Thread by @meemainseen

رجب علی دی لاڈلی ماں بولی
ماں بولی دا لاڈلا، بابو رجب علی
ـــ
ہرمن پیارےنےجد رانی تت لکھی تےاوہدی اک نظم ماں بولی دےناں کیتی۔ حورپری پنجابی دیاں صفتاں کردیاں ہرمن جیت نےایہہ وی لکھیا
توں آپنڑیاں نےلُٹی ایں
توں سکیاں نےہی ٹھگی ایں
نی رجب علی دئیےلاڈلیے
توں سبھ نوں چنگی لگی ایں

🧵

ہرمن تے اگے چل ہور وی بڑا کجھ لکھدا اے
جتھے دل دے دکھڑے دیوراں دے
پئی سُنڑدی اےگُت بھابھی دی
گل حور پری پنجابی دی
گل حور پری پنجابی دی

پر کِتے ہور گواچن توں پہلاں آپاں واپس مڑدے ہاں

ماں بولی پنجابی، بابے گورکھ دی کانی، گرونانک تے بابے فرید دی بانی، جنہوں وارث شاہ نے اپنی ہیر تے میاں محمد بخش نے سیف الملوک دے نال سنواریا اے، اوہ رجب علی دی لاڈلی کیویں ہوئی
تے ہرمن ایہنوں جیہدی لاڈلی لکھدا اے اوہ رجب علی ہے کون

چڑھدے پنجاب مالوے دے پنڈ ساہوکے دا کویشری دا سرتاج رجب علی، جنہوں نہر محکمے وچ اوورسیئر دی نوکری کرکے بابو دا لقب ملیا
کویشری پنجابی شاعری دی او صنف جہیڑی اپنے رہا تے طرز کرکے قصے تے واراں نالوں فرق اے۔ نہ کوئی ساز تے نہ کوئی ہور آواز بس کویشری جتھے دی ہاک

اپنی جیون کتھا تے بابو رجب علی نے آپ کویشری وچ ہی دسی اے
ساہوکے دے گواہنڈ بمبیہے پنڈ توں پنج پاس کرکے موگے ٹرگئے تے انٹرنس مگروں رسول وچ اوورسیئر بن کے
ضلعے پشور نہر وچ بھرتی
تے فیر دولت پانی وانگوں ورتی

بابو جی دی نوکری نہروں نہر جتھےکتے لئی گئی انہاں نے گھاٹ گھاٹ دا پانی پی اپنیاں رچناواں وچ رنگلے پنجاب تے پنجاب توں باہر دے انیک شہراں تے پنڈاں دے رنگ پرو دتے۔ رجب علی دی کویشری ورگا سواد کتے ہور نئیں کہ ایہدے ہر اکھر وچوں اپنا سوہنا تے رنگلا پنجاب ڈُلھ ڈُلھ پیندا اے

بیکانیر بوتے، بہولپور مجھاں، ناسک دےپان تےبریلی دےوانس
متھرا دے پیڑےتے روہتک دےمکھانےچنگے
کوئٹےدی خرمانی تےسردے پشوردے
ہینگ چنگی لبھےجاکےکابل قندھارچوں
میرٹھ داگُڑ، امبالےدےامب، نکھیتردی بھنگ تےچاء دہرادون دی
لدھیانےزین، دوآبےدی زمین
بٹھنڈے دی جلیبی جاوے شہد وانگوں کُھردی

دُھنی کیاں دےحسابی لوک، نرُوآنےدےسخی سیٹھ بلّوآنےدے
اگوں عطرسنگھ والےکتیاں دےشکاری
گجراتناں دی ممولہ اکھ، جھنگ لمی دھون تےگول مکھ کشمیرناں دا

ہنر بنگال جیساروپ جھنگ سیال جیسا
کُوڑمہینوال جیسا، جنےکھنےڈھونانئیں
شہرنہیں بھنبھورجیسا، گل سوہنامورجیسا
ہارجانی چورجیساکسےنےپرونانئیں

سنتالی دی ونڈ نےجتھےچڑھدےپنجاب نوں لہندےتوں جداکردتا اوس ویلےدل ساہوکے دفنا اپنا سریر لے کے بابو رجب علی اوکاڑے دے اک پنڈ آوسے۔ لکھن والے دا سُنن والیاں ناں ناتا ٹُٹ جاوے تےکلاکار مر جاؤندا اے۔ کجھ چٹھیاں تے کجھ کویتاواں نے انہاں دی گنڈھ ساہوکے والیاں ناں بنھی رکھی

انہاں دےشاگرداں، جتھےداراں تےساہوکےپنڈوالیاں نےبابورجب علی دےنال اپنےرشتےداحق اداکردتا
پینسٹھ وچ جنگ توں پہلاں جدبابو رجب علی نےساہوکےگیڑالایاتےاپنے دل داروگ کویتا وچ پروکےنال لےگئے

