Thread by @Ranadurga22

1945 ഒക്ടോബർ 29-ന് ന്യൂയോർക്കിലെ സ്ട്രീറ്റ് 32-ലെ 'ഗിംബെൽസ് ഡിപ്പാർട്ട്മെന്റ് സ്റ്റോറിനു മുന്നിൽ ഒരു വലിയ ബഹളം ഉണ്ടായി. അമ്പതോളം പോലീസുകാർ ശ്രമിച്ചിട്ടും ജനക്കൂട്ടം പിരിഞ്ഞുപോയില്ല. ഒരു പുതിയ പേന വാങ്ങാൻ വന്നവരായിരുന്നു അവർ. പേന 30,000 അന്ന് വിറ്റുപോയി. ~1

കിട്ടാത്തവർ അടിനടത്തി. അതായിരുന്നു പ്രശ്നം.ഒരിക്കൽ വാങ്ങിയാൽ, ഒരു പേന മഷി നിറയ്ക്കാതെ 15 വർഷം എഴുതാം. അതായിരുന്നു പരസ്യം. അതിനുമുമ്പ് ആരും അത്തരമൊരു പേന കണ്ടിട്ടില്ല, എഴുതി നോക്കിയിട്ടില്ല, അതുകൊണ്ട് തിരക്കുണ്ടാക്കിയവരെ പോലീസിനുപോലും ഒന്നും പറയാൻ പറ്റിയില്ല.~2

ഫ്ളാഷ് ബാക്ക്:
1920-കളുടെ അവസാനത്തിലെ ഒരു രാത്രിയിൽ, ഹംഗറിയിലെ ഒരു പത്രമോഫീസിൽ ജേർണലിസ്റ്റ് ആയിരുന്ന ലാസ്ലോ ജോസഫ് ബിറൊ(Lazlo Jozsef Biro) ദേഷ്യം വന്ന് നിലത്തു ചവിട്ടി. പേനയിൽ മഷി തീർന്നിരിക്കുന്നു. മഷിക്കുപ്പിയും കാലി. ~3

അതേസമയം പ്രസിൽ മഷിയുണ്ട്. പാട്ട കണക്കിനുണ്ട്. വിലയും കുറവാണ്. നേരേ പോയി അതിൽ നിന്നും കുറച്ചെടുത്ത് പേനയിൽ നിറച്ചു. എഴുതിനോക്കി. പേന പോയിക്കിട്ടി!~4

പക്ഷേ വിട്ടില്ല. അനുജനോട് പറഞ്ഞു. അവൻ കെമിസ്റ്റാണ്. പേര് ജോർജി (Gyorgy). അവൻ പറഞ്ഞു, അച്ചടിയന്ത്രം പ്രവർത്തിക്കുന്നല്ലോ, എങ്കിൽ ഈ മഷികൊണ്ട് പേനയും പ്രവർത്തിക്കും. 50-വർഷംമുമ്പ് ജോൺ ജെ. ലൗഡ് (John J. Loud) അങ്ങനെയേതാണ്ട് ഉണ്ടാക്കിയിട്ടുണ്ട്. ~5

ഞാനൊന്നു നോക്കട്ടെ: ഒരു ബോൾ. ബെയറിങുപോലെ അതൊരു സോക്കറ്റിൽ കറങ്ങും. അതിന്റെ മുകളിലൂടെ മഷി പറ്റിപ്പിടിച്ചു കൊടുക്കണം. താഴെ പേപ്പർ വെച്ചുകൊടുക്കണം. ബോൾ ഉരുണ്ടാൽ പേപ്പറിൽ മഷി പറ്റും! 1931-ൽ ബുഡാപെസ്റ്റിലെ ഇന്റർനാഷണൽ ഫെയറിൽ ആ പേന പ്രദർശിപ്പിച്ചു.~6

അതിനിടെ രണ്ടാം ലോകമഹായുദ്ധം വന്നു. ബിറോയും അനുജനും നാസികളെ പേടിച്ച് അർജന്റീനയിലേക്ക് പാലായനം ചെയ്തു. അവിടെ പേന വിറ്റു: 'ബിറോ പെൻ' (Biro Pen). ലോകത്തിലെ ആദ്യത്തെ ബോൾപോയിന്റ് പെൻ.~7

1945-ജൂണിൽ ചിക്കാഗോയിൽ നിന്നുള്ള ഒരു ബിസിനസ്സുകാരൻ അർജന്റീനയിലെ ബ്രൂണസ്അരീസിലെത്തി. 'ബിറോ പേന' കണ്ടു. ഒരെണ്ണം വാങ്ങി. തിരികെ നാട്ടിലെത്തിയശേഷം അത് 'റിവേഴ്സ് എന്ജിനീയറിംഗി'നു വിധേയമാക്കി ഒരു പേന നിർമ്മിച്ചു. ഒരു പരിചയക്കാരന്റെ കടയിൽ കൊടുത്തു. ~8

