Thread by @RealHauleGluck

Dunia ya leo imejikita zaidi katika demokrasia. #Demokrasia kwa ufupi ni dhana inayolenga ushiriki wa wananchi katika kuweka misingi sahihi ya uendeshaji wa nchi wao wakiwa ndio msingi wa mamlaka yote ya nchi na walio na uwezo wa mwisho wa kuipa serikali madaraka na mamlaka yake.

Moja ya misingi mikuu inayolenga kukuza demokrasia ni Katiba ya Nchi. Katiba ni msingi mkuu wa uendeshji wa nchi, ukuaji wa demokrasia na utawala wa Sheria. Katiba ndiyo sheria kuu (mama) na ambayo kwayo sheria zote nyinginezo hupata uhalali na hufungamana na Katiba.

Katiba huweka bayana misingi ya utawala, vyombo vya utawala, na mgawanyo wa madaraka baina ya vyombo vikuu vya dola 👉🏽
Bunge, Mahakama na Serikali (Watendaji wakuu) Kubwa zaidi, Katiba ndiyo
inayoainisha nafasi waliyonayo wananchi katika kuweka utaratibu wa kuendesha nchi yao.

Kwa muda mrefu sasa, hasa baada ya mabadiliko ya sera za kiuchumi na Kutoka kwenye mfumo wa chama kimoja na kuingia katika mfumo wa vyama vingi, umma wa Watanzania umeghubikwa na hoja mbalimbali za msingi sana kuhusu
mustakabali wa taifa letu la Tanzania.
Hoja kubwa ni 👉🏽Katiba.

Tangu miaka ya 1990‘s Hoja kubwa ya watanzania ilikuwa ni suala la kuwepo kwa Katiba Mpya. Makongamano na warsha mbalimbali ziliitishwa kuijadili Katiba na madai
mbalimbali yakatolewa yakikosoa muundo wa Katiba hii ya sasa, kulingana na
mazingira tuliyonayo na hivyo…

watanzania walidai kuitishwa kwa kongamano la kikatiba nchini ili kuunda Katiba Mpya, na matunda yake ilikuwa ni kutungwa kwa Sheria ya
Marekebisho ya Katiba 2011 ambayo hata hivyo ililamikiwa sana kwa kutungwa
bila kuwapa watanzania nafasi ya kushiriki..

na pia kumrundikia Rais madaraka yote
bila hata kuwashirikisha wapiga kura wake. Wananchi hawakushirikishwa kikamilifu kabla ya kutungwa kwa Sheria ya marekebisho ya Katiba 2011. Sheria ambayo ilitoa nguvu ya kuanza kwa Mchakato wa Katiba Mpya uliogota 2014.

Ukweli Mchungu, dunia ya leo demokrasia na utawala wa kidemokrasia ni moja ya dhana muhimu sana zinazoleta mchango mkubwa katika maendeleo ya nchi. Demokrasia na utawala wa
kidemokrasia sio tu vichochezi vya maendeleo bali ni mihimili mikubwa ya kupambana na umaskini.

Pasipokuwepo na demokrasia na utawala unaojali demokrasia na kanuni ambatanishi
kama vile utawala wa Sheria, heshima kwa haki za binadamu na Utawala Bora, uwezekano wa kupambana na umaskini na ufukara ni ndogo sana.

Taifa lolote lisilojali demokrasia ya dhati , Utawala Bora na Utawala wa Sheria huanguka ama hubaki maskini na tegemezi kwa vile
huwa linaua fursa muhimu mbadala ambazo kama zingepewa nafasi, zingeleta
matokeo chanya katika maendeleo ya kisiasa, kiuchumi na kijamii.

Ili Taifa libadilike kiuchumi, kisiasa na kijamii ni lazima watu washirikishwe kikamilifu katika kuandaa mazingira ya mabadiliko hayo na hasa
ushirikishwaji katika kuweka misingi imara ya mabadiliko yenye manufaa na
yanayolenga mbali na upeo wa leo.

