Thread by @Lavvelenata

Ve conto na storia.
Na storia brutta, na storia rabiosa, na storia che chissà quante ghe n’è pi o meno uguai nei 18.300 km2 de Veneto, na storia come tante de imprese e imprenditori veneti, na storia de fameje.
Na storia a metà tra passato e futuro.

Na storia da penoti da na parte e che altra de rabbia.
Na storia de cattiveria. De Bestie fisiche e de Bestie morai.
Una de chee storie che te fa amar e odiar el Veneto.
I veneti.
A so classe imprenditoriae. O quel che pensa de essar e essar sta a classe imprenditoriale

Che te fa odiar el DNA de lavorar par vivar. Sta smania de skei, de grandessa morae soea base dei conti correnti. Ma che aeo stesso tempo teo fa amare in maniera incondisionata par chel senso de no arrenderse mai, de essar sempre un spin e de far sempre qualcossa. Sempre.

Allora, sto giro ghemo 4 omani. Ansi 3 omani e un omenetto.
I ga tutti el stesso cognome e bona parte del DNA. Ghe xe Paolo, Antonio e Luca che insieme no i fa 80 anni. E ghe xe el Sior Giovanni che da sol ne fa oltre 80.
I primi 3 xe do fradei, el terzo un cugin.

El l Sior xe el vecio, el paron. E el Sior Giovanni xe proprio el vero Paron veneto.
Uno de quei che gà fato a storia del Veneto. Uno che podaria essar Cavaliere del Lavoro. Uno che gà fatto un patto col diavoeo par essar pi cattivo de lui.

Uno che gà lavorà, dato lavoro, fato poche fature, e costruio un mezo impero.
Uno de quei che el titoeo de Imprenditore se o gà conquistà sol campo. Giorno dopo giorno. Istà dopo istà. E che pa chel titoeo gà sacrificà MORAE e SENTIMENTI.

Dal so capanon nee giornate limpide davanti te vedi Cima Grappa. E dadrio casa sua. A classica casetta veneta col giardin confinante col capanon.
Ma lu gà sempre vissuo dentro el capanon, capanon come prima casa. Nea carta de identità residenza = capanon

Incontro Paolo e Antonio qualche anno fa in un bar de Bassan, quando podevo ancor ndarghe. Ma questa xe n’altra storia. Amissi de amissi. Birrete, ciacoe, e dopo da BRAVI VENETI CHE TE SI QUEL CHE TE FE scatta a classica domanda …

- Ciò Bionda ma ti cossa fai nea vita?
- Eh, gnente de che. Go a che fare co imprese, imprenditori che capisse poco, che vol capir quel che ghe comoda, che fa el contrario de quel che ghe suggerisso de far, gnente de che. Provo a farghe vendar qualcossa for de l’Italia.

- Te piase ?
- Eh si casso, se no me piasesse no riussiria farlo dio caro. Xe una dee robe che te fa sol pa PASSION e spesso pa compassion ma son mi cojona. Chealtri che fa el me stesso lavoro fa i skei, mi imparo a amar o a odiar el Veneto.

Birre e ciacoe. Del pi e del manco.
- E voialtri do ?
- eh ... noialtri ghemo na fabbrica ... na cartiera ... xe nostra ... ma ghemo tanti problemi ...

- Te savessi mi …. dei vanti dime, ma spetta che i me porte n'altra biretta.
- Alora … el nostro problema XE NOSTRO PARE. E xe un gran problema.

Antonio, el pi cel taca contarme a storia.
Alora noialtri ghemo na picoea cartiera. Xe nostra seto. Sea ghemo comprà. Ghemo un mutuo soe spae pal resto dei nostri giorni. Anca e mudande ghemo messo in pegno dio bello. Fasemo carta. Bea carta.

Bea carta. Ghe scrive su e lettare ufficiai a Regina de Inghilterra.
Ghemo do tre macchinari e ghe fornimo carta a (nomi vari dee varie cartiere venete). Lavoremo tanto. Ghemo 5 dipendenti. I ce conosse tutti perché fasemo e robe fate par ben. Semo bravi far e robe.

Mi: beo ciò, no gò mai avuo a che far co carta. Cossa vorissi far?
A: e ciò noialtri vorissimo cressar, provar a ndar vendar for de l’Italia ma ghemo do problemi: uno che magari o risolvemo xe che desso no ghemo skei e el secondo xe el vecio paron dea azienda che xe nostro pare.

Mi: no cioè scusa go mia capio … gavì fato un mutuo pa comprarve l’azienda de vostro pare ?
A-P: Si. Quando ebeti semo vero ? Vanti ridi Bionda, ridi.
Mi: No, no, spiegheme benche sta roba me interessa.

