Thread by @Nair9895

Day 132
#ശ്രീലളിതാസഹസ്രനാമം #Lalithasahasranamam

ഓം
ശ്രീ ലളിതാ സഹസ്രനാമം

ശ്ലോകം 132

അന്നദാ, വസുദാ, വൃദ്ധാ, ബ്രഹ്മാത്മൈക്യ സ്വരൂപിണീ |
ബൃഹതീ, ബ്രാഹ്മണീ, ബ്രാഹ്മീ, ബ്രഹ്മാനന്ദാ, ബലിപ്രിയാ || 132 ||

അന്നദാ = ആഹാരം നല്‍കുന്ന ദേവീ. കാശിയില്‍ ദേവി അന്നപൂര്‍ണ്ണേശ്വരിയാണ്.

സകല ജനങ്ങൾക്കും അന്നം പ്രദാനം ചെയ്യുന്നവൾ. അന്നദാനം ചെയ്യുന്ന ദേവിക്കു നമസ്കാരം. ദാരിദ്രനാശിനി എന്നർത്ഥo പറയാം. ദേവി അന്നപൂർണ്ണയുടെ സ്വരൂപത്തോടുകൂടിയ വളാണെന്നു പ്രസിദ്ധമാകുന്നു.

ഭഗവദ്ഗീത അദ്ധ്യായം 3 ശ്ലോകം 14 ൽ
"അന്നാദ്ഭവന്തി ഭൂതാനി പർജന്യാദന്നസംഭവഃ
യജ്ഞാദ്ഭവതി പർജന്യോ യജ്ഞഃ കർമസമുദ്ഭവഃ" എന്നുണ്ട്‌.

അന്നാത് - ധാന്യങ്ങളിൽ നിന്ന്; ഭൂതാനി - ഭൗതികശരീരങ്ങൾ; ഭവന്തി - വളരുന്നു (ഉണ്ടാകുന്നു); പർജന്യാത് - മഴയിൽ നിന്നാണ്; അന്നസംഭവഃ - അന്നം ഉണ്ടാവുന്നത്;

യജ്ഞാത് - യജ്ഞങ്ങളിൽ നിന്ന്; പർജന്യഃ - മഴ, ഭവതി - ഉണ്ടാവുന്നു; യജ്ഞഃ - യജ്ഞം; കർമ സമുദ്ഭവഃ - നിയതകർത്തവ്യത്തിൽ നിന്നുണ്ടാകുന്നു.

എല്ലാ ജീവജാലങ്ങളും ധാന്യങ്ങൾകൊണ്ട് ജീവിക്കുന്നു. അതാകട്ടെ മഴമൂലമുണ്ടാകുന്നു. മഴ യജ്ഞത്തിൽ നിന്നുണ്ടാകുന്നു;

യജ്ഞങ്ങൾ വിധിപ്രകാരമുള്ള കർമ്മങ്ങളിൽ നിന്നും.

വസുദാ = സമ്പത്ത് നല്‍കുന്ന, അഷ്ടൈശ്വര്യം നല്‍കുന്നവളായ ദേവിക്ക് നമസ്കാരം.

വസുവിനെ ദാനം ചെയ്യുന്ന ദേവിക്കു നമസ്കാരം. വസു = ധനം, അഥവാ രത്നം അല്ലെങ്കിൽ വസുശബ്ദത്തിന്നു ഭൂതസംഖ്യ പ്രകാരം എട്ട് എന്നർത്ഥo.

അണിമാദികളായ ഐശ്വര്യങ്ങളെ കൊടുക്കുന്നവളെന്നു താല്പര്യം. അന്നം, ധനം എന്നിവ നൽകുന്നു എന്ന ബോധത്തോടെ ആത്മാവിനെ ഉപാസിക്കുന്ന വർക്ക് ധനധ്യാനസമൃദ്ധിയുണ്ടാവും എന്നു ബ്രിഹദാരണ്യകോപനിഷത്തു പറയുന്നു.

"സവാ ഏഷ മഹാജന ആത്മാന്നാദോവസുദാനോ വന്ദതേ" ശ്രുതി.

വൃദ്ധാ = അതിപുരാതന കാലം മുതലേ പ്രപഞ്ചത്തില്‍ നിലകൊള്ളുന്നവളേ ദേവീ.

പുരാതനാ, സർവ്വജ്യേഷ്ഠയാകയാൽ ജഗദ്രൂപേണ അഭിവൃദ്ധിയെ പ്രാപിച്ചവൾ. ജഗത്തിനെ വർദ്ധിപ്പിക്കുന്നവളായ
ചിരന്തിനിയായ ദേവിക്കു നമസ്കാരം.

ലോകത്തിലെ ആദികാരണമാകയാൽ ദേവിക്കു വൃദ്ധത്വം സിദ്ധമാകുന്നു.

വൃദ്ധത്വം പലപ്രകാര ത്തിലുമുണ്ട് . ജ്ഞാനവൃദ്ധത്വം, ധർമ്മവൃദ്ധത്വം, വയോവൃദ്ധത്വം മുതലായ എല്ലാ വൃദ്ധത്വങ്ങളും തികഞ്ഞിരിക്കുന്നവളെന്നു താല്പര്യം. പ്രപഞ്ചധാത്രി എന്നും അർത്ഥo.

ബ്രഹ്മാത്മൈക്യ സ്വരൂപിണീ = ബ്രഹ്മവും ആത്മാവും തമ്മിലുള്ള ഐക്യത്തിന്റെ സ്വരൂപമായ ദേവീ, അവിടുത്തേക് നമസ്കാരം.

