Thread by @Monashry

التجارة بدم الشهيد متفرقش بالمرة عن التجارة بالدين والإله والنبي .. الشهيد مات في سبيل حرية وطن وشعب .. دمه اتسال عشان الناس حياتها تكون أحسن

مش عشان تتذل بيه ولا عشان تتمارس عليها أقسى أنواع الإبتزاز العاطفي والوجداني .. اللي بيتاجر بدم شهداء لا يعرف يعني إيه شهيد ولا يعني إيه وطن ..

تجارب الحكم لا تقاس بالانتصارات والحروب فقط .. تجارب الحكم تقاس بأثرها على الحياة اليومية للفرد المنفرد المتفرد .. والإنسان أي إنسان في أي مكان أول حاجة تهمه هي حياته وإحتياجاته وحرياته .. قبل ما يفكر ينتمي لوطن أو حتى لنادي بيفكر في الغذاء والكساء والسقف اللي بيأويه ..

اللي عايز يفهم أكتر بقول إيه يدور على أبراهام موسلو وهرمه الشهير لترتيب الإحتياجات البشرية .. Maslow's hierarchy of needs

عشان تكون لك تجربة حكم لازم تكون لك فلسفة .. فلسفة مبنية على تجربة شخصية وخلفية معرفية وفهم للسياسة والإقتصاد وللتاريخ حتى ولو في العموم .. الحكومات موجودة لإدارة الموارد وضمان تنفيذ القوانين وحماية حريات الناس وأرواحهم وممتلكاتهم ..

لما تنسى ده أو تكون متعرفوش وفلسفتك في الحكم هي إنك بتملك الأرض ومن عليها وأي فشل ليك مُصر تعوضه من محفظة المواطن ومُصر تكرر تجارب فاشلة وتتوقع نتايج مختلفة

وفوق ده كله كمان بتبتز ضماير الناس يبأة لازم تقبل إن التاريخ هيحط تجربتك دي في مكان مش هيعجبك بالمرة .. وأنا لا أفتش في الضمائر ولكن الطريق إلى جهنم مفروش بالنوايا الحسنة عادة ..

مثل بسيط عن تجارب الحكم من التاريخ .. الإنجليز بيسموا عهد إليزابيث الأولى بالعهد الذهبي لحد النهارده .. عهد إليزابيث بنت آن بولين اللي فقدت راسها لأنها مخلفتش ولد .. مش عهد أبوها هنري التامن اللي قلب موازين السلطة في أوروبا

ولا عهد جدها هنري السابع صاحب الدهاء والمكر والإنتصارات الفخمة ولا عهد أختها ماري الدموية المقاتلة الشرسة في سبيل فرض إختياراتها الدينية عالناس .. عهد إليزابيث كان عهد استقرار ورخاء وإنتصارات ودرة تاجه كانت ويليام شكسبير ..

محدش ضد البنا والتعمير وخروج المصريين من الوادي .. بس بعد هروب مليارات الدولات من الاستثمار في مأساة 2011 قبل ما تحرق دولارات أموال ساخنة وتبني مباني في الصحرا هتاكلها الرملة لازم الأول إقتصاد قوي يسند مشاريع التنمية ..

ده لو هسميها مشاريع تنمية مجازاً مش هوصفها بحقيقتها كمشاريع غير مدروسة ولا معروف الغرض منها إيه ولا الريتيرن أون إنفيستمنت إيه ولا هتتسوق لمين ولا هتطلع عائد ولا لأ ..

ناهيك عن إطلاق يد اللواء الماركيتير واللواء الفينانسيير واللواء الإنتربنير والمرضى العقليين زي محافظ البنك المركزي السابق اللي بجرة قلم قفل البلد وجاب درفها .. ده والناس اللي بتفهم يا طفشت يا قاعدة من غير شغل ..

نيجي لبتوع الجاز والفسح اللي بيفسحوها للزعيم مهيب الركن وبعدين يضخوا مليارات في الإقتصاد التركي .. أدينا وصلنا إنهم هم اللي هيحددوا سعر الجنيه المصري ومش هياخدوا مشاريع إلا بتراب الفلوس .. المرة دي مش هرجع للقرن الستاشر ..

هم اللواءات العباقرة مفهموش بتوع الجاز من تمويل الإخوان في الخمسينات ومركز آخن اللي اتاخد فيه قرار إغتيال السادات مروراً بدقات النقص في 73 وقت ما شاه إيران بتليفون هو اللي أنقذ الورطة وبعتلنا بترول ..

للسعي لتغيير وش مصر بتمويل الأشكال اللي زي الشعراوي "سورري مش هقول صلى الله عليه وسلم" لمخلفات البشرية زي الدقون اللي دمرت اسكندرية .. لحركات النقص وقت حرب الكويت لإطلاق الكلب الأجرب المسعور اللي اسمه الجزيرة لهدم #مصر إلخ إلخ ..

معلش يعني إمتى العرب مغدروش بينا لا في التاريخ القديم ولا الحديث .. إمتى العرب دفعوا مليم مش هيرد بمنفعة على عروشهم !!

أنا لا أكره الجيش المصري برغم اللي اتعمل في عيلتي من عصابة عبد الناصر .. ولا أحمل المؤسسة الوطنية تبعات تصرفات الأفراد ولو بتكلم النهارده فلخوفي على الجيش .. لوأنة البلد وتبليعها للجيش هتختم بخل ..

أول حاجة الظباط الصغيرين هيقولك ليه أروح أموت أنا عشان الكبار يملوا كروشهم .. عسكرة الدولة مش هتأذي الدولة أد ما هتأذي الجيش وأنا الصراحة مش عايزاه يتأذي .. مش قادرة أفهم أنا إيه الإصرار على تكرار تجربة ختمت ب 67 ؟! إيه المبرر ..

في 67 الجيش المصري انتهى والسادات أسس جيش من أول وجديد .. 67 الجاية هيكون من الصعب جداً تأسيس جيش قوي بعدها .. وتجربة حكم الخونتا ختمت بنكد في كل بلد حكمتها بما فيهم مصر .. ليه الإصرار على إعادة إكتشاف النار وإختراع العجلة وكمان توقع نتايج مختلفة !!

عشوائية الفكر وخيال النبوة واللجوء لأهل الثقة من أصحاب الرتب وليس الفكر هيعملوا تجربة حكم بالتأكيد هتُذكر في التاريخ وحكم التاريخ قاسي .. بس فوق ده كله مينفعش نتذل بدم الشهيد ولا نتعاير إن الجيش عمل وظيفته في سينا وفوقهم الإنفجار السكاني كمان !!

طب هو اللوا مسئول ملف الإنفجار السكاني عمل إيه طيب في الملف ده في العشر سنين اللي فاتوا ؟! .. دور يا ابني على الملف لا يكون تاه واتلخبط مع ملفات خط الجمبري ..

مش هستغرب لو جتلي أذية من ورا كلامي ده .. إحنا على عتبة زمن إحنا بتوع الأتوبيس وجواز عتريس من فؤادة باطل .. عامة رزقي على الله وهي موتة ولا أكتر ! .. وسيحكم التاريخ لا محالة والسلام