A-P: Alora me pare gavea sta cartiera. Finio e scoe semo ndai lavorar la tutti e do e anca nostro cugin Luca. In produsion. Ore e straore. Sabi e domeneghe. Mai stufi. Semo cressui tanto. In mezo a carte e besteme. Tante besteme.

Nostro pare ce gà sempre trattà come el pezo dei so dipendenti. Battaglie e besteme. Tante besteme.

P: Si, ma ce gà sempre pagà e ce gà insegnà el lavoro. Ma lavorà tanto Fede. Come mussi.
A: Dopo succede na brutta roba e da qua taca el disastro.
Mi: N’altra birra?
A-P: Vanti.

A: Allora a gennaio i ricovera me pare che se gà sentio mal in capanon. I ghe fa tutti i esami, i seo tien al San Bassian pa quasi do settimane.

P: Co ndavimo trovarlo unica roba che ce domandava iera se gaveimo mandà via a roba de tissio, caio e sempronio. Se iera rivà e bobine de foj da tajar, se gaveimo ribobinà chel rodeo pa tissio, ecc.

A: dopo 2 setimane ce ciama el dotor. Pa fartea breve el ce dise fora dei denti che nostro pare gà a Bestia e che bisogna operarlo ma che a xe bea vanti e che no i garantisse gnente. Primo posto che se libera i o mete sotto. Ma no se sa mia sel vien fora.

Mi: oh casso, me despiase. Scusè ma mi in sto caso (come in tanti altri dir el vero) no so cossa dir.

P: Ghe domandemo al dotor se i gheo gà za dito e ce risponde de no se voeimo dirgheo noialtri direttamente se no gheo disea lori.
A: O portemo casa. Ierimo poco fora Bassan chel me dise de fermarme al soito bar.

Se fermemo. Se sentemo fora. El ordina 3 prosecchi. El ce varda in faccia.
Nostro pare no ce gà mai vardà in faccia. MAI. Sempre testa bassa.

Sior Giovanni: Alora, mi so che a go indosso a Bestia. I gò sentii coi parlava, so mia stupido. E capisso e robe.
A-P: ma papà ….
Sior Giovanni: asseè perdar. doman ciamo el notaio e el comerciaista e saremo a fabrica.
A-P: ma papà …

A-P: ma papà …
Sior Giovanni: gò da morir e alora mejo che saremo. Si zovani un posto o trovè.
A-P : ma papà …
Sior Giovanni: a gò creà mi. a gò fatta cressar mi. a fasso morir mi. A GA’ EL ME COGNOME.

Passa qualche giorno. Tutti in siensio. El riva de qua in capanon e ce dise chel gà fissà appuntamento.
A-P: ma papà …
Sior Giovanni: cossita gò deciso.
Ndemo dal commerciaista. Ghe spiega a storia. E a so voentà de sarar tutto.

El commerciaista: ma Sior Giovanni … invece di chiuderla visto anche che le cose vanno bene potrebbe lasciarla ai figli che la portino avanti …
Sior Giovanni: ah bhè SE I VOL I SEA COMPRA, mi ghea vendo.

Mi: COSSSSA?
A-P: Si, nostro pare ce gà dito che se voeimo ndar vanti ce doveimo comprar a fabrica, capanon, macchinari, dIpendenti, e tutto.
Mi: e voialtri:
A-P: Ghe ghemo pensà tanto. Tira in baeo anca me cugina Luca che xa laorava co noialtri. Ea fine sea ghemo comprà.

Mi: e dove gravi trova i skei ???
A-P: Fato el giro dee cesete dee banche venete, passae tutte. Sol a Popoeare de Vicensa ce gà scoltà e no gà sol vardà e carte. Ghemo fato numeri da circo ma i ce gà dà na man e semo riussii trovar i skei e se a semo comprai.

P: Fede el giorno ghe ghemo firmà acquisto ierimo euforici. Contenti dio bello. Ndaimo vanti. Desso l’azienda iera nostra e podeimo far tutto quel che voeimo.
A: E saveimo che ierimo drio zogarce tutto el futuro e che pa anni gaveimo debiti con la banca. Ma ierimo massa contenti.

Mi: e vostro pare?
A-P: fredo come un toco de giaso, come che a roba no lo riguardasse. Na Bestia. No se semo pi parlai a toea pa do settimane. Lo portava me mama far e visite, se domandavimo come chel stava a risposta iera sempre tutto ben.

