Thread by @jaabirsuldaan

Waxa ugu weyn ee la fili karo in ay macno u samayn karaan dadka iyo dowladnimada Soomaaliyeed ee la rabo in ay ka soo baxaan shirka Amniga Qaranka ee loogu madlanyahay Dhuusamareeb waa dhammaystirka hannaanka iyo haykalka dowladnimada ee uu saldhig u yahay Dastuur dhammaystiran.

Dastuurku waa halka ay dowladnimadu ka dhutinayso kana kala qaarnayd tan iyo dib u yagleeliddii dowladnimada nidaamka federaalka ku salaysan.
Waxyaabaha looga fadhiyo madashaan inay ka soo baxaan ee waxtarka u leh dalka iyo dadka Soomaaliyeed.

1- Dhammaystirka Qorshaha Amniga Qaranka oo saldhig u ah amniga iyo xasilloonida dalka sida dhismaha Ciidanka Qaranka qaybahooda kala duwan, Golaha Amniga Qaranka iyo Siyaasadda Amniga Qaranka oo laf dhabar u ah amniga dalka.
2- Dhamaystirka hannaanka Guud ee Maaliyadda dalka

-Sida midaynta canshuuraha iyo dejinta siyaasadda maaliyadda dalka.
3- Dhammaystirka hannaanka Garsoorka Dalka:
Garsoor hufan oo madax bannaan waxaa asaas u ah in la helo nidaam iyo dastuur hagaya haykalka, qaabka uu u ekaanayo iyo awoodihiisa kala heer duwan ee uu yeelanayo.

4- Dhammaystirka hannaanka federaalka dalka:
Kala saarista & kala xadaynta awoodaha heerarka kala duwan ee dowladda sida Federaalka, Maamul Goboleedka & Dowladaha Hoose.
Sidoo kale dhamaystirka qaab dhismeedka Dowladda Federaalka ah iyo nidaamka dowladeed ee ay noqonayso.

5- Dhammaystirka hannaanka wadaagga kheyraadka iyo wax wada lahaanshaha.
Si looga baxo dawarsiga shisheeyaha iyo ku tiirsanaanta ajaanibta ugana faa'iideysanno kheyraadkeenna waa in la dhamaystiro hannaankaas si loo helo nidaam hufan oo daahfuran laguna wada kalsoonyahay.

6- Doorasho ku dhacda jawi midnimo, dadka soomaaliyeedna ku qanacsanyihiin.
Gunaanadkii shirkaan waxaa looga fadhiyaa in lagu dhammaystiro dhismaha dowladnimada laguna soo afjaro mashruuca daba dheeraaday ee dastuurka laguna heshiiyo sidii dalka looga saari lahaa ilo meeraysada.