ابني اول ما تم سنتين وكان مش بيقول ولا كلمة ولا بيعمل اي تفاعل بس عنده تفاعل غير طبيعي مع اي موبايل وشاشة وخصوصا اي حاجة فيها اغنية Babyshark ودي كانت حاجة مريبة بالنسبة للمدرسين في الحضانة بس انا ومراتي كنا شايفين عادي وده كان نتيجة بنسمع ان في اطفال بتتكلم بعد ٣ سنين وكده - ١
ابتدينا نسمع من المدرسين ونسال ايه المشكلة الاساسية اللي مفروض نحلها .. فكان كلام كل الناس ده عادي هو هيكون محتاج تخاطب وتنمية مهارات .. وابتدينا رحلة طويلة مليئة بانواع كتير من الناس اهمهم الناس اللي قلبها عليك و اوسخهم الناس اللي بتستغل خوفك وزعلك ويعملو عليك مصالح .. -٢
لحد ما ابتدينا نلف ونروح ومش فاهمين حاجة وبعدين لقينا مكان كويس جدا في المعادي بس المكان ده غالي جدا فتوقعت انه المفروض ان المكان ده هيكون هو الحل ان ابني يتكلم ويبقى زي الفل وخصوصا احنا لسه منعرفش ابني مش بيتكلم ليه .. متوقعين انه متاخر لكن مش عارفين اي حاجة غير متوقعه -٣
ابتدينا بشوية assessments ودي بتكون السبوبة بتاعت اي مكان بتروح له .. بيعمل شوية اختبارات ب ٧ ١٠ تلاف جنية عشان يديك في الاخر خطة علاج وفي نفس الوقت بيطلب شوية اختبارات خارجية وعملناها وجت لما اتطلب مننا اختبار السمع .. وكانت رحلة مش لطيفة لاننا عملناه في الاول مع حد غير امين -٤
المشكلة ان الشخص ده دكتور مشهور جدا جدا وقال ان ابني مش بيسمع وانه لازم يجيب سماعة وكانت قصة طويلة وعلى فكره التحاليل اللي عملها بتقول كده فعلا بس هو ماكنش عنده ضمير انه يعملها صح .. وبالتالي لما عملناها في كذه حته تانية كان ابني بيسمع وزي الفل الحمد لله وكان -٥
رجعنا نبدا بقى ال plan اللي محطوطة عشان نمشي عليها بعد ما اتاكدنا ان مفيش اي عوامل خارجية مؤثرة على ابني.. بس انا ابني كان عنده صفات كتيرة normal لكن كان بيتاثر جدا لما يسيب مراتي او يروح لحد فكانت صفة بردو عادية بس زعله كان بيكون جامد وخصوصا افترضنا ان ده عادي لانها كانت فترة -٦
#كورونا وكان هو و اطفال كتير في سنه محصلهمش تعامل كتير مع ناس خارجية عن البيت .. وبدانا وابني ابتدا يتحسن لكن بردو لسة ميتكلمش .. التحسن كان في مهاراته واستيعابه للامور وكان دايما عنده ذكاء خارق في الحاجت ال visuals بغض النظر يعني .. ابتدا يتقال لينا محتاج يعمل اختبار #توحد -٧
كان هنا الموضوع ابتدا بقى يصوصو في دماغي ان بيتعمل عليا مصلحة لان كل شوية بزود في الحصص وحجات كتير وبقى اليوم مليان مشاوير كتير وضغط جامد عليه وفلوس كتير مش بيقف نزيفها .. وهنا دي كانت مرحلة ظهور المصالح انك مش قادر تثق في حد -٨
#مصر فيها مشكلة كبيرة ان مفيهاش #support groups كتير لاي مشكلة فمعرفتك للمشكلة وحلها مش بتلاقيه بسهولة خصوصا ان اهالي كتير مش بتحب تقول على ولادها حاجة وده على فكرة غلط لان ال support groups بتساعد هتساعد اكتر انك تحل وتفهم -٩
ابتديت اكلم ناس بره مصر ودكاترة وعملت ال #ados وده اختبار التوحد وطلع ابني عنده توحد moderate وده المستوى المتوسط في التوحد اللي ممكن يتلحق بتكثيف الprogram جدا من سن ٣-٥ سنين عشان يقدر يكون طبيعي وتمام -١٠
بس انا ومراتي كنا خايفيين تاني من النصب زي ما حصل في اختبار السمع فقررنا نسال كتير ونلف كتير .. لحد ما حد دلنا على دكتورة متخصصة اسمها سحر داوود .. وهي اللي عملتله اختبار تاني وقالت انه لازم يمشي على program معين بس ال program ده لازم يكون في حجات كتير بردو معاه -١١
ابتدينا نروح مركز تاني اللي مسؤوله عنه دكتورة سحر و هو اغلى من الاولاني لكن حق الله .. كان كل حاجة بالمسطرة وكل الناس certified وابتدينا رحلة جديدة مع يونس .. بس الحمد لله يونس اتحسن جدا جدا وبقى بيتكلم شوية وبقى بيتعامل عادي جدا وافضل من الاول الحمد لله ونزل مستوى بقى mild - ١٢
بس الموضوع ماكنش بقى واقف على مركز واحد للتخاطب والمهارات بقى في سباحة و #رياضة وبقى في دكتور تغذية معاه دايما وبقى معاه shadow teacher تعقد معاه وتساعده بره البيت عشان يعرف يتعامل ويحسن من نفسه وهو حبيبي قدر يتغلب على كل ده ويعافر ويحسن نفسه بنفسه -١٣
اهم حاجة في الموضوع ده كله هو اللي هكتبه دولقتي؛ قصة ان الاهل تخبي وتخاف ده بيضر الطفل بدل ما يعالجة .. فكرة ان الفلوس غالية ومش كل الناس تقدر عليها .. اه فعلا بس ممكن ميبقاش في كثافة في الحصص بس لازم الاهالي تتشقلب وتديله حصص اه ممكن فترة العلاج تطول بس لازم تبتدي بدري -١٤
لازم تسال وتفهم وتقعد مع تجارب سابقة وعلى فكرة مش لازم التجارب السابقة تكون شبه حالتك بس لازم تفهم تتصرف ازاي وتعمل ايه .. فيه ايام بتعدي وفي ايام مبتعديش وبيكون فيه انتكاسه .. بس طول ما انت بتدعم ابنك/بنتك وربنا في ضهرك هيكون هناك فرج وفرحة -١٥
التوحد حاجة مش عيب ومفاهيمه متغيرة وكل سنة في ابحاث افضل واختبارات افضل وبرامج افضل بتحسن من النتايج .. اهم حاجة الثقة في الله ودعمك ومحدش يقول اشمعنى انا او اشمعنى ابني لانه اصلا هو اللي مفروض يقول اشمعني ده ابويا ودي امي مش احنا اللي نقول -١٦
انا كاتب ال thread ده عشان لو اي حد محتاج اي مساعدة او اقدر اقدمله اي حاجة عشان يتعامل في موضوع زي #التوحد والرحلة عاملة ازاي ومكملة ازاي انا موجود اي وقت .. وحابب كمان اكتب عن موضوع الرياضة والتغذية ازاي فارقو كتير مع يونس ابني في thread تاني منفصل
• • •
Missing some Tweet in this thread? You can try to
force a refresh
