Thread by @Nair9895

Day 142
#ശ്രീലളിതാസഹസ്രനാമം #Lalithasahasranamam

ഓം
ശ്രീ ലളിതാ സഹസ്രനാമം

ശ്ലോകം 142

മിഥ്യാ ജഗദധിഷ്ഠാനാ മുക്തിദാ, മുക്തിരൂപിണീ |
ലാസ്യപ്രിയാ, ലയകരീ, ലജ്ജാ, രംഭാദി വന്ദിതാ || 142 ||

മിഥ്യാ ജഗദധിഷ്ഠാനാ = മിഥ്യയായ ജഗത്തിന് അധിഷ്ഠിതയായ ദേവീ.

മിഥ്യാരൂപമായിരിക്കുന്ന ജഗത്തിന് വെള്ളിക്കു മുത്തുച്ചിപ്പി പോലെ അധിഷ്ഠാനമായ് = തോന്നലിനു കാരണമായ ഉള്ളവൾ.

അഥവാ മിഥ്യയായ ജഗത്തിന്ന് പ്രതിഷ്ഠാനമായ ദേവിക്കു നമസ്കാരം. അധിഷ്ഠാനം എന്നുവെച്ചാൽ സത്യമായി തോന്നുന്നതിനുള്ള അധികാരം എന്നർത്ഥo.

മിഥ്യാഭൂതമായ ജഗത്തിനെ സത്തായ ബ്രഹ്മമാണെന്നു ബോധിപ്പിക്കുന്ന ശക്തി ദേവിയാകുന്നു. ജഗത്ത് മായാകല്പിതവും മിഥ്യാഭൂതമാണെന്ന് അനേകം പ്രമാണങ്ങളെ കൊണ്ട് സിദ്ധിക്കുന്നുണ്ട്.

ബ്രഹ്മം തന്നെ ജഗത്തായി പരിണമിച്ചിരിക്കുന്നു എന്നു സിദ്ധാന്തിക്കുന്ന താന്ത്രികമതത്തിൽ ജഗത്തിനും നിത്യത്വം -

സ്വീകരിക്കുന്നുവോ എന്നാണെങ്കിൽ ഇല്ല. ഭേദം മിത്ഥ്യയാകയാൽ ഭേദഘടി തമായിരിക്കുന്ന ആധാരാധേയഭാവവും മിത്ഥ്യ തന്നെയാണെന്നു സമർത്ഥി ക്കുന്നതേയുള്ളു.

"സർവ്വം ഖല്വിദമേവാഹം നാന്യദസ്തി സനാതനം" ദേവീ ഭാഗവതം.

"മായാമാത്രമിദം ദ്വൈതമദ്വൈതം പരമാർത്ഥതഃ" ശ്രുതി.

"ത്വയി പരിണതായാം നഹി പരം" എന്ന് ആചാര്യർ.

സാംഖ്യന്മാർ പ്രകൃതി പുരുഷന്മാരെ പരമകാഷ്ഠയായി സ്വീകരിച്ചു. ആ പ്രകൃതിയെ മായയെ ചൈതന്യമില്ലാത്തവളാണെന്നും അവൾ തന്നെ ജഗൽ കാരണഭൂതയെന്നും വാദിക്കുന്നു.

"സാംഖ്യാ വദന്തി പ്രകൃതിം പുരുഷഞ്ച യാം താം ചൈതന്യഭാവരഹിതാ ജഗതശ്ച്ച കർത്രീo" ദേവീഭാഗവതം.

ശാക്തന്മാർ പ്രകൃതിപുരുഷന്മാർക്കും കാരണഭൂതയായ സഗുണനിർഗുണ സ്വരൂപിണിയായി ഇരിക്കുന്ന ബ്രഹ്മശക്തിയേയാകുന്നു പരമകാഷ്ഠയായി ഗണിക്കുന്നത്.

"സാ കാഷ്ഠാ സാ പരാഗതിഃ" എന്ന്.

"കാസി ത്വം മഹാദേവി! - അഹം ബ്രഹ്മരൂപിണീ മത്തഃ പ്രകൃതി പുരുഷാത്മകം ജഗൽ" എന്ന്. താന്ത്രികരെ ശാക്തരെന്നും, -

അവരുടെ മതത്തെ പരിണാമമതമെന്നും പറയും.

മുക്തിദാ = മുക്തിയെ ദാനം ചെയ്യുന്നവൾ.

"യേർച്ചയന്തി പരാം ശക്തിം വി ധിനാവിധിനാപി വാ നതേ സംസാരിണോ നൂനം മുക്താ ഏവ ന സംശയം" ബ്രഹ്മാണ്ഡം.

