Thread by @Nair9895

Day 130
#ശ്രീലളിതാസഹസ്രനാമം #Lalithasahasranamam

ഓം
ശ്രീ ലളിതാ സഹസ്രനാമം

ശ്ലോകം 130

ഇച്ഛാശക്തി ജ്ഞാനശക്തി ക്രിയാശക്തി സ്വരൂപിണീ |
സര്വാധാരാ, സുപ്രതിഷ്ഠാ, സദസദ്-രൂപധാരിണീ || 130 ||

ഇച്ഛാശക്തി ജ്ഞാനശക്തി ക്രിയാശക്തി സ്വരൂപിണീ = ഇച്ഛാശക്തി ജ്ഞാനശക്തി ക്രിയാശക്തി എന്നിവ വേദാന്ത ശാസ്ത്രപ്രകാരം പരമാത്മാവിന്റെ ശക്തിത്രയമാണ്. ഈശ്വരന്റെ ഇച്ഛാശക്തി കൊണ്ടാണ് പ്രപഞ്ചസൃഷ്ടി സംഭവിക്കുന്നത്. കർമ്മബന്ധത്തിൽ നിന്നും ജീവാത്മാവിനെ മോചിപ്പിക്കുന്നത് ജ്ഞാനശക്തി.

പ്രപഞ്ചസ്ഥിതിക്ക് ആവശ്യമായ ചലനം ക്രിയാശക്തി.

ഇച്ഛ, ജ്ഞാനം, ക്രിയ എന്ന ശക്തികളായി വർത്തിക്കുന്ന ദേവിക്കു നമസ്കാരം. ദേവിയുടെ ശരീരം ഇച്ഛാദികളായ ഈ മൂന്നു ശക്തികളുടെയും സ്വരൂപമാണെന്നു സങ്കേതപദ്ധതിയിൽ പറഞ്ഞിട്ടുണ്ട്.

ബ്രഹ്മവിഷ്ണുമഹേശ്വര രൂപിണിയായ ദേവി ഇച്ഛാദിശക്തി ത്രയ സമ്പന്നയാണെന്നു വാമകേശ്വരതന്ത്രത്തിലുണ്ട്.

ഇവയെ ദേവിയുടെ ശരീരഭാഗങ്ങൾ ആയി ആചാര്യന്മാർ വിവരിക്കുന്നു.

"ഇച്ഛാശിര:പ്രദേശശ്ച ജ്ഞാനാ ച തദധോഗതാ
ക്രിയാ പദഗതാ ഹൃസ്യാ ഏവം ശക്തിത്രയം വപു:"
എന്നു സങ്കേതപദ്ധതി.

"ത്രിപുരാ ത്രിവിധാ ദേവീ ബ്രഹ്മാവിഷ്‌ണ്വീശ രൂപിണീ
ജ്ഞാനശക്തി ക്രിയാശക്തിർ ഇച്ഛാശക്ത്യാത്മികാ പ്രിയേ.." എന്നു വാമകേശ്വര മന്ത്രം.

സർവ്വാധാരാ = സർവ്വതിന്നും ആധാരമായ ദേവിക്കു നമസ്കാരം.സർവ്വജഗത്തുക്കളെയും തന്നിൽ ധരിക്കുന്നവൾ.

സർവ്വഭൂതാന്തര്യാമിനി എന്നു സാരം.

നിത്യാനിത്യങ്ങളും സൂക്ഷ്മാസൂക്ഷ്മങ്ങളും മൂർത്താമൂർത്തങ്ങളും ഭൗമാന്തരീക്ഷങ്ങളുമായ എല്ലാ വസ്തുക്കളിലും ദേവി അന്തര്യാമിയായിരിക്കുന്നുവെന്ന് ബ്രഹ്മാണ്ഡപുരാണത്തിൽ പറയുന്നു.

സുപ്രതിഷ്ഠാ = ശോഭനമായ പ്രതിഷ്ഠയുള്ള ദേവിക്കു നമസ്കാരം.

പ്രതിഷ്ഠാ = നിലനിൽപ്പ് എന്നും നിലനിൽക്കുന്നവളെന്നർത്ഥo.

അല്ലെങ്കിൽ സുപ്രതിഷ്ഠമെന്ന ഛന്ദോവിശേഷമായി സ്ഥിതിചെയ്യുന്നവൾ. ദേവി ഛന്ദോരൂപീണിയാണെന്നു പ്രമാണമുണ്ട്. ദേവി സ്ഥിരമായിരിക്കു ന്നതുകൊണ്ടാണ് ജഗത്തിന് ആപേക്ഷികമായ സത്ത ലഭിക്കുന്നത്.

സദസദ്-രൂപധാരിണീ = സത്തായ ബ്രഹ്മരൂപ ത്തെയും അസത്തായ ജഗദ്രൂരൂപത്തെയും ധരിച്ചുകൊണ്ടിരിക്കുന്ന ദേവിക്കു നമസ്കാരം. സദസദ്വിഷയമായ ജ്ഞാനമാകുന്ന രൂപത്തോടു കൂടിയവളെന്നർത്ഥo." അസദ്വാ ഇദമഗ്ര ആസിൽ" ഇത്യാദി ശ്രുതികളിൽ ജഗത്ത് അസത്താണെന്നു പറയപ്പെട്ടിട്ടുണ്ട്.

🙏🏼🙏🏼🙏🏼