Thread by @chinnareddy435

వీరగల్లులు

కల్లు అంటే కన్నడంలో రాయి అని అర్థం. వీరగల్లు అంటే వీరుల స్మృత్యర్థం నిలబెట్టిన రాళ్లు. వీటినే ఇంగ్లీష్ లో హీరో స్టోన్స్ అంటారు. సమాజంలో గొప్పవారి జ్ఞాపకార్థం ఇప్పుడు శిలా విగ్రహాలు ఎలా పెడుతున్నారో అలా మరణించిన వారి స్మృతి కోసం చిహ్నాలు నిలబెట్టడం అనాదిగా వస్తోంది.1/n

ఈ వీరగల్లులు దేశంలోని అన్ని ప్రాంతాలలో ఉన్నా, దక్షిణ భారతదేశంలో కర్ణాటక, తమిళనాడు, రాయలసీమ ప్రాంతాల్లో ఎక్కువగా కనిపిస్తాయి రాయలసీమ జిల్లాలలో కూడా చిత్తూరు, కడప జిల్లాలలో అత్యధికంగా వీరగల్లులు కనిపిస్తాయి.
2/n

వీరుల త్యాగం / ధైర్యం / సాహసం / విశ్వాసం / భక్తి వంటి ఉదాత్త గుణాలు భవిష్యత్తు తరాలకు తెలిసే విధంగా ఈ వీరగల్లులు ప్రతిష్టిస్తారు.

యుద్ధంలో వీర మరణం పొందినవారు
దేవుని కోసం ఆత్మార్పణ చేసుకున్నవారు
దొంగలతోనో / బందిపోటులతోనో పోరాడుతూ వీరమరణం పొందినవారు
సతీసహగమనం చేసిన స్త్రీలు
3/n

గ్రామాల మధ్య ఆస్తి /భూవివాదాలలో పోరాడిన వారు
యజమాని / రాజు ధన/మాన/ప్రాణాలు కాపాడిన వారు
వర్షాల కోసమో, చెరువు కట్టను కాపాడుతూనో ప్రాణ త్యాగాలు చేసిన వారు
వన్యమృగాల నుండి /దొంగల నుండి గోసంపద/ పశుసంపద కాపాడుతూ ప్రాణాలు విడిచినవారు
ఇలా ఒక్కో వీరగల్లు ఒక్కో వీరుడి కథ చెబుతుంది
4/n

వీరశైవ మతావలంబికులలో ఈ ఆచారం ఇంకా ఎక్కువగా కనపడుతుంది. శివసాయుజ్యం కోసం ఆత్మార్పణం చేసుకునే సంప్రదాయం వీర శైవుల్లో ఉంది. శ్రీశైలం, పుష్పగిరి, మోపూరు ( నల్లచెర్వు పల్లి) వంటి వీర శైవ క్షేత్రాలు రాయలసీమలో ఉండటం కూడా ఇక్కడ వీరగల్లులు ఎక్కువ ఉండటానికి ఒక కారణం.

5/n

కడప జిల్లాలోని ప్రాచీన శివాలయాల్లో అత్యధికంగా వీరగల్లులున్న ఆలయం పుష్పగిరికాగా, ఆ తరువాత ఎక్కువ వీరగల్లులున్న ఆలయం మోపూరు భైరవేశ్వర ఆలయం. పుష్పగిరి నివృత్తి సంగమం అని,ఇక్కడ ప్రాణాలు విడిస్తే మరుజన్మ ఉండదని శివభక్తులు గట్టిగా నమ్మేవారు. పుష్పగిరిలోని అనేక వీరగల్లులను చూడవచ్చు
6/n

అలాగే నల్లచెర్వు పల్లి లోని మోపూరు భైరవేశ్వర ఆలయం ప్రాంగణంలో కూడా అనేక వీరగల్లులు ఉన్నాయి. వీటిలో అధిక శాతం శివసాయుజ్యం కోసం ఆత్మార్పణ (దేహత్యాగము ) చేసుకునే భంగిమలో ఉన్నాయి ( మెడలో రెండు కత్తులు చొప్పించి / తల నరుక్కుంటూ). కొన్ని వీరగల్లులు మీద శాసనాలు కూడా చెక్కబడ్డాయి.
7/n

ఒక వీరగల్లు మీద శాలివాహక శకం 1283 (క్రీ.షా. 1311) నాటి శాసనం అయోధ్యా ప్రభువైన మహామండలేశ్వర చాళుక్య నారాయణ వేంగీ త్రిభువనమల్ల కుమారుడు అహోబలనాథుడు (అల్లాడనాథ పోతురాజు పెమ్మయ్యదేవ మహారాజు సేవకుడు) మార్జావాడి దేశం పై దండెత్తి ఆ యుద్ధంలో ధారాతీర్థం వద్ద మరణించినాడని చెబుతుంది.
8/n

చాలా మటుకు వీరగల్లులలో వీరులు కత్తి / విల్లు / బాకు పట్టుకున్నట్టుగా చిత్రీకరిస్తారు. అది వారి పోరాటానికి / వీరత్వానికి ప్రతీక. కొన్ని వీరగల్లులలో అశ్వారూఢులైనట్లు, ఇష్ట దైవాన్ని ప్రార్థిస్తున్నట్లు(చాలా వరకు శివలింగం ) చిత్రీకరిస్తారు.
9/n

వీరగల్లులను ఆ వీరుడి కుటుంబ సభ్యులు/బంధువులు కానీ, ఆయా గ్రామస్థులు కానీ, రాజు / యజమాని కానీ ప్రతిష్టించేవారు. కొన్ని వీరగాల్లులకు గుడులు, వాటి నిర్వహణకు మాన్యాలు కూడా ఉండేవి. కాలక్రమంలో ఈ వీరగల్లులు గ్రామదేవతలలో/ జానపద గాథల్లో భాగమయ్యారు.
10/n

వీరగల్లులు నాటి సామజిక జీవితానికి, సంస్కృతికి, మతవిశ్వాసాలకు సజీవ సాక్షాలు. ఈ వీరగల్లులకి చరిత్రలోనే కాక సాహిత్యంలోనూ ప్రధాన పాత్ర ఉంది. ప్రాచీన సాహిత్యం మొదలుకుని ఇటీవల విడుదలైన బండి నారాయణస్వామి రాసిన “శప్త భూమి” నవల వరకు అనేక సాహిత్య ప్రచురణాలలో ఈ వీరగల్లుల ప్రస్తావనుంది
11/n

వీటి చరిత్ర / ప్రాముఖ్యత తెలియక శిథిలావస్థలో ఉన్న ఇటువంటి వీరగల్లుల సమాచారం సేకరించి, వాటిని భవిష్యత్తు తరాల కోసం భద్రపరచవలసిన అవసరం ఎంతైనా ఉంది.
12/12
@ranjanLC @kkmohan73 @tuxnani @bataanilu @MadhvaHistory @GabbarSanghi @BeingMeir @budugodu
#Ravishing_Rayalaseema