بكتب #ثريد عن حياتي كمحاسب له ١٣ سنة بالسوق قد تكون مفيدة لمن يدرس محاسبة او يتخصص محاسبة ؛ او حتى شخص يبي #وعي عن عالم المال والتجارة #منتدى_المحاسبين_السعودي طبعاً بديت حياتي كمحاسب راتبه ٢٨٠٠ ريال وانتهيت بدخل يزيد عن ٨٠ الف ريال شهري وامتلاك اصول ثابته بالملايين.
تخرجت من المحاسبة من جامعة الملك سعود عام ٢٠٠٦م وتقدمت ومعدلي كان مقبول وكلما قدمت على اي جهة قالو معدل منخفض رح الله يرزقك 😅 استمريت ابحث لحدما وجدت مكتب محاسبة في حي العليا بالرياض في فلة قديمة وانا السعودي الوحيد عندهم وراتبي ٢٨٠٠ ريال وقتها استلم راتبي كاش .. يتبع
طبعاً كان يخصم منه مبالغ من المدير المصري وكل مرة حجة ؛ مرة لاني تاخرت ١٠ دقايق خصم ١٥٠ ريال؛ وخصم ٥٠ اضافية في الشهر الثاني لاني ما اكملت الشغل وفقاً للوقت المحدد ولاعمري وين الشغل لان المعاناة انهم مايعطوني اي شغل بس كنت ملقوف اذا سحبو عينات من الحسابات احاول افهم القصة .. يتبع
اكملت ٣ شهور وانا معهى ومعاناتي لا تنتهي من ازمة انه ماحد يعطيني وجه من المحاسبين؛ طبعاً كانت خبراتهم ١٠ و ٢٠ سنة ورواتبهم ٢٥٠٠ 😅 فكنت مشخص براتبي عليهم ابو ٢٨٠٠ ريال ؛ صاحب المكتب متقاعد وكان كبير بالسن ولا كان مركز معهم.. ومرة حصل موقف ازعجني كثير ... يتبع
دخلنا بشهر رمضان وصاحب مكتب #المحاسبة عزمنا على فطور وكان انا والموظفين المحاسبين من مصر ولما دخلنا على العشاء ؛ دخل اخو صاحب المكتب وقال خلاص اترك #العمال يتعشون وتعال معنا 😳 انا محاسب محترم ينقال عن عامل !! زعلت وطلعت ولا حتى احد اعتذر !!
بعذ ما كملت ٤ شهور مع المكتب وانا اعاني من طول ساعات العمل دون عمل حقيقي بس كنت اتعلم بشكل مبسط اتصلت علي شركة سياحية وحضرت المقابلة والحمدلله نسو يسالون عن معدلي( المقبول)واعطوني اختبار عرفت احله من عملي في المكتب جاني المدير وناظر حلي وعطلني قبول فوري 🥳 مادري عن الراتب .. يتبع
.. نسيت اسال عن الراتب ! 🤪 بس وافقت لان الوظيفة مسماها #محاسب وسالوني كم تتوقع ؟ قلت ٣٠٠٠ ريال ! قالو راتبك ٥٥٠٠ !! كان راتب كبير بالنسبة لي اهلني اسدد كل ديوني الشخصية واجمع منه .. واكملت معهم سنة كاملة تعلمت فيها المحاسبة من القيود الى اخراج الميزانيات كنت مستمتع .. يتبع
.. خلال السنة في عملي في الشركة كمحاسب كنت اشعر بنواقص كثيرة عندي اهمها ان ماعندي لغة انجليزية ولا افهم منها شيء ؛ كنت ايضاً اتمنى ادرس #سوكبا من #الهيئة_السعودية_للمحاسبين واحترت هل ادرس لغة اولاً او ادرس سوكبا ؛ حلمي كان لا يتعدى ان اكون CFO في شركة .. اي مدير مالي.. يتبع
بعدما ما اكلمت سنة قدمت السيرة الذاتية كمحاسب خبرة سنة ونصف بدون لغة ولا شهادة مهنية مع اني كنت كاتب السيرة بالانجليزي بس اول شي اقوله ترا مامعي لغة 😅.. جاني اتصال بعدها من #شركة_الكهرب كمراقب مواد ب٦٥٠٠ ريال وبعد اسبوعين جاني اتصال من #مصرف_الراجحي براتب ٧٥٠٠ ريال .. يتبع
