Thread by @Piramachari

கிராமத்தில,படிக்காத குடும்பத்தில பெறந்து, மழையை நம்பி வெவசாயம் பாக்கிற மானாவாரி விவசாயிதான் எங்கப்பா.
வருசம் முச்சூடும் வெள்ளாமை பன்னி, ஒரு மாசம் மழையில்லனா, மொத்தமும் சர்வநாசம்.பஞ்சம் பொழைக்க வெளியூர்தான் போகனும்
1/1

ஏதோ, கெடைக்கிறத வச்சு குடும்பத்த ஓட்டுவார். வீட்டுல வாரிசுக்கு ஆம்பள பிள்ள வேணும்னு எனக்கு முன்னாடி 5 அக்காவையும் , துணைக்கு ஒரு பய இருந்தா நல்லாருக்கும்னு ஒரு தங்கச்சியும் ஆய்ருச்சு.
1/2

60-70கள்ல விவசாயமும் இல்லாம, சோத்துக்கும் இல்லாம பஞ்சத்துல அடிபட்டு, திருச்சி, தஞ்சாவூர் சைடு விவசாய கூலி வேலைக்கு குடும்பத்தோட மாட்டு வண்டி கட்டிகிட்டு பஞ்சம் பொழச்சிட்டு , அடுத்த ஆடி வர்றப்ப சொந்த ஊரில் வந்து வெவசாயம் பார்ப்பாங்களாம்
1/3

அப்டியும் காலம்தள்ள முடியாம, எங்க அக்கா 2-3 பேரை மாசம் 20-30 ரூவா சம்பளத்துல நாட்டுக்கோட்டை செட்டியார் வீடுகள்ல வீட்டு வேலைக்கு அனுப்பிட்டாங்களாம். சம்பளம் கம்மியா இருந்தாலும் சாப்பாட்டு செலவு மிச்சம்னு.
அப்பிடி போனவங்க, அவங்க கல்யாணத்தப்ப தான் வீடு திரும்ப முடிஞ்சது சோகம்
1/4

கால ஓட்டத்துல...படிப்புதான் பிள்ளைகளை காப்பாத்தும்னு என்னைய ,எனக்கு நேர் மூத்த அக்கா , என் தங்கச்சிய மட்டும் கவர்ன்மென்ட் ஸ்கூல்ல சேத்துவிட்டாரு.
அதுக்காக..எங்களை யாரையும் சோத்துக்கு அழைய விடல. ஏதாச்சும் ஒரு வேலைனு போயி அரை வயிறாச்சும் கஞ்சி ஊத்திருவாரு.
1/6

விவசாயம், மரம் வெட்ட போறது, சமையல் வேலைனு,பார்க்காத வேலையில்ல. கஷ்டம் வர்றப்பல்லாம் எங்கள்ட்ட சொல்லுவாரு. படிப்புதான்டா உங்களை கரையேத்தும் , நல்லா படிங்க. படிக்காம ங்கொப்பன் எவ்வளவு கஷ்டபடுறேனு பாத்தீகள்லனு.1/7

நாங்களும் நல்லாத்தான் படிச்சோம் . 8-9 வரைக்கும் கிளாஸ் பர்ஸ்ட் வந்திருவேன். 10th ல 1-2 nd rank வாங்கிருவேன்.

எங்கூர்லயே ஒரு ,VAO, ,வெளியூர் மாட்டு டாக்டரோட பையனும் என் கிளாஸ்லயே படிச்சாங்க. அவங்கள விட நா நல்லா படிக்கிறேன்றதில எங்கப்பாவுக்கு பெருமை.1/8

நகரத்தார்னு சொல்ற செட்டியார் வீடுகளுக்கு 70-80கள்ல கூட்டு வண்டி ஓட்டுவார். கோயில் விசேசம்னா எங்கப்பாவத்தான் கூப்டுவாங்களாம்.
விசேசம் முடிஞ்சா, தேங்கா பழம்,வாளின்னு கொடுத்து கையோட கூலியும் குடுத்திருவாங்க. அதுல கொஞ்சபேர் அடிமையாவும் நடத்துவானுகளாம்.1/8

2ரூவா 3 ரூவா கூலிய வாங்க ஒரு வாரம் 10 நாள் அலைய வச்சு, வீட்டுக்கு வெளிய நிக்கவச்சு தான் தருவாங்களாம்.இப்டி நிறைய.

படிக்கலயே தவிர எங்கப்பா, விவரம். துண்டு சீட்டு அட்ரஸ வச்சிகிட்டு மெட்ராசுக்கே போய்ட்டு வந்திருக்கார்.
1/9

படிப்பறிவு இல்லாத தால, மத்தவங்க முன்னாடி எப்பிடி கூணி குருகி , அடுத்தவன் கைய நம்பி ,கெஞ்சி கூத்தாடி பொழைக்க வேண்டியிருக்குனு ஒவ்வொரு நிகழ்ச்சியா சொல்லுவாரு. ஆரம்பத்தில புரியல. பின்னாடி , புரிஞ்சது.
1/10

படிச்சு பெரியாளாகி எங்கப்பாவ ஒக்கார வச்சு சோறு போடனும்ன்றது ஆச. ஆனா, காலம் வேற ஒன்னுக்கு கொன்டு போச்சு.
நா பத்தாப்பு படிக்கிறப்ப, மூளைக்காய்ச்சல் வந்து வைத்தியம் பார்க்க காசில்லாம 2 மாசம் கோமால இருந்து எங்கப்பா இறந்துட்டார். 1/11

வீட்ல இருந்த , பொட்டு தங்கம் வரைக்கும் வைத்திய செலவுலயே காலி. கைல பத்து பைசா இல்ல. 4 அக்கா கல்யாண வயசில நிக்கிறாங்க. எங்கம்மாவுக்கு , எங்கூர் தாண்டி 10 கிலோமீட்டருக்கு அங்கிட்டு என்ன ஊர் இருக்குனு கூட தெரியாது. அவ்வளவு கூண்டுபறவை, வெள்ளந்தி.1/12

அன்னைக்கி அப்பனுக்கு அப்பனா, அம்மாவுக்கு அம்மாவா நின்னு எல்லாரையும் கரையேத்துனது எங்க அக்காதான்.
கடனை அடைக்க பஞ்சுமில் வேலைக்கு போறேனு எங்க அக்காவும் தங்கச்சியும் படிப்ப நிறுத்திட்டு 50 ரூவா சம்பளத்துக்கு போய்ட்டாங்க. 1/13

நானும் 12 முடிச்சிட்டு பார்ட் டைம் வேலை பார்த்து UG ,PG MBA முடிச்சு வேலைக்கு போற வரைக்கும், கல்யாணம் பன்னி வேற வீட்டுக்கு போனாலும் என் குடும்பத்த பாத்துகிட்ட எங்க க்காதான் என் அப்பா!!!

தான் கஷ்டபட்டாலும் எங்களை அட்லீஸ்ட் ஸ்கூல்வரைக்கும் படிக்க வச்சு, இதான் காப்பாத்தும்னு 1/14

சொன்ன, எங்கப்பாதான் எங்க சாமி.
#fathersday2020