مینوں رکھ لئو نگر میں جی، نگر دے لوکو ہتھاں دیاں واہو
بابو جانڑدیونا ناں، داس دی قبر بنالئو ساہو

سن پینہٹھ دے دناں وچ، ساہوکے جتھے بابوجی داشاندار استقبال ہویا سی اوتھے ہن رجب علی دی یادگار کھڑی اے، تے پنڈ والیاں توں ہٹ کے وی ماں بولی دے وڈے گائیک تے کلاکار بابو رجب علی نوں عزت دیون آندے نیں۔

سجنو تے مترو، کدی کدی بڑا دل کردا اے کہ اک رجب علی ساڈے ضلعے لائلپور وی ہوندا۔ نہری محکمے دا بابو جیہدی ڈیوٹی گوگیرہ برانچ، یافیر رکھ برانچ یا چلو جھنگ برانچ تے ہی لگی ہوندی۔
اواگت بنگلے یا فیر جسو آنے بنگلہ ڈیرہ لگدا تے نال کویشری جتھے
بات پاؤندے ساڈے علاقے دی

دھنوآنے، مکو آنے یا فیر ڈھڈی والے دی، اٹھاٹ دے امرود دے گدرپنڈی دیاں شاہ کالیاں جامناں
ملکی دے ماسٹر، کھڑڑیانوالےدے حکیم تے شاہکوٹ دے منیم چنگے
گاجر مٹھی چورانوے اٹّی دی، تے دہوانا لال سُوہا چھیانوے ماڑی دا
بولے دی جھُگی دیاں نِماں تے گٹ والا دے ’مکوکے‘ چنگے
تے نہر عبداللہ پور دی

پرسوہنیواسیں ہور رجب علی کس منہ نال بھالیے، جدساہوتوں اجڑکےآئےسُچل بابوجی نوں اسیں کوئی مان نہیں دِتا
بابو رجب علی ونڈتوں پہلاں وی ساڈےلہندےپاسےوالیاں لئی اوناں ہی اوپرارہیاجناں اج اے
اوکاڑے بتی چک وچ بابوجی دا بُت ہی رہیا
رجب علی خاں توں روز اڈیک رکھیں
تینوں موت دی آؤنی تار بیبا

اسیں مالوےدے ’وارث شاہ‘ نوں 6 جون 1979 نوں اوکاڑہ چک 32/22L دےقبرستان وچ دب اوہدی یادنوں مٹی وچ رول دتا
ایہہ وڈیو سنہ 2017 دی اے جدوں خیام چوہان نے بابورجب علی دے پتر شمشیرعلی خان دا انٹرویو کیتا سی، ہُن تے اوہ وی بتی بائی ایل دے قبرستان وچ بابو جی دے نال جا ستے

ہُن سوشل میڈیا دی جانکاری کرکے دونویں پاسیاں دا میل جول ودھیا تے بہت لوکیں اوکاڑے بابو رجب علی دے پنڈوی اپڑے
بابو جی دی قبر پکی کرا چھڈی اے پر اوہدے سرہانے کتبہ ہالے وی گرمکھی اکھراں وچ پنڈ ساہوکے دے مہان کوی بابو رجب علی نوں یاد کردا اے

غالباًسنہ 2014 سی جد میں اپنی یونٹ توپخانےدی اک میڈیم رجمنٹ دےریزنگ ڈے تے اوکاڑےاپڑیا۔ دن دی مصروفیت تےرات دیاں رونقاں توں بعد سویرےاوکاڑہ کینٹ توں نکلدے اک واری سوچیاکہ گڈی بابورجب علی دےبتی چک ول موڑاں پرایہہ سوچ کے ٹال گیا کہ ہالے یونٹ ایتھے ای وے، اگلی واری فیر چکر لگ جاؤ گا۔

مینوں نئیں سی پتہ کہ اوکاڑے دا او میرا آخری پھیراسی، یونٹ وی اوتھے رہی اور اوکاڑہ وی قائم پرمیں اپنا سمیان بنھ اک دور دیش دا راہی ہوگیا۔
پر اک دن اوکاڑے پرتنا اے، تے اگے چکنمبر 32/22L وی جانا اے۔ اونہاں گلیاں وچ پھرنا اے جتھےچھاتی وچ درد بھرکے اک کوی کہندا پھردا سی

ایتھے پھردا ہونا اے آپ دا ناں رجب علی لیندا
رہا بے سلاماں نوں، ساہو پنڈ جمیا بتی وچ رہندا
___

Interview with Shamsher Ali Khan, son of Babu Rajab Ali in Chak 32/22L Okara in 2017


Punjabi Leher visit to Babu Rajab Ali

Visit and Interview with Baji Rehana, granddaughter of Babu Rajab Ali by @nasirdhilllon6


Recitation with Master Bachittar Singh Gill on Babu Rajab Ali in Calgary