.. وجاني اتصال ايضاً من شركة تبيني محاسب عندهم براتب ٧٥٠٠ ريال يعني ٣ عروض بنفس الوقت .. احترت جداً وجلست اكتب في مذكرة شخبطة ميزات وعيوب كل وظيفة ؛ اليوم اقراها وللاسف اغلب افكاري كانت غلط ! مثلاً كنت اقول وش الاريح فيهم! مافكرت احدد وين كل وظيفة بتوديني ( المسار الوظيفي)..يتبع
كان مهم جداً قبل الموافق على الوظيفة ان احدد اي مسار له علاقة بالمحاسبة وراح امشي فيه طول عمري ؟ مهم اعرف وين بروح بس وظيفة وخلاص ؛ ماتوقعت المحاسبة متشعبة ولها فرص مالها حد باعطيكم امثله عليها ( مدير مالي يوصل راتبه ١٥٠ الف ) مدير مخاطر يوصل ١٨٠ الف مدير التزام ١٥٠ الف.. يتبع
.. مدير ضريبة ومدير زكاة مدير ائتمان وغيرها كثير مسارات قوية للمحاسب والمحاسببن اسرع ناس يصلون ليكونون رؤساء تنفيذيين في شركات ويمتلكون حصص في الشركة بالملايين مكافئات وتحفيز.. يقدر يفتح مكتب محاسبي ويعمل مع المحكمة في قضايا يكسب فيها زي المحاسبي يقدر يكون مقيم شركات واصول..يتبع
ويقدر المحاسب يكون مدير محافظ وصناديق ريت ومدير يكون مدير مراجعة خارجية وداخلية وكثير محاسببن رؤساء تنفيذيين ونافذين في مصارف وبنوك وشركات وقطاعات حكومية ووزراء وغيرهم وعلى فكرة ماكان المعدل له اهمية الا في البدايات والا بعد فقط ٣ سنوات بالكثير تصبح الخبرة هل المفصل.. يتبع
ماكنت ادرك على اي اساس اوافق على الوظيفة .. المهم الراتب ووين ؛ لكن مع وجود ٣ عروض وبحكم اني ماحب افوت اي ريحة فرصة قلت اتوظف فيهم كلهم !! وبالفعل اشتغلت بشركة الكهرب مراقب مواد!! وحسيت ان شركة الكهرب هي مكان الابطال فيه المهندسين والمحاسب يصير لفل ثاني بعده !!.. يتبع
لانه قطاع الكهرباء هندسي بحت وليس قطاع مالي اللي يكون فيه المحاسب له دور اهم واكبر بعد اسبوعين كلمت مصرف الراجحي لانه قطاع مالي وقلت ابي اشتغل معكم جيت استقيل من الكهرب واستغرب وانصدم المدير وكان طيب جداً اعتذرت منه بشدة ىقلت غلطتي وقليل تجارب واسمح لي اني ورطتك معي 😅.. يتبع
.. خرجت من شركة الكهرب واتجهت الى مصرف الراجحي في ادراة الائتمان ماكنت اعرف وش يعني ائتمان !! ديون ! قروض ، محصل انا والا ايش!! وش علاقته بالمحاسبة .. كان مسار وظيفي ذهههب ماكنت ادري انه يعتمد عليه البنك في تحقيق ارباح توصل الى ١٠ مليار ؛ وظيفتهم يحللون الشركات قب القرض يتبع..
ويدرسون البنوك الشركة كانها شركة ابوهم قبل التمويل كل المؤشرات المالية اللي تخطر في بالك ممكن يستخدمونا في تحليلهم من الربحية ؛ السيولة التغطية.الخ- وهذا عمل كل البنوك مافي تمويل الا بتحليل كامل ومن يحلل ، فئة كبيرة منهم محاسبين لانهم يعرفون يقرون القصة خلف القوائم المالية يتبع..
