Thread by @janakishivasha2

#తెలుగు_భాష

తెలుగు భాషను మన ఇళ్లలోనే వాడటం మానేశామా?

డోర్ లాక్ చెయ్యకండి..

నేను వెళ్తున్నా డోర్ లాక్ చేస్కో..

నా కార్ కీస్ ఎక్కడ?

ఇందులో 'డోర్', 'లాక్', ‘కీస్’ కు అచ్చ తెలుగు పదాలు వాడొచ్చు. కానీ మనం వాడం..

ఎందుకు ?

ఓ ముప్పై యేళ్ళు వెనక్కి వెళితే,
తలుపు తాళం వేసుకో,

గడియ పెట్టుకో అనే వాళ్ళం..

ఇవేకాదు, చిన్నతనంలో విన్న, వాడిన తెలుగు మాటలు మనమే మర్చిపోతున్నాం.
నిన్న మొన్నటి వరకు మనం మాట్లాడిన మాటలు మన పిల్లల కు నేర్పించాల్సింది పోయి, మనమిలా ఎందుకు మారిపోయాం ?

మన తెలుగులో మాటలు లేవా ?
ఎందుకు లేవు, భేషుగ్గా ఉన్నాయి !
కానీ మనం పలకం.

వంటింటిని... #కిచెన్ చేసాం..
వసారా... #వరండాగా మారింది...
ఇలా #చావడి, #పంౘ, #ముంగిలి, #నట్టిల్లు, #తలవాకిలి, #నడవ, #పెరడు, ఇవన్నీ మరచిపోయాం..

మన ఇళ్ళ కు చుట్టాలు, బంధువులు రావడం మానేసారు. గెస్ట్‌ లే వస్తారు..
ఆ వచ్చిన వాళ్ళు మనింట్లో అన్నం తినరు. ఏ లంచో, డిన్నరో చేస్తారు..

భోజనానికి కూర్చున్నాక కంచాలు పెట్టటం మానేసి ప్లేట్లు పెడుతున్నాం..

అందులో వడ్డించే వన్నీ
రైస్, కర్రీ, గ్రేవీ, ఫ్రై వగైరాలే..
#అన్నం, #కూర, #ఇగురు, #పులుసు, #వేపుడు, #తినండి అంటే, ఇంకేమన్నా ఉందా,  వాళ్ళేమనుకుంటారో అని భయం.

అంగడి (కొట్టు) కి వెళ్ళేటప్పుడు సంచి తీసుకెళ్ళం..

బ్యాగ్ పట్టుకుని షాప్‍ కు వెళ్తున్నాము.

అందులో వెజిటబుల్స్, ఫ్రూట్స్ వేసుకుంటాము. #కూరగాయలు, #పళ్ళు కుళ్ళిపోయున్నాయి గదా మరి.

ఏమండీ మీ మనవరాలికి #కానుపు అయ్యిందా అని ఆ మధ్య ఓ పెద్దావిడను అడిగా. ఏంటమ్మా డెలివరీ అయిందా అనకుండా నువ్వింకా కానుపు అంటావేంటి? అని ఎదురు ప్రశ్న వేసింది.

బిత్తరపోవడం నావంతయింది..

టీ.వీ లో వచ్చే ఆరోగ్య కార్యక్రమాలు,
వంటా – వార్పు కార్యక్రమాలు రోజూ చూసే వాళ్ళ కు అలవోకగా ఆంగ్ల పదాలు పట్టుబడతాయి మరి.
అందుకే ఆవిడ అలా అని ఉండొచ్చు.

తెలుగు టీ.వీ వంటల కార్యక్రమం లో ఒకావిడ మన కు వంటకం ఎలా చెయ్యాలో చెబుతుంది..

అది ఏ భాషో మీరే చెప్పండి..
"కొంచెం సాల్ట్, మిర్చీపౌడర్, ధనియాపౌడర్, జింజర్ గార్లిక్ పేస్ట్ యాడ్‍చేసి ఫైవ్ మినిట్స్ కుక్ చెయ్యలి, స్టౌవ్ ఆఫ్‍ చేసి మసాలా పౌడర్ యాడ్ చేసి బాగా మిక్స్ చెయ్యాలి".