ബ്രഹ്മത്തോട് = ചൈതന്യത്തോട്, ആത്മാക്കൾക്ക് ജീവങ്ങൾക്ക് ഉള്ള ഐക്യം തന്നെ സ്വരൂപമായി നിജരൂപമായ് ഉള്ളവൾ. ബ്രഹ്മാത്മാക്കൾക്ക് = ശിവജീവന്മാർക്കുള്ള ഐക്യം തന്നെ സ്വമായ് - ഹംസമന്ത്രമായ് ഇരിക്കുന്ന രൂപത്തോട് കൂടിയവൾ. ബ്രഹ്മവും ആത്മാക്കളും തമ്മിലുള്ള ഐക്യമാകുന്ന സ്വരൂപത്തോടുകൂടിയ -

ദേവിക്കു നമസ്കാരം.

ജീവജാലങ്ങളുടെ ബ്രഹ്മപ്രാപ്തിയാണ് ദേവീ സ്വരൂപമെന്നു ഭാവം. ശിവന്റെയും ജീവന്റെയും ഐക്യത്തെകുറിക്കുന്ന ഹംസമന്ത്രസ്വരൂപിണി എന്നും അർത്ഥo.

ബൃഹതീ = അത്യന്തം മഹത്വമുള്ള ദേവീ.

മഹത്തിൽ നിന്നും മഹത്തായി ഉള്ളവൾ, ആ അത്യന്തം മഹത്വമുള്ള ദേവിക്കു നമസ്കാരം.

അല്ലെങ്കിൽ ബൃഹതീച്ഛന്ദോരൂപിണി എന്നർത്ഥമാക്കാം. ബൃഹതീ എന്നത്, മുപ്പത്താറക്ഷരങ്ങളുള്ള ചന്ദസ്സാകുന്നു.

അതുമല്ലെങ്കിൽ ബൃഹൽസ്സാമരൂപിണീ എന്നും അർത്ഥo ഗ്രഹിക്കാം.

ബ്രാഹ്മണീ = ഔഷധവിശേഷരൂപാ ദ്വിജസ്ത്രീരൂപാ സംവിദ്വിശേഷരൂ പാ. ശിവൻ ദേവന്മാരിൽ ബ്രാഹ്മണനാകയാൽ തൽപത്നീ.

ശിവപത്നിയായ ദേവീ അവിടുത്തേക്ക് നമസ്കാരം.

"ബ്രാഹ്മണോ ഭഗവാൻ സാംബോ ബ്രാഹ്മണാനാം ഹി ദൈവതം.." വാസിഷ്ഠം.

ബ്രഹ്മാനന്ദസ്വരൂപിണിയായ ദേവിക്കു നമസ്കാരം. ബ്രാമണന്റെ പത്നി. ബ്രാമണൻ = ബ്രഹ്മജ്ഞനായ പരമശിവൻ. അഥവാ ബ്രാഹ്മണീ എന്ന ഔഷധിയുടെ രൂപത്തിലുള്ളവൾ.

വെളുത്ത പുഷ്പത്തോടുകൂടിയ ഒരു ഔഷധിയാണ് ബ്രാഹ്മണീ. അതു സംവിദ്രൂപിണിയും ദേവതാത്മികയുമാണെന്ന് സ്‌മൃതിയിലും പറയുന്നു.

ബ്രാഹ്മീ = ബ്രഹ്മാവിനെ സംബന്ധിച്ചവൾ, സരസ്വതീ ദേവി. വാക്കിന്റെ രൂപത്തോടു കൂടിയ ദേവിക്കു നമസ്കാരം " ബ്രാഹ്മീ തു ഭാരതീ ഭാഷാ ഗീർവ്വാഗ്വാണീ സരസ്വതീ " എന്നമരം.

ബ്രഹ്മാനന്ദാ = ബ്രഹ്മാനന്ദസ്വരൂപിണി.
ബ്രഹ്മമാകുന്ന ആനന്ദമുള്ള ദേവിക്കു നമസ്കാരം. അല്ലെങ്കിൽ ബ്രഹ്മത്തിൽ ആനന്ദിക്കുന്നവൾ. ബ്രഹ്മാനന്ദവതി.

ബലിപ്രിയാ = അവിദ്യ,രാഗദ്വേഷങ്ങള്‍ ഇവയെ എതിര്‍ത്ത് കീഴടക്കുന്ന ബലവാന്മാരില്‍ പ്രിയമുള്ള ദേവീ.

ബലികൾ - അവിദ്യാദികളെ നിരസിക്കുന്നതിനു സമർത്ഥന്മാർ. കാമക്രോധാദികളെ ജയിച്ചവർ പ്രിയന്മാരായുള്ളവൾ. വിഘ്ന കൃത്തുക്കൾക്കുള്ള ബലിദാനം പ്രിയമായുള്ളവൾ. ആ
ബലികൾ പ്രിയങ്ങളായിട്ടുള്ള ദേവിക്കു നമസ്കാരം.

ബലികൾ = ഭക്തന്മാർ അർപ്പിക്കുന്ന ഉപഹാരങ്ങൾ.

അല്ലെങ്കിൽ, ബലിശബ്ദത്തിന് കാമക്രോധാദികളായ ആന്തരശത്രുക്കളെ ജയിച്ച ബലവാന്മാർ എന്നർത്ഥമാക്കാം. അപ്രകാരമുള്ള താപസന്മാരും ദേവിക്കു പ്രിയപ്പെട്ടവരാകുന്നു.

"ബലയോബലിനോവാ പ്രിയാ: യസ്യാസ്സാ " എന്നു വിഗ്രഹം.

🙏🏼🙏🏼🙏🏼