كان مسار وظيفي مميز ؛ الى اليوم مادم اني طلعت منه ؛ طبعاً جيت المصرف اليوم الاول تعرفت على صديق لي قديم ايام الجامعة وكان الله يهديه سبب في انحراف المسار الوظيفي حقي 😂 هذا الرجل اقنعني استقيل ولسبب تافه .. يتبع
..كان السبب اللي اقنعني فيه استقيل من #مصرف_الراجحي تافه جداً ؛ السبب ان المدير ما اعجبه! وانه ضعيف شخصية وبيتعبك بانه كل مرة يرسلك لشخص يقول تعلم منه!! طبعاً كان المدير حريص جداً انه يخلينا نتعلم من جميع الاقسام بس لضعف خبرتنا.. يتبع
..ما ادركنا وش يعني اول ما تتوظف تجلس مع زملاءك حولك وتتعلم منهم حتى تفهم اجراءات العمل كلها ؛ وهنا انت مؤهل تمسك منصب اكبر لانك فهمت علاقة كل قسم بالاخر؛ ..اتذكر وقتها الصباح باشرت في المصرف الظهر تغديت مع الموظفين هذا وقبل نهاية اليوم قدمت استقالتي للمدير !!😅.. يتبع
في نفس الوقت كنت مقدم على قطاع شبه حكومي مالي وفيه محاسبين وماليين واقتصاديين ومعروف هذا القطاع بالتدريب والابتعاث ، ومنها فرصة يحقق لي هدف تعلم اللغة وايضاً الشهادة المهنية.. كنت متحمس اتوظف فيه، ورحت اول مرة ومعي اوراقي ودخلت على ادارة الHR وكنت ادور من اعطي اوراقي الاوراق
لقيت شخص متجمعين عليه ناس رحت لهم وحاولت افهم صار ياخذ CV بس يسال اول كم معدلك !؟ جاوب واحد معدلي ( جيد مرتفع) رد عليه : مانقبل اقل من جيد جداً !! وانا معدلي ( المقبول) وش اسوي فيه 😅قررت ما امشي وسلمت اوراقي لعله ما يكشفني وسالني: كم معدلك؟قلت ارجوك ارفع اوراقي وخلها تروح..يتبع
قلت لموظف الHR ؛ قد انجح بالمقابله بغض النظر عن المعدل واكون مناسب لكم ورفض !! طبعاً طلعت ولكن ماخرجت من القطاع رحت ادور داخل الادارات واحاول اقدم على المدراء وطبعاً رفضو الا ادارة وافق يعمل لي مقابلة شخصية وللاسف رفضت منها ولا اعرف هي كانت رسمية والا عشان يصرفني !! .. يتبع
.. جلست فترة محبط ماعرف وين اروح ؛ هل ادور على مكاتب مراجعة او شركات او قطاعات حكومية؛ هذي الفترة ماكنت موظف باي شي والوقت يمشي وكنت نادم على الاستقالة؛ وقدمت على شركات المراجعة الBig4 واتصل عليهم وللاسف يرفضون بحكم اني غير مؤهل !! بسبب اللغة رغم انه كان يعج ىالباكستانيين ..يتبع
في فترة ٢٠٠٨ ماكان فيه ضغط زي اليوم بالسعودة ولذلك كان فيه رفض من الشركات وكنت مقهور ؛ ليش الباكستاني او الهندي بنفس عمري ذاك الوقت ٢٣ سنة ؛ ولاقي وظيفته في شركات المحاسبة الBig4 وطبعا اكيد لغته بسيطة لكن يعلمونه ابناء جلدته كل المهارات ليكون مستشار علينا بعدين !!
.. مرة كنت خارج من البيت واتصل بي صديق نجتمع معهم وطبعا ما انسى ذاك الكبري اللي اجتمعنا تحته 😅 وكل واحد يشكي همه او يقول انجازاته ومغامراته .. قلت لهم قصتي مع القطاع الحكومي اللي اتمناه ولا قبلوني؛جاوبني صديق لي : ترا يدورون محاسبين رح قدم عليهم ثانيه ورح لم ادارة (كذا) .يتبع
بالفعل اخذت ورقة وحده الCV مطبوعة ورحت اقدم عند هذي الادارة - وسالت عن المدير اللي ذكره لي صاحبي قالو: غير موجود !! لقيت مدير اخر اسمه عبدالعزيز عطيته اوراقي ، ناظر في عيني قال وين ملفك ! قلت اي ملف طال عمرك؛ قال الاخضر!!! - قلت مامعي ملف اخضر بس اذا تبيه جبت لك واحد😅.. يتبع