Ushirikishwaji sahihi wa umma katika kuweka
misingi ya kuiendesha nchi ndicho chanzo pekee cha kuimarisha demokrasia Utawala wa Sheria, Utawala Bora, Haki na Usawa.

DEMOKRASIA ni kuwa mamlaka yote iko kwa umma na kwamba serikali itapata mamlaka yake toka kwa umma. Ni hakika na dhahiri sikuzote kuwa, Wananchi ndio wenye nchi. Wananchi ndiyo wanapaswa kuwa na sauti ya mwisho jinsi wanataka nchi iendeshwe kwa kuilinda, kuitetea Katiba.

Ili wananchi wawe ndio wenye nchi na wenye mamlaka ya mwisho juu ya mustakabali wa mambo yahusuyo nchi na rasilimali zake, utashi wa kisiasa na uchumi, basi ni lazima uwepo
mfumo imara uliotokana na ridhaa yao na unaoweka bayana kanuni na taratibu za
msingi na za kidemokrasia.

Msingi huo mkuu wa mfumo huo muafaka si mwingine bali ni Katiba ya nchi. Kukosekana kwa katiba yenye ridhaa halisi ndicho chanzo kikubwa
cha kuparanganyika kwa jamii na kudumaa kwa maendeleo na ustawi wa nchi hasa katika
nchi nyingi za dunia ya tatu hasa Barani Afrika.

Katiba itokanayo na umma (wananchi) hutoa
uthibitisho na uhakikisho kwa umma kuwa, sura na utaratibu wa uundwaji wa serikali utatokana na namna au utaratibu ule ambao wao (umma) wameukubali na kuridhia kitaifa. Katiba ndiyo inayoweka bayana mihimili ya
utawala wa dola.

Katiba madhubuti itokanayo na umma ni
kiashiria kwa wananchi kuwa utawala wa sheria na heshima kwa binadamu na misingi yote ya
haki italindwa na kuhifadhiwa ndani ya Katiba na kwa mujibu wa Katiba hiyo serikali itatekeleza wajibu wake.

Kwa hali hiyo, ni mwiko kwa serikali kutumia
madaraka yake isivyo halali na au kwa mabavu na pia haitaweza kamwe kufanya maamuzi kandamizi au kutunga sheria au sera yoyote kandamizi na inayokiuka misingi ya haki kama ilivyobainishwa ndani ya Katiba.

Katiba ni sheria mama (grundnorm
or the basic law) Katiba iliyo madhubuti hutoa hakikisho kwa umma kwamba, sheria zote, nguvu ya kisheria na kiutawala, sera zote na kanuni zozote zile, lazima zifungamane na kupata uhalali wake kutokana na Katiba waliyoiridhia wananchi wenyewe.

Katiba hutoa hakikisho la jamii huru na vilevile huihakikishia jamii hiyo uhuru, uwiano na fursa sawa katika shughuli zozote zile, ziwe za kiuchumi, kijamii au kisiasa. Hivyo, Katiba huweka mazingira yenye kanuni na taratibu sawia kuhusu ukuaji na ustawi wa taifa husika.

Katiba madhubuti inatoa fursa Taratibu kama za Uchaguzi Uuru na wa haki unaojali uwazi na unaotoa mwanya wa asiyeridhika kuwasilisha hoja zake mbele ya chombo huru cha utoaji haki ( mahakama) bila kikwazo chochote au gharama kubwa, ni
sehemu muhimu ya Katiba iliyo madhubuti.

Katiba iliyo madhubuti huwa ni msingi mkubwa wa utawala bora, na unao zingatia uwazi, uwajibikaji na utawala wa sheria , dhana ambazo kwa pamoja ni misingi mikubwa ya demokrasia na maendeleo ya nchi.

@threadreaderapp unroll