ఇలాసాగుతుంది.
మరి మన కూరల కు #అల్లం, #వెల్లుల్లి, #ఉప్పూ, #కారాల రుచులు ఎలా తగుల్తాయి?

నిన్న మా పక్కింటాయన వచ్చి
"మా సిస్టర్స్ సన్ ది మేరేజ్ ఉందండి, ఊరికి వెళ్తున్నాం, ఇల్లు కాస్త చూస్తుండండి" అని చెప్పి వెళ్ళాడు.
#మేనల్లుడి_పెళ్ళి అనడంలో ఎంత దగ్గరితనం ఉంటుంది ? ఎందుకిలా ముచ్చటైన పదాల్ని వాడటానికి కూడ మనం వెనుకాడుతున్నాం ?

#అమ్మ, #నాన్న అని పిలవడం ఎప్పుడో మానేసాం.

#అత్త, #మామ, #బాబాయ్, #పిన్ని, #పెద్దమ్మ, #పెదనాన్న
అందరూ పోయి ఆంటీ అంకుల్ మిగిలారు. ఇప్పుడు #అక్క, #అన్నా, #బావ, #మరిది, #వదిన, #మరదలు వగైరాలంతా దూరమై కజిన్స్ అయిపోయారు.

పిల్లల్ని #బడికి పంపడం కూడ మానేసాం. స్కూల్‍ కు పంపిస్తాం.

సరే బడికి వెళ్ళాక వాళ్ళకు ఎలాగూ ఇంగ్లీషు లో మాట్లాడక తప్పదు. ఇంటి దగ్గరన్నా తెలుగు మాటలు మాట్లాడాలని అనుకోము.
మనం ఎందుకు నిన్నటి వరకు వాడిన తెలుగు మాటలను వదిలేస్తున్నాం ?

ఎక్కువ ఇంగ్లీషు పదాలు వాడితే మనకు సమాజంలో గౌరవం లభిస్తుంది అనుకుంటున్నామా ?

తెలుగు మాటలు మనకు మొరటుగా ఎందుకనిపిస్తున్నాయి ?
ఇది పరభాషా వ్యామోహం మాత్రమేనా.. ఇంకా ఏమైనాన..
ఒక్క తెలుగు వాళ్ళకే ఇంత వ్యామోహం..

ఇద్దరు తెలుగు వాళ్ళు మాట్లాడుకుంటుంటే పక్కనున్న ఏ పరాయి బాషా వాడికో మొత్తం అర్ధం అయిపోతుంది. ఎందుకంటే మన మాటలలో 90 వంతు ఇంగ్లీష్ పదాలే..

అదే ఏ తమిళులో, మలయాళీలో కన్నడిగులో, మరాఠీలో, మాట్లాడు కుంటే వేరే వాళ్ళకి ఏమి అర్ధం అవదు..

అందుకే మన తెలుగు భాషకు దిక్కులు లేకుండా పోయాయి..

ఇప్పుడు మాత్రం #పల్లెలు, #పట్టణాలు అనే తేడా లేకుండా అందరికీ ఇంగ్లీష్ మాటలు బాగా వంటపట్టాయి. అలాగని వాడుకలో ఉన్నమాటలను వదిలేసి పరభాషా పదాలు

వాడటం వల్ల భాష క్షీణించి పోతుంది.

బయటకెళితే ఎలాగు తప్పదు అనుకున్నా, కనీసం ఇంటి గోడల నడుమైనా ఆపని చేద్దాం. అవసరం లేని ఆంగ్ల పదాలకు డోర్ లాక్ చేసి, అచ్చ తెలుగు మాటలకు #తలుపులు తెరుద్దాం

అర్ధం చేసుకోండి మన తెలుగు ప్రజలారా...

సేకరణ.. శాస్త్రి తనికెళ్ళ..