كنا على نهايات فكرة الملفات الخضر وبدايات استخدام الايميلات لارسال الCV فاستغربت من طلب المدير؛ رفضني طبعا حتى بدون ما يسال عن المعدل .. واتصلت بصاحبي قلت وين تقول يدورون محاسبين؟قال لازم تقابل مسؤول التوظيف في الادارة وليس المدير ؛ سالت عن موعد تواجد مسؤل التوظيف..يتبع
اليوم التالي حضرت ولقيت مسؤول التوظيف في رحب بي وطلب الCV وكنت اطلب ربي مايشوف المعدل الجميل (مقبول) ! وللاسف شافه ؛ قال قطاعنا ما يقبل اقل من جيدجداً ؛قلت:ممكن تختبرني وتشوف قد اكون افضل منهم؛راقت له الفكرة ؛وبدا يسال عن المحاسبة وكنت اجيبه كان يسال عن معالجة المدينين..يتبع
علمته التفاصيل قيود التخصيص والاعدام وكيف نعكس الاعدام في حال استلام المبلغ فصلت له بطرق التخصيص نسبة من المبيعات او المدينين ..انبهر وقال شوف ما اضمن لك قبولك بس شخصياً بعرض موضوعك على معالية ليقبلك معنا بشكل استثنائي .. يتبع
بالفعل جاني اتصال بعد اسبوع وطلبوا مني مقابله اخرى ..مع مدير عام ؛ وطبعا حصل موقف مهم؛ بعدما جيت لحضور المقابله الثاني جلسوني بالانتظار قرابة ال٣ ساعات لدرجة قررت امشي، وقبل امشي وافاني احد زملاي بالدراسة بالصدفة وسالني هل توظفت معنا قلت لسا مقابله ولي ٣ ساعات وشكلي بامشي!.. يتبع
قال صديقي: "خل صدرك شمالي" يعني لا تعصب واجلس واصبر لانهم يختبرون صبرك واصرارك، رجعت مباشرة الى الانتظار وانتظرت ، طبعاً لو مشيت كان ما وصلت اللي اليوم وصلته ؛ فاعتبر صدفة لقائي به رزق ونعمه.. نادوني للمقابله ..يتبع
سالني المدير العام في المقابله اسئلة الكن اسهل من المقابله الاولى كان مركز على الشخصية ( attitude ) وهو جانب ادركت بعدين انه مهم بدرجة مثل المعدل او اكثر ؛ ماحد يبي يوظف واحد نفسيه صراحة ؛ حتى لو كان معدله زين وشغله زين؛ انتهت المقابله وكانه يلمح انه يبيني معهم .. يتبع
بعد اسبوع جاني اتصال بقبول اوراقي وتم توظيفي في هذا القطاع المميز واللي كان احد اسباب نجاحي الحمدلله .رغم ان معدلي مقبول .. كان هذا اكبر عامل للنجاح وباشرحه بعدين .. راتبي كان ٧٥٠٠ ريال قطاع شبه حكومي والمهم عندهم ابتعاث ولغة .. يتبع لاحقاً بشرح وش تغير ايضاً بعد الوظيفة
وظيفتي في هذه الجهة اللي كنت احلم بها كانت بالنسبة لي اخر الاحلام؛ شرحو لي نظامهم يعلموني لغة ويبتعثوني وكنت في قمة فرحتي وشعور بالنصر في داخلي وراتبي كنت اعتبره حلو ٧٥٠٠ وبيزيد خلاص وش باقي!؟ تعب السنوات في الدراسة كلها تحقق والان جا وقت الراحة ، حتى التطوير باخذه بالراحة ..يتبع
بس يوم باشرت ماكتملت سعادتي صار شي؛ جلست انتظر يجي شغل زي ماتعودت يوم كنت محاسب بالشركة ؛ ولا جاني شي!! ورحت المدير طلبت شغل قال: خلك الان بنفكر كيف ندخلك بالشغل!!! حتى الموظفين في قسمي او صفة مكاتبنا شلة وحده وشكلهم مايبون احد دخيل عليهم ؛ اجلس ٨ ساعات لا شغل ولا حتى احد يسولف
كملت اسبوعين بهذا الوضع حسيت الوقت يمشي بشكل يطفش؛وحتى الشغل كان ماله علاقة بالمحاسبة بس له علاقة بال ##وعي المالي؛كنا نشتغل على قضايا متعثرين بسبب قروض او بطاقات ائتمانية اشخاص او شركات؛ طبعاً ماكنت اشتغل كنت اتفرج بس على اللي يشتغلون 😅 وهذا اسوأ كابوس اعيشه ؛ كملت اسبوعين ...
