Thread by @ThamizhachiTh

தலைவர் கலைஞர் மீதும், கழகத்தின் மீதும் மாறாத விசுவாசமும், தீராப் பற்றும் கொண்ட மூத்த முன்னோடி, மேனாள் தமிழக அமைச்சரும்,
கழகத்தின் செய்தி தொடர்பாளர், கழக உயர்நிலை செயல் திட்டக்குழு உறுப்பினருமான, எங்கள் குடும்பத்தின் அன்பிற்கும் பாசத்திற்கும் உரிய,

1/7

அத்தா ஏ.ரகுமான்கான் அவர்களின் மறைவுச் செய்தியைக் கேட்டுச் செயலற்று அமர்ந்திருக்கிறேன்.
என் தந்தையின் மனமொத்த நண்பராக எங்கள் குடும்பத்தில் ஒன்றானவர்.
அரசினர் தோட்டத்தில் எங்களது வீட்டின் பின்புறத்தில் அவரது வீடு என்பதால் சுக, துக்கங்களில் ஒருவருக்கொருவர் பகிர்ந்து,

2/7

இன்று அடுத்த தலைமுறை வரை தொடர்கின்ற அற்புதமான உறவானவர். அவரது அன்பு மனைவி, எனக்கு உடன்பிறவாத ‘நிலவர் அக்கா’.
‘குட்லி’ எனப் பாசத்தோடு அவர் குடும்பத்தார் அழைக்கும் என் மூத்த மகளுக்கு, அன்பான’ பாய் தாத்தா’.

3/7

ரியாஸ் மாமா, சுபேர் மாமா என்று என் மகள்மார் அழைக்கும் அவரது மகன்மார் இருவரையும், நிலவர் அக்காவையும் இத் துயர நாளில் எப்படி எதிர் கொள்ள?
வெற்று வார்த்தைகளில் மரணம் பறித்துச் செல்கின்ற உறவுகள் ஒவ்வொன்றும் இட்டு நிரப்ப முடியாத வெற்றிடம்.

4/7

அறிவின் ஒளியால் கடக்க இயலாத கருமையின் பள்ளத்தாக்கில் ஏனிந்த தொடர் மரண வாசமென மனம் அல்லாடுகிறது.
நிலவர் அக்காவின் விருந்தோம்பலில் கழித்த மதிய உணவு வேளைகள், எனது கவிதைகள் குறித்த அவரது பகிரல்கள் , என் குழந்தைகளின் இளம் பருவத்தில் அக் குடும்பம் காட்டிய பேரன்பு...

5/7

அப்பாவும், அவரும் அதிர்ந்து சிரித்தபடி ஒன்றாக அமர்ந்திருந்த தேநீர் பொழுதுகள், தைப் பொங்கல், ரம்ஜானில் தவறாமல் பகிர்ந்துகொண்ட அவரது கம்பீரக் குரல் வாழ்த்துகள் - என அத்தனை நினைவுகளும் இப்பொழுதின் கண்ணீரில் அசங்கலாக மேலெழும்புகின்றன.
தனது சட்டசபை, மேடைப் பேச்சுகளால்

6/7

அனைத்துத் தரப்பிலும் இரசிகர் பட்டாளத்தைப் பெற்றிருந்த சொல்வன்மையாளர், இன்று மௌனித்து இருந்தாலும், என்றும் அவரது கழகப்பணியை, பற்றை, உடன்பிறப்புகள் உரக்க நினைவு கூர்வோம். எங்கள் அன்பு அத்தாவிற்குப் புகழ் வணக்கம்🙏எங்களின் பாசமிகு’ பாய் தாத்தா’விற்கு இதய அஞ்சலி🙏

7/7