അയാൾ വലിയ പരസ്യം കൊടുത്ത് അത് വിറ്റു: 1945 ഒക്ടോബർ 29-ന്. അന്നുണ്ടായ ബഹളമാണ് നാം നേരത്തേ കണ്ടത്. വെറുമൊരു തുടക്കക്കാരൻ- എന്റർപ്രണർ ആയിരുന്ന ചെറുപ്പക്കാരൻ പെട്ടെന്ന് വലിയ ധനികനായി. അയാളുടെ പേര് ആർക്കും അറിയില്ലായിരുന്നു, അപ്പോഴും, ~9

അവർ വാങ്ങിയ പേനയിൽ അത് എഴുതിയിട്ടുണ്ടായിരുന്നുവെങ്കിലും- റെയ്നോൾഡ്സ് , മിൽട്ടൺ റെയ്നോൾഡ്സ് (Milton Reynolds).~10

റെയ്നോൾഡ്സ് ഉടനേ തന്നെ തന്റെ പേന പേറ്റന്റ് ചെയ്തു. ബിറോയുടെ പേനയ്ക്ക് പേറ്റന്റ് ഉണ്ടായിരുന്നു. എന്നാൽ, റെയ്നോൾഡ്സ് അത് മറികടന്നു: തന്റെ പേനയിലെ ബോളിലേക്ക് മഷി പടരുന്നത് ഗുരുത്വാകർഷണം (Garvity) മൂലമാണെന്ന് പറഞ്ഞു. ~11

ബിറോപേനയിൽ 'കേശികത്വം' (Capillary Action) ആണെന്നും വാദിച്ചു. പേറ്റന്റ് കിട്ടി.
1948-ൽ, യൂറോപ്യൻ റെയ്നോൾഡ്സ് പുറത്തിറക്കി. ഫ്രാൻസിൽ അതിനായി ഒരു ഫാക്ടറി തുടങ്ങി. ചിക്കാഗോയിൽ മെയിൻ ഫാക്ടറിയും. ~12

പരസ്യത്തിനായി കുറച്ച് കോടി കത്തിച്ചു. ഒരു വിമാനം വാടകയ്ക്കെടുത്ത് 'Reynolds Bombshell' എന്ന് പേരിട്ടു. ലോകം മുഴുവനും ചുറ്റി. 79 മണിക്കൂറിന്റെ യാത്ര. ആയിരക്കണക്കിന് പേനകൾ ഓരോയിടത്തും വിതരണം ചെയ്തു. അങ്ങനെ അമേരിക്കയിൽ നിന്നുള്ള 'റോക്കറ്റ് പെൻ' ലോകപ്രശസ്തമായി.~13

1980-ൽ ഇന്ത്യയിലെത്തി. ഇവിടെ ജിഎം പെൻ ഇന്റർനാഷണൽ എന്ന കമ്പനി റെയ്നോൾഡ്സിന്റെ ലൈസൻസി ആയി. ഇന്ത്യൻ റെയ്നോൾഡ്സ് പുറത്തിറങ്ങി. മഷിപ്പേനയും ഹീറോയും പാർക്കറുമെല്ലാം വഴിമാറി. കാരണം വില തുച്ഛം! പഴയ ചില മലയാളം വാദ്ധ്യാർമാർ മാത്രം~14

"കൈയ്യക്ഷരം.. കൈയ്യക്ഷരം.." എന്ന് വിലപിച്ചുകൊണ്ടിരുന്നത് ആരും കേട്ടില്ല.
റെയ്നോൾഡ്സ് പക്ഷേ യൂറോപ്പിലും അമേരിക്കയിലും പൊളിഞ്ഞു. ഫ്രാൻസിലെ കമ്പനി പൂട്ടിയത് വലിയ തൊഴിൽപ്രശ്നത്തിനിടയാക്കി. മിൽട്ടൺ റെയ്നോൾഡ്സ് പക്ഷേ നേരത്തെ മരിച്ചിരുന്നു, ധനികനായിത്തന്നെ, 1978-ൽ, മെക്സിക്കോയിൽ.~15

2016 മേയിൽ റെയ്നോൾഡ്സ് പേന നിർമ്മിച്ചിരുന്ന ഇന്ത്യൻ കമ്പനി അതിന്റെ ഉൽപാദനം നിറുത്തി. പകരം, അതേ മാതൃകയിൽ പുതിയൊരു പേന പുറത്തിറക്കി: Rorito.~16

റെയ്നോൾഡ്സ് പേന പക്ഷേ രാജ്യാന്തരവിപണിയിൽ ഇപ്പോഴുമുണ്ട്: പാർക്കർ പേനയെയും മറ്റുള്ളവയേയും വിഴുങ്ങിയ ഭീമൻ: Newel ആണ് അത് നിർമ്മിക്കുന്നതെന്നു മാത്രം!~17/17

കടപ്പാട്🙏🙏