وحتى اقتل هذا الطفش بالعمل شريت كتاب؛كان في بالي اي كتاب؛لكن هذا الكتاب هو التغيير الكبير اللي احدثه بحياتي ؛ غير نظرتي حتى في مفاهيم المحاسبة علمني امور ماليه وحسابات وقياسات محاسبيه لا تدرس بالجامعات اسم الكتاب ( الاب الغني والاب الفقير) مؤلف الكتاب تاجر ويشرح نظرياته المحاسبيه 
الحمدلله بيئة العمل المطفشة هي اللي خلتني اقرا هذا الكتاب وقت الدوام لحد ما يجيني شغل؛ وبالفعل قريت اهم واقوى نظريات المؤلف بالمحاسبة وطبعاً لا توافق معايير المحاسبة لكنها مهمة لمن يريد صناعة ثروة بختصرها بقولها بكم تغريدة قادمه ؛ لكن هو اللي جاوبني على اسئلة في بالي تتكرر علي.🤔
الكتاب جاوبني على: ليش ما يكون اغنى الناس هم المحاسبين؟! وليش بعض دكاترة الاقتصاد مايزال مستاجر بيته؟و في المقابل بعض خريجين الثانوي رجل اعمال اسس نفسه من الصفر !!ليش التعليم الاكاديمي ما يطلعني تاجر !؟وظفني صح؛ بس ما علمني كيف املك حصص في شركة او اسس بزنس؟ اسئلة كثيرة جاوبها لي
يفترض الكاتب ان والده المتعلم ( ابوه الحقيقي) ياخذ دخله من عمله يعني دخله واحد بس ويحتاج كل وقته عشان يتحقق دخله وتجيه فلوس بينما نفقاته تقريباً تساوي دخله يعني يخلص راتبه كله على نفقاته مع نهاية الشهر وتلاقي فوقها عليه قرض للزواج او غيره يعني عليه خصوم ولا عنده اصول ودخله واحد
بينما ابوه الغير متعلم( صديق ابوه) ماكمل ثانوي عنده عمود كبير من الاصول الثابته اللي تعطيه دخل مثل العماير والعقارات او محلات او تطبيق او اي اصل ثابت ومدر للتدفقات النقدية ؛ عود الاصول كبير وعمود الخصوم صغير وهذا يخلي يجي اكثر من مصدر دخل لان الاصول تعطيه فلوس .. يتبع
ما اخفيكم هذا الكتاب لعب براسي وقريته قبل ١٢ سنة من الان ولليوم اقرا في باقي مؤلفات الكاتب وبطرح كل افكاره هنا لانها فعلاً اثرت بحياتي .. طبعاً كمحاسب عندك فرصة اكبر تفهم هذي النظريات لانها عميقة وتحتاج تأمل كثير ؛ وفيه بعضها تخالف نظريات المحاسبه بس مايخالف دامها تحط في جيبك 😂.
خلني باشرح كيف تغيرت حياتي .. طبعاً خليت الكتاب وباقيه افكاره براسي ولعلي نسيت مع الوقت .. ورحت زي اي شاب قرر يستقل بحياته يتزوج وياخذ سكن مستقل له ؛ بديت اقول اول شي احتاج استاجر شقة ب٢٥ الف وسيارتي المتهالكة لازم اغيرها واخذ كامري اقساط ب١١٠٠ شهري غير قرض الزواج ..
باقي باشتري اثاث وبسافر كل سنة كل هذا على راتبي ال٧٥٠٠ ريال احسبوها معي يصير اجمالي الخصوم الشهرية حدود ٥٠٠٠ الف ريال مقابل ايرادات شهرية ٧٥٠٠ ريال - قلت كيف ادخر؟!( مع اني ضد الادخار وبشرح لكم ليش لاحقاً)اتذكر رحت البنك الفرنسي اشرح له كم المبلغ اللي ابيه وقفت معي على اني ..يتبع
قلت للبنك ابي قرض على ٥ سنوات + تمويل سيارة + فيزا طبعا صار اجمالي القرض اللي باخذه بيعطيني قيمة المهر + السيارة + الاثاث بس باقي قيمة ايجار ٦ شهور دفعة وحده ماتغطيها !! وصرت افكر كيف اغطيها !؟ وصوت ادور بين مكاتب العقار ادور احد يقبل الدفع الشهري بدل الدفعة الكاملة..
دخلت على مكتب وكان يجري اتصالاته يحاول يقنع اي مالك يقبل بالدفع الشهري؛وفيه واحد قال تراه ممكن يقبل تعال نقابله وفعلاً رحنا نشوف العمارة وطلعنا نشوف الشقة وللمالك ينتظرنا عندها؛ كانت ١٠٠ متر وجديدة واعجبتني مرة 😅 لكن لفت نظري شي خلاني اتامل كثير اللي هو المالك
المالك توه عمرها ما يوصل ٣٥ ويملك العمارة فيها ٢٠ شقة؛ زي الشقة اللي راح ادفع فيها ثلث راتبي عشان اقدر استاجرها سنة وحده بس !! كيف قدر يحصلها ؛ انا درست محاسبه والمفروض اعرف خراجي واعرف كيف ادير اموري المالية ! حسيت هنا في خطتي شي غلط وممكن تكون بداياتي تدخلني بمشاكل مالية ..
