Thread by @NasrElhadi

في التريد هذا شرح بسيط لي اصحاب المحالات و طريقة تخلي محلك ذكي و تعطيك معلومات اكثر علي زبائنك و كيف تستغل المعلومات هيا لي تحسين المدخول المادي و توفير في المصروفات

تريد طويل بس اصبر علي شوية و كمله لو متهم 👇🏼

لو عندك محل إضافة جهاز عدد زبائن مهم جدا و هو عبارة عن جهاز يركب في بوابة المحل او الباب الرئيسي لي المحل و عن طريقه يعد لك كم زبون دخل المحل بتوقيت و التاريخ
اسمه shop visitors/footfall counter
و هو عبارة عن sensor معه تحتاج لي كمبيوتر بيش يحولك المعلومات و تقدر تشوفها

لما تحصل المعلومات يطلع حاجة زي هكي فيها تفاصيل و ما تخافش من شكلها عارف اول نظرة تخليك تحس انها معقدة لكن راهو اي حد يقدر يفهمها ركز شوية و هيا ساهلة الفهم و صدقني حتكون بعدين ممتعة ليك و فيها توقيت و أيام الأسبوع و حركة و ما عليك غير انك تاخد المعلومات و تخدم بيها

معرفتك لي المعلومات هيا تقدر تعرف حركة الزبائن في محلك من ناحية التوقيت خلال اليوم
مواعيد دخولهم يعطيك فكرة لي تجهيزك او استعدادك ليهم من ناحية ان المحل يكون علي أفضل تجهيز من ناحية البضاعة تكون مرتبة في مكانها و معروضة بافضل شكل و المحل نظيف و العاملين في المحل يكون جاهز معاك

و في نفس الوقت تساعدك في معرفت اقل ساعات لي زيارة زبائنك لي محلك و تستفيد انك تعرف وقت راحتك او راحت عمالك والتركيز علي التنظيف المحل و تجهيزه و جلب بضاعة من المخزن او كل ما يخص أشياء ليس له علاقة بخدمة الزبائن

و أيضا المعلومات تفيدك علي شكل اسبوعي و تقدر تعرف أفضل أيام الأسبوع حركة في محلك و اهمها وتستفيد من ناحية أيام الزحمة يكون تركيزك علي زبائن و أيام تقل الحركة تكون حركتك لي تجهيز المحل متعك من ناحية جلب بضاعة او صيانة او غيرها

و بنسبة لي المعلومات علي شكل شهر كامل تقدر تقسم ليك الأشهر الأهم و منها تعرف أفضل أوقات لي استراد البضاعة او شرئها من السوق جملة مثلا و تعرف كيف تستغل فلوسك و كم تحتاج من مبلغ كل شهر و كيفية توفير فلوسك لي الاستعداد لي أفضل اشهر عندك في السنة و تخزنه في الوقت الصحيح من السنة

الموضوع عبارة عن اسثتمار في جهاز الاستفادة منه شبه لا محدودة و المعلومات تقدر تشكلها علي اكثر من شيء أدير منه فلوس او تحسن منه الدخل متعك في محلك الخاص بيك و لما تربطها بي مبيعاتك تقدر تعرف متوسط المدفوع من زبائنك في محلك و تجد طريق تزيدهم

يعني مثلا انت ضروري ما تكون تستغل بشكل كبير كل زبون يدخل عندك مثلا انت تبيع في بضاعة معينة لو تعرف ان زبائنك في يوم السبت أفضل يوم عندك ضروري ما بضاعتك تكون مرغوبة لي اكبر عدد فلو أفضل يوم زبائن عندك المبيوع كان اقل معنها الخلل في البضاعة غير مناسبة او سعرها او نوعها

و لو مثلا قررت تجيب بضاعة جديدة لازم تكون تفكر بشكل ان البضاعة تكون جاهزة و معروضة في أفضل يوم في الأسبوع او أفضل شهر علي مدي السنة و منها تقدر تعرف لو البضاعة ماشية صح بما انها معروضة في أفضل يوم عندك و المبيعات تزيد معنها انت قدرت تستغل عدد الناس و البضاعة مناسبة لي زبونك

الفائدة مش في هذا بس مثلا في اقل إيام حركة تقدر تنظم نفسك لي الشغل خارج المحل سواء تصفية حسابات او صيانة او جرد بضاعة و هكذا و منها تقدر تعرف أوقات شغل و راحة العاملين عندك و امتا تحتاج لهم داخل المحل او خارجه تقضي وقتك بدون ما أضيع فرصة مهمة و هيا استغلال وقت في خدمة زبون في محل

هناك فوائدة كبيرة و كثيرة و بهذا الجهاز يعطيك معلومات واضحة و بدون ما تكون طريقتك بدائية و هيا أفضل من تحساب روحك فاهم و المعلومات كلها في رأسك فهذا طريقة قديمة ولا تعتبر ناجحة بما ان المعلومة لو مكتوبة و موضحة في ارقام اسهل بكثير انك تدرسها و تفهم العاملين عندك عليها

انا كم مرة كنت نحساب روحي نعرف بروحي أفضل وقت و أيام الأسبوع لما اي شخص يسألني و نحساب عيني تقدر تقولي لو وقفت في المحل او قدامها و كل مرة كنت غلط بدأت لما نقارن الحركة بي المبيعات و تركيب الجهاز يلغي مسؤليتك من تخمين او تقدير الشيء هذا و حتكون معلومات جهازه علي بعد ضغطت زر منك

فمثلا في حركة في أيام الأسبوع و أفضلها يوم السبت بنسبة لنا لكن هناك فرق كبير بين يوم السبت الأول في الأسبوع لما الرواتب تنزل و نهايته مع ان حركة الناس قريبة لكن معظم الزبائن في اخر أسبوع في الشهر تزور المحل تشوف البضاعة و لكن اول ما الرواتب تنزل تشوف ان الزحمة تترجم لي مبيعات

فهذا لما تربط عدد الزيارات بي مبيعاتك تقدر تفرق بين زبون يزور و زبون يدفع و بعدين انت تقدر تكتشف علاش و شن السبب تلقا الموضوع ساهل كمثلا تربطها برواتب او عطلات او حرب او وضع المنطق اللي انت فيها و تقدر تحسب خسارتك في المدة كم كانت بسبب الوضع خارج المحل

طبعا مش مهم انت شن محلك او بضاعتك تقدر تكون ملابس ،جزار، مواد غذائية، صيدلية، الكترونات و مواد بناء غيرها حتا كان تبي تركبها في حوش جدك وتشوف حركة أقاربك علي مدي السنة فيها جو 😂
المهم هكي تستفيد من جهاز بسيط و ساهل لي تحويل معلومات ممكن تشكلها كيف ما تبي و تتعامل معها بذكاء اكثر

انشاء الله تكون المعلومة فيها فائدة ليك و ترجع ليك بزيادة دخل و زيادة مبيعاتك يا رب و لو اي حد يجربها يا ريت نسمع منك و من تجربتك لو استخدمت الجهاز هذا

رتيويت لو استفدت و شارك الناس المعلومة

@threadreaderapp unroll please