
#الردة_مستحيلة
#وحدة_قوى_الثورة
صباح الخير ،كعادة كل موكب مهيب اجد صعوبة في النوم واظلُ قلقا حتى انطلاق الموكب في ميقات الثورة المعلوم ،وكما كنت في السادِس من إبريل ٢٠١٩م هاهو الزمان يدور ليجدني بعد أعوامٍ ثلاث مازلت مع أبناء شعبي اقاتل لم يلِّن عزمي ولم اقف عن السير في درب الحرية …
+
الثورة حدث شخصي،شخصي بشكل معقد واساسي،رغم كل الاسباب الموضوعية التي تجعل الانسان يثور ضد الظلمُ والظلام ،إلا أن الامر دا لا قيمة له بدون السبب الذاتي والشخصي جدا ،السبب اللي بخلي دفع الثمن يصل لتقديم الحياة من اجله الامور التي تجعلك تمضي للامام دون خوف او رجوع أو أن تلتبس خطاك+
الطريق إلى حيث يجب ان تصل.
شخصيا ، زمان في الجولة الاولى من معركة الحرية كان سببي الشخصي ومازال هو اني عاوز اكون في البلد دي لحد الموت ،ماعاوز اهرب لانو مافي تقييم ليك هنا ،او لانو مامن حقك تحلم فيهو لانو الحلم هنا في ظل النظام البائس دا تمنو حياتك،+
ماعاوز اعيش في اي حتة مواطن درجة ١٠٠٠ عاوز اعيش في بلدي دا مواطن كامل الحقوق والواجبات سعيد وراضي وآمن ،ويومي الاجد انسانة طيبة القلب واحبها ،اكون قادر اعرسا وما اخاف على مستقبل اطفالي في وطني اكون مستريح تجاه الغد راضي تجاه اليوم واكيد فخور بالعملتو بالامس.
+
احلامي الشخصية كتيرة ،وصغيرة شديد ومهمة بالنسبة لي رغم بساطتا خالص ،انا جيت السودان في٢٠١٤م عشان اعوض الفاتني من حياة ومن لحظة جيت ما اتوقفت في لحظة من اني اقاتل نظام البؤس الساقط في اي حتة لانو كان بحرمني وبحرم كل سوداني انو يعيش حياتو كريم ،حر، سالم.
+
وحسي ياهو ،مرينا في مسيرة الثورة دي وتجربة الانتقال والنضال ضد الانقلاب بحاجات كتيرة تقلبت اهواء الناس يُمنَة ويُسرة، اخطأنا واصبنا لكن الثابت انو نحنا جميعا كُنا مُخلصين للاحلام بتاعتنا ،الاخلاص دا ياهو الدفعنا لمواجهة الرصاص لمصافحة الموت والاستشهاد لو دعى الامر ،كان في دائما+
بينا اشخاص استعدوا انهم يتخلو عن حياتم واحلامم من أجل انو غيرم يقدر يصل بزورق الحلم شاطئ الممكن.
كبيرة هي تضحيات الامة دي ،وعظيمة هي احلام الجيل الباسل ،وكما يتشكل المحيط من عدد لا نهائي من القطرات تشكل أحلام الامة في العدالة والحرية والسلام من عدد لا نهائي من الاحلام الذاتية+
الصغيرة ،اندفعنا جميعا نحو المصب جادين في نضالنا من اجل ما آمنت به الامة.
باسم السادس المنصور من إبريل؛
باسم الشعب والامة ؛
انا احد الملايين الليلة،مارق شان الاحلام الصغيرة ،شان بكرة،ومستعد وبكل سعادة وفخر اتنازل عن الاحلام دي وعن الحياة دي رغم انها مهمة لي جدا ،شان امنح الفرصة+
والقوة لامتي انها تنتصر وتعيش حرة ولا شيء اقل من ذلك وما بتذكر غير ابيات بشير أبسِن في ذات اليوم قبل تلاتة سنين :
"…
ها هو النيلُ الوقور
يقطعُ النومَ يثورْ
أنتِ أرضعتِ الملايينَ الثباتْ
سوف نسحـقُ مَنْ يظنّ الخلدَ
مَن يمشي على دربِ الطغاةْ
بالأيادي العارياتْ
+
سوف نحيا ما استطعنا
رافعِيْ الرأسِ عَلِـيّا
يا لَخوفَ البندقيهْ
يا لخوفَ البندقيّة
وركزنا كلما اشتدّ البُطانْ
في أمانِ اللهِ واللهُ الأمانْ
…"
+
اتمنى نرجع طيبين منصورين ،في كل الاحوال دي ما نهاية المعركة لانو الليلة حنبدا صفحة جديدة في المعركة بتاعتنا من اجل المستقبل ،معركة راس مالنا فيها وحدتنا ،وتمسكنا باحلامنا ،ورغبتنا في الوصول للنور ،للصباح،للحرية…
قدام يا رفاقي ورفيقاتي
Share this Scrolly Tale with your friends.
A Scrolly Tale is a new way to read Twitter threads with a more visually immersive experience.
Discover more beautiful Scrolly Tales like this.