تذكرت نظريات الكاتب المحاسبية واهم نظرية ؛ ( عظم اصولك ) ( الاصول هي فقط التي تدر لك اموال) الاصل يعني فقط اللي يحط بجيبك وبالمحاسبه يعرفون الاصل اي شي تشتريه ويحقق لك منفعه ممتدة لسنوات ..المحاسبه تنظر لاي منفعة بس؛ كشخص لا تنظر لاي منفعة من الاصل غير انه يعطيك فلوس يعني باختصار
لا تنظر للبيت انه اصل لاني مايعطي دخل ؛ لكن الاصل اعتبره الفكرة التجارية او المحل التجاري او العقار المؤجر او حصة بشركة تعطي ارباح او حتى شهادتك المهنية اللي غيرت حياتك كلها وصار عندك فرصة تفتح مكتب محاسبي او شركة مالية اى ختى يتضاعف دخلك بشكل يغطي كل نفقاتك وخصومك...
غيرت الخطة ؛ ماراح اخذ قرض للزواج او الايجار او حتى اغير سيارتي ؛ قررت ابحث عن اصول اشتري اصول مدرة لاموال وصرت يومياً ادور على المكاتب اسال عن العقارات وكانت شقق التمليك في بداياتها وكنت ازور مكتب عقاري صاحبه طيب وشباب ونسولف انا وياه واشرح له النظريات هذي وتحمس له وعنده اصول ..
كان الشاب صاحب المكتب حتى ماكمل الثانوي بس فهم فكرة الامتلاك للاصول وتكثير مصادر الدخل قبل حتى اشرحها له كانت في راسه من زمان تعلمها من ابوه ؛ اتصالات تجيه ويعطي سومة للشراء بالملايين ويتخذ قرارها في دقيقة بينما انا دراسات وعبيت صفحات اكسل عشان اخذ قرض ب١٠٠ الف 😅
بدات بعدها اساله هل في مجال اسوق معك بعض العقارات؛ بالفعل عطاني عقارات وبدات في التسويق لها وابشركم مابعت ولا وحده باختصار كنت ارسل الزباين للعقار ويتصلون على صاحب المكتب ويخلصون معه وانا برى السالفة؛ لكن شعرت نفسي في الموضوع بنجح خصوصاً اني افهم لغة الارقام واقدر اقنع المستثمرين
اقنعهم بشراء العماير واعطيهم عوائدها المتوقعه وحتى لو نقصه مبلغ كيف ان قرض البنك راح يغطيه لان تكلفة الفائدة مثلاً ٢٪ بينما يعطيك العقار ٧٪ يعني ربح سنوي ب٥٪ ؛ اشرح لهم ايضاً الاستهلاك للمبنى على ٢٠ سنة ويحتاج يخصص وكم يخصص حتى يتجدد له الاستمثار ولا يعتبر كامل الايجار = ارباح..
لازم يسوي مخصصات استهلاك سنوية للمبنى حتى يقدر منها يجدد البناء او يغير المبنى كامل ؛ لغة الارقام مقنعة وزادها خبرتي بعملي الجديد المعتمدة على فهم الائتمان والتمويل وكيف يستخدم التمويل في النمو السريع بدل الاعتماد على راس المال فقط.. هذا النجاح البسيط في اقناع العملاء
حتى وان كان العملاء يخلصون مع المكتب ولا يجيني ريال؛ كان هو اكتشافي لذاتي ان لغة الارقام والنظرة المحاسبية للامور تعطيك فرصة اقوى في ادارة مالك او حتى تعطي نصايح للاخرين في ادارة المال ؛ ويكون صوتك مقنع في نصايحك للتجار اضف على ذلك اهمية فهم الجانب الذي لايدرس في الجامعات
هو ماعند اصحاب رؤوس الاموال اسميه علم الاستثمار والتجارة وهو اقتناء مصادر دخل متعددة .. بعدها قررت افتح مكتب عقار ؛ طبعاً بحكم وظيفتي فما اقدر افتح شي باسمي باستعنت بعد الله بصديق موظف قطاع خاص ليكون باسمه ونشتغل معاً فيه ؛ واتذكر موقف جميل ما انساه ؛ كان العامل يرحب لوحة المكتب
