Thread by @hashadnan

عن #وضاح_الصادق الشبيح، اليميني المحافظ والانتهازي.
شاركت باجتماعين من اجتماعات تشكيل اللائحة الموحّدة المشؤومة ببيروت بالانتخابات الماضية.
كنت عم بحضر، الى جانب غير رفاق، عن حملة #بيروت_تقاوم.

كانت النقطة يلّي عم يتم التباحث فيها متعلقة بترشيح رولا العجوز. رولا ناشطة عتيقة بتيار المستقبل متلها متل وضّاح الصادق.
طبعاً ابدينا اعتراض شديد على ترشيحها.
فا بقوم احد ممثلي بيروت مدينتي بقلّي: ليش راضين بوضاح الصادق ورافضين رولا العجوز، ما هنّي نفس الشي.

فا وضّحت موقف الحملة المتمسّك بتشكيل لايحة موحّدة (وهو عكس قناعتي الشخصية بوقتها) وقلت ما معناه: مش اذا متقبلين ع مضض طرح اسم وضّاح، نتيجة تمسّك الأكترية فيه ويلّي منختلف معه حول الرؤية المالية والاقتصادية والمشروع السياسي، يعني رح نقبل ب رولا العجوز...

هون بينتفض وضّاح وببلّش يصرّخ ويعيّط ويحكي كلام من نوع: انت واحد شيوعي (هاهاها)، معادي للاقتصاد الحر وانتو ناس ما عندكن شي تعملوه بالحياة غير تزايدوا ع العالم وما بسمحلك تجيب سيرة اسمي ع لسانك وانا خط احمر واثبتنا بالانتفاضة انو ما حدا في يتجالهلنا

واذا بعد مرة بتقول اسمي رح تشوف شي ما يعجبك… الخ من خطاب عصبي فوقي بقالب ذكوري سام… طبعاً مع شرايين باقّين لبرّا واصبع مرفوع وتهديد ووعيد… لحديت ما انتبه انو ما عم رد عليه ولا عم عبّر العرض الأدائي الهابط يلّي عم يقدّمه، فا حمل حاله وطلع ع البلكون وما رجع لبعد شي نص ساعة…

من هيديك اللحظة عرفت انو وضّاح رح يخرق وانو عامل حساباته كتير منيح. بين المال السياسي تبعه وتبع المنصات وبين دعم جزء من تيار المستقبل لإله وبين شهرته كاعلامي رياضي سابق، حاسبها منيح ورح يخرق.

خبرت شو صار معي بالاجتماع العام لحملة #بيروت_تقاوم وفسّرت نظريتي عن الخرق المؤكد لوضاح بحال اللائحة جابت حواصل. مع الاسف كان في تجاهل شبه تام للقصة، لا بل تعمّد احد الرفاق يلّي حضر معي مسرحية وضّاح الذكورية السامة انو يقلل من اهمية الحادثة ويسخّفها ويأكّد انو لاء وضّاح ما هددني.

لا طلعلي تضامن من الرفاق والرفيقات بوجه تشبيح وضاح ولا سمع حول فرضية خطر خرقه.
قلال كتير يلّي سمعوا شو عم قول وغالبيتهن الساحقة كانوا من تنظيم #لحقي، يلّي انا عضو فيه، وحاسمين خياراتهن مسبقاً من هيدا الموضوع.

كان موقف كتير بشع وبعدها لهلق حازة بقلبي هيدي الليلة يلّي صوّتت فيها الهيئة العامة لحملة بيروت تقاوم مع اللائحة الموحدة المتضمنة وضّاح وغيره من النماذج الكارثية.
عم خبّر هيدا الشي اليوم لأنو عايز طلّعه من جواتي واتعلّم منه وارفض اي ايطار تنظيمي ما عندو وضوح فكري وسياسي ومنهجي

ولأنو التيار الانتهازي الوصولي غلبنا بمعركة تشكيل اللوائح وبكل معركة الانتخابات ولأنو مجموعات "تغييرية" قريبة متل #شبكة_مدى و #عامية_١٧_تشرين و #المرصد_الشعبي_لمحاربة_الفساد و #حزب_لنا طبعاً الى جانب #ملحم_خلف و #حزب_سبعة و #المظلة_البيروتية، ساهموا بهيدا الشي وخسّرونا فرصة

انو نوصّل ع المجلس اكبر عدد ممكن من النواب الجذريين المنحازين للناس والقادرين يخوضوا معركة العدالة الاجتماعية والاقتصادية وكسر السياسات النيوليبرالية للنظام المجرم والناهب بلبنان.
من غير نواحي أكيد لحقي خبّصت كتير بسياق الانتخابات بس مش بقصة وضاح.
هاي حكايتي حكيتا…

تحية لكل نائبة ونائب رح يوقفوا بوج وضّاح والمشروع المعادي للناس يلّي بمثّله وبوج تشبيحه وفوقيته ويحطوله حد بأسرع وقت ممكن ويبعتوه لمطرح ما لازم يكون، يعني عند الكتائب و/او المستقبل و/او القوات.