A: Riva el giorno dell’intervento. Al San Bortoeo a Vicensa. Me mama ceo gà dito el giorno prima.
Aea sera semo ndati trovarlo mal dormia.
P: E chealtri giorni nol gà voesto parlarce …

Sior Giovanni vien operà. Fa tutta a via crucis de chemio, radio, esami pa veder marcatori se va su o zo, chemio, altra radio, visite, ecc. e dio caro el Sior Giovanni sconfigge a Bestia. Dio santo questo te dovei torte no altri. Ma Ti te gà altri progetti rispetto a noialtri.

Mi credo che a ciclofosfamide gà el poter de alterar a cattiveria e se da na parte sconfigge a Bestia da chealtra te fa deventar Bestia. (parlo pa esperiensa ancor sto giro).
Perché na volta guario el Sior Giovanni convoca so fioi e ghe dise che da luni torna lavorar in azienda.

Ansi torna a guidar l’azienda. PERCHE' L'AZIENDA XE SUA. GA' EL SO COGNOME E LA GA' CREA' LUI.
Disastro.

A-P e Luca ghe dise de no. Iori gà impostà l’azienda so na maniera pi giovane, pi corretta, pi funzionante, pi bea casso. No i o voe pi tra i pie. I gà dovuo trovarse un appartamento e ndar vivar pa conto suo perché no i o sopportava pi casa.

Figurate se dopo tutto i o fa tornar. Mal Sior Giovanni xe rassa imprenditor veneto vecio. De quei che gà fato a storia. De qui che no moea. De qui che gà sempre rason. De quei che l’azienda gà el so cognome. De quei che QUA XE MIO.
E allora taca vegner fora a BESTIA.

A: El ndava in azienda de notte… ghemo cambià 4 volte e serrature del capanon.
P: El rovistava tra e carte, el ciamava in banca pa saver se gaveimo skei, ce ne gà combinà de ogni coi clienti che ciamava lui direttamente.

A: El ce manometteva e machine chea matina perdivimo do ore a risistemarle
P: Ghemo messo su alarme in capanon e el xe riussio tajar i fii e entrar de novo. Na note risciava de ciapar fogo el capanon …
A: Ghemo i filmati dee teecamere … voeimo ndarlo denunciar ma ….

Mi: ma ?
A-P … Xe nostro pare dio caro.
Mi: e dopo ?

A-P: E dopo ogni tanto Dio varda xo e seo gà tolto. E noialtri ndemo vanti a pagar debiti. Tra carta e besteme. Tra barufe e besteme. Sensa un skeo in scarsea. Ma co n’azienda nostra ciò. Dove che dentro ghe xe el fantasma de nostro pare.

Fine settembre de qualche anno fà Quel Alto se gà tolto el Sior Giovanni.
Uno dei veneti imprenditori veci che sa tutti iori, che fa tutto iori, che sassina tutto iori.
Uno de quei che gnanca a Bestia riesse far fora.

Mi col Sior Giovanni ghe son ndata ber insieme. Perché meo gà domandà Paolo Antonio e Luca che voeva un fià mitigare el cliema. Gò a so version dei fatti che canta più o meno cossita:

MI GO FATO IMPRESA, MI GO DATO LAVORO, MI GO FATO CRESSER ME FIOI, GHE GO INSEGNA’ UN LAVORO, MI EL MIO O GO FATO, MI QUA, MI LA E dopo signorina i me gà trovà na bestia e a che GO ASSA’ L’AZIENDA A ME FIOI che no i riesse mia portarla vanti.

No i xe mia boni far impresa.
I FIOI ZOVANI NO SA UN CASSO.

Mi meo ricordo el Sior Giovanni. E son ndata anca al so funerae. E dopo che gò savesto sta brutta storia veneta ...

E ogni sera co poso a testa sol cussin vardo a Quel Alto e no posso no pensar .. signor totei tutti sti imprenditori veneti veci che gà fato a storia de l’imprenditoria veneta e assaghe posto ai fioi zovani.....

Ma xe un pensiero che dura poco perché dopo penso aea Valle dea concia e digo … signor assa qua i veci el pi possibile che i so fioi zovani no farà mai a storia de l’imprenditoria veneta … e allora gnanca Quel Alto me scolta. Giustamente. Nol sa quel che vojo.

Perché ve go contà sta storia ? Perché in settimana se gà presentà in azienda un consulente de quei fighi mianesi che sol veneto no centra un casso, a parlar de PASSAGGIO GENERAZIONALE come sel fosse el primo problema dee nostre aziende. E mi gò sol pensà al Sior Giovanni.

Gò pensà che CHI CREA SA ANCA DISTRUGGERE. E forse xe giusto cossita. Ciao Sior Giovanni, VECIA SCUOLA VENETA che gà sacrificà a vita PA LAVORAR. End.