وكنت ارشدة لها اول ما ثبت اللوحة بيده بس عشان يعرف يوزنها للتركيب ؛ وقف شخص وسلم علي وقال: عندك عقار للبيع ؟ ناظرته بكل حب🥰 اول زبون لي بحياتي انت 😂 طبعا اخذت رقمه ووعدته ارد لان ماعندي معلومة ولا عقار ! .. كلفنا المكتب ٨٠٠٠ ريال راس المال المدفوع لكل شريك٤ الاف ريال 😅
تحقق لي ان فتحت المكتب وجلست فيه واناظر الناس تمر علي يومياً يتعطوني طلباتهم بشراء العقار وصرت ابحث عن عروضهم واسال لهم لكن ماعندي عروض كاني فتحت محل بدون بضاعة ؛ جاني شخص كبير بالسن وكان ينتظر دوره ؛ وهذا الرجل بلحية بيضاء وجهه بشوش ومبتسم ويوم جا عندي قال لو سمحت طلب قلت امر
قال انا ابني قدامك العماير واحتاج كهرب من مكتبك وكانت عبارة عن ٨ عماير في كل عمارة ٣٠ شقة ؛ قلت ابشر ونادى عامله الكهربائي وبدا يشتغل بالطبلون ويشبك الكهرب للعماير اللي يبنيها ؛ وبعد يومين ضرب الكهرب وشبت نار صغيرة طفت من نفسها بس احرقت الجدار وصار اسود ومشوه شكله 😅
وصرت اكلم الجيران الين شبكت له الكهرب بجارنا ؛ صار متهاوش معه وانا مادريت ؛ جاني الشايب صاحب العمارة وشكرني وصار يجلس يتقهوى معي هو دكتواه في الاحصاء من امريكا ويفهم لغة الارقام بل يصحح لي في طرق حساب العوائد على الاستثمار كان مستقيل من الجامعة كمحاضر واصبح يشتغل بالعقار ..
قلت يادكتور الناس تجيني تطلب عقارات وانا فاتح مكتبي ماعرف ولا صاحب عقار😅 قال عندي عمارة كبيرة على وشك تنتهي سوقها لي ، فرحت جداً وعطاني المخطط واعلنت عنها وصارت تجيني اتصالات ؛ صرت اشرح لهم العائد المتوقع في حال التاجير والتمويل المتاح وتكلفة التمويل وكل شي اشرحه بدقة حتى القسط.
القسط الشهري والفائدة منه وكيف يحقق منها دخل شهري اذا يستلم ايجاره كل ٦ شهور مقدما ويدفع اقساطها شهري ؛ حاني ضابط كان مستثمر واشترى ٥ شقق دفعة وحده بقيمة مليون و٦٠٠ الف وكانت عمولتي في اول صفقة ٤٠ الف ريال اي بعدما اكملت ٣ اسابيع بالمكتب فقط كانت بالنسبة خطوة هااامة
اقتنع الرجل بسبب شرحي له لفكرتين الاولى العائد على الاستثمار = الايجار /تكلفة الحصول على العقار + مكاسب ارتفاع قيمة العقار وهذا يعني ان اصوله راح ترتفع تدريجياً مع ارتفاع العقار اضافة الى العوئد اللي بيحققها من الايجار .. طبعاً هو ماخذها بتمويل يعني بيكون وضعه المالي بعد الشراء:.
التمويل : مليون و٦٠٠ الف والفائدة المدفوعة سنوياً : ٨٠ الف ريال والايجار المحصل من ال٥ شقق ١٨٠ الف ريال ( كل شقة ٣٥ الف) يعني صافي ربح سنوي ١٠٠ الف للمعلومية هالمرة ماحسبت له مخصص استهلاك لاني خليتها offsets مع حسبتي للارتفاع قيمة العقار وكلها امور تترك للتقدير وفقاً للمحاسبه..
كانت صفقة مربحة له لانه استطاع يمتلك اصول مدرة لدخل جديد بحياته ؛ مربحة لي لاني حصلت على عمولة مجزية ومربحة للمالك الدكتور لانه طور وانتج براس ماله .. والكل استفاد حتى عامل المقاولات السوري اللي تغرب ليجد عمل .. كنت انظر لها بنظرة
كنت ابيع في هذي العمارة بشكل سريع واغلب المشترين مستمثرين يرغبون التاجير كانت لغة الارقام مقنعة جداً مع نهاية السنة اكملت جمع ١٢٠الف ريال من هذي العمارة فقط .. باقي شقة صغيرة طلبتها من الدكتور اشتريها بدفعه ١٢٠ الف والباقي باخذه تمويل كان سعرها ١٤٥ الف ريال مساحتها ٧٥ م..