കൈവല്യരൂപമായ മോക്ഷത്തെ ദാനം ചെയ്യുന്നവൾ. മുക്തിയെ കാംക്ഷിക്കുന്നവൻ സർവ്വഭൂതങ്ങൾക്കും -

ആത്മാവായും ശിവരൂപീണിയായിരിക്കുന്ന ശ്രീ പരമേശ്വരിയെ ആശ്രയിക്കണമെന്നു കൂർമ്മബ്രഹ്മാണ്ഡ പുരാണത്തിൽ പറഞ്ഞിരിക്കുന്നു.

മുക്തിരൂപിണീ = മുക്തി തന്നെ രൂപമായുള്ളവളേ.

മുക്തിതന്നെ = അജ്ഞാനനാശം നിമിത്തം ഉണ്ടാകുന്ന ആത്മാനന്ദം തന്നെ രൂപമായുള്ളവൾ, മുക്തിയാകുന്ന രൂപത്തോടുകൂടിയ ദേവി.

മുക്തി = അവിദ്യാനിവൃത്തിപൂർവകമായ ആത്മാനന്ദം. അതാകുന്നു ദേവിയുടെ സ്വരൂപം. അവിദ്യകൊണ്ട് ആവരണം ചെയ്തിരിക്കുന്ന ആത്മതത്വത്തെ വിദ്യയുടെ സഹായത്താൽ കണ്ടെത്തുകയാണ് മോക്ഷത്തിനുള്ള വഴി.

ലാസ്യപ്രിയാ = ലാസ്യം, നൃത്തം പ്രിയമായുള്ളവൾ. ആ നടനപ്രിയയായ ദേവിക്കു നമസ്കാരം.

ലാസ്യം = നൃത്തം. ബ്രഹ്മപ്രളയത്തിൽ രുദ്രസ്വരൂപനായ ശിവൻ നൃത്തം വെക്കുന്നതു കണ്ടു കൊണ്ടാടുന്നവൾ എന്നു താല്പര്യം.

ലയകരീ = ധ്യാനാവസ്ഥകളിലൊന്നായ ലയം അനുഷ്ഠിക്കുന്നവളേ.

ലയം - ചിത്താവസ്ഥാവിശേഷത്തെ ചെയ്യുന്നവൾ. താളം നൃത്തം ഗീതം ഇവയുടെ ഏകകാലപരിണാമത്തെ ചെയ്യുന്നവൾ.

ലയമുണ്ടാക്കുന്ന ദേവിക്കു നമസ്കാരം. ലയം = ചിത്തത്തിന്റെ ലീനാവസ്ഥ. പത്തു ധ്യാനങ്ങളും ഒരു ലയവും സമമാണെന്ന് പറയപ്പെടുന്നു. വിഗളിതവേദ്യാന്തരമായ ആനന്ദാനുഭൂതി തന്നെയാണു ലയം. അതിനെ ചെയ്യുന്നവളെന്നു താല്പര്യം. പ്രപഞ്ചത്തെ അവസാനം തന്നിൽ ലയിപ്പിക്കുന്നവളെന്നും അർത്ഥo.

ലജ്ജാ = ലജ്ജാ രൂപത്തില്‍ വസിക്കുന്നവളേ.

ഹ്രീം കാരം എന്ന ബീജാക്ഷരത്തെ കുറിക്കാൻ ലജ്ജാ എന്നപദം മന്ത്ര ശാസ്ത്രത്തിൽ പ്രയോഗിക്കുന്നു. ഹ്രീംകാര രൂപിണീ എന്ന് മന്ത്രാർത്ഥം ലജ്ജാപദ സമാരാദ്ധ്യാ എന്ന് ത്രിശതി.

ലജ്ജയായ് - പാതിവ്രത്യമായ് ഉള്ളവൾ. "കുലജനപ്രഭവസിബി ലജ്ജാ" മാർക്കണ്ഡേയം.

മറ്റൊരു അർത്ഥത്തിൽ ലജ്ജ എന്ന ചിത്തവൃത്തിയുടെ രൂപത്തിലിരിക്കുന്ന ദേവിക്കു നമസ്കാരം. ദേവി സർവ്വഭൂതങ്ങളുടെയും ഉള്ളിൽ ലജ്ജാരൂപേണ സ്ഥിതിചെയ്യുന്നതായി ദേവീമാഹാത്മ്യത്തിൽ പറഞ്ഞിരിക്കുന്നു.

രംഭാദി വന്ദിതാ = രംഭോർവശ്യാദികളാൽ വന്ദിതാ.
രംഭ തുടങ്ങിയുള്ള അപ്സരസ്സുകളാൽ വന്ദിക്കപ്പെടുന്ന -

ദേവിക്കു നമസ്കാരം. അപ്സ്സരസ്ത്രീകൾ ഗീതനൃത്താദികളെകൊണ്ട് ദേവിയെ വന്ദിക്കുന്നവരാണ്. "രംഭാദി " എന്നതിലെ ആദിശബ്ദംകൊണ്ട് ഉർവശി മുതലായവരെകൂടി ഗ്രഹിക്കണം.

🙏🏻🙏🏻🙏🏻