وافق على البيع لانه اصبح يثق بي كتب لي عقد البيع انه استلم كل المبلغ قال باقي عليك ٥٥ الف لك ٦ شهور؛ وافقت وكان الخير الوحيد لي للسداد ان اقترض لكن كنت طماع لاني شفت شقة اخرى وقلت اريدها ايضاً 😂 قمت بعرض الشقة التي لم اكمل سدادها ب١٨٥ الف ريال ولكن طال العرض وماجاني احد خفضتها
خفضت السعر الى ١٦٥ الف ريال ؛ وجاني اتصال من سيدة قالت اريد شراءها قلت بكم قالت خلاص باللي عرضته ؛ وافقت ؛ وجت المكتب وعطتني شيك ب١٨٥ الف ريال استغربت قال هذا عرضك وقبلت فيه ؛ قلت لا خفضته الى ١٦٥ الف قالت طيب والسعي !! اي العمولة قلت انا المالك لا يوجد عمولة ! قالت اذاً
خلها بيننا ب١٧٥ الف ريال وافقت وانا مبسوط وهي مبسوطة جدا انها حصلت على التخفيض ؛ جيت اسدد الدكتور قال ؛ اعرفك تريد الشقة الكبيرة ١٤٠ م وابيعك ب٢٧٥ الف يعني عطني ال٥٥ الف الدين السابق وسددني المتبقي ١٧٥ الف وبالفعل اقترضت وسددته ؛ ودخلت الشقة غير مصدق مساحتها كبيرة اشتريتها كاش
ماكنت اصدق قبل ٧ شهور كنت بقترض لسداد ايجار ٦ شهور اليوم ادخل هذه الشقة بحي حطين بالرياض وانا مشتريها نقداً وعمري وقتها ٢٤ سنة ؛ مباشرة عملت عليها ديكورات ب٢٥ الف ريال يعني تكلف الاصل٣٠٠ الف ريال عرضتها للتاجير وتاجرت ب٣٠ الف ريال ( اي ١٠٪ من قيمتها) .. تحقق لي حلم ماكنت اصدقه .
ماكان الامر سهل ان تسجل شقة باسمي وانا استلم منها ايجار سنوي ؛ طبعاً كانت وقتها العقار في تزايد وكان حطين حي غير معروف وغير مرتفع سعره ؛ خلوني اقولكم وش صار بمجرد القيام بهذي الخطوة ؛ الدخل صار دخلين عندي راتب+ عقار ؛ تخيل معي قائمة دخلي كيف صارت الراتب ٧٥٠٠ + العقار ٢٥٠٠ ..
كيف صار المركز المالي ؛ اصول ب٣٠٠ الف وخصوم بقيمة القرض ١٧٥ الف والدخل الشهري صار ١٠ الاف ريال (٧٥٠٠+٢٥٠٠) وهي نقطة البداية لحتى ماوصلت الى الدخل ٨٠ الف ريال شهري ولكن ليس من الراتب فقط وانما ٥٠ الف ريال دخل عوائد استثمارات+ ٣٠ الف ريال راتب وراح اكمل الشرح بالتفصيل كيف التطور ..
طبعاً حتى الراتب يحتاج تطوير حتى يرتفع تحتاج تطور مهاراتك وهذي اهمها للمحاسب : ١- اللغة الانجليزية : لازم لغتك قوية وتكتب تقاريرك باللغتين وتتواصل باللغة الانجليزية مع الاجانب وايضاً لو حضرت مؤتمر خارجي بتكون متحدث لبق وبمجرد لن لغتك قوية راح تلاقي فرص قوية قدامك بدون اللغة بتخسر
بتخسر فرص كثيرة مهما كنت ذكي ومجتهد ومتعب نفسك في النهاية بدون لغة بيفوت عليك فرص كثيرة وخصوصا والمملكة جالسه تنفتح على العالم والاجانب يكثرون .. ٢- لا تفوت الشهادات المهنية #socpa او #ضريبة_القيمة_المضافة او #CPA ادرسها علطول وكل يوم بمجرد انك تقرا تتطور وتفرق نفسك
وما اخفيكم كانت غلطتي في ذيك السنة اني توقفت عن التطوير العلمي لاتنسون وقتها لا لغة ولامهنية؛المهم عرضت الشقة المؤجرة للبيع على اساس العائد اي ان المشتري سيتخذ قرار الشراء بناءً على الاجار اللي بيحصله ؛تذكرون يالمحاسبين خذنا عن التقييم Fare Value Measurements بمعنى ان يقيم العقار
.. يقيم العقار طرق اما ان يكون سعر التكلفة او القيمة او على اساس العائد وبحكم ان العقار اسعاره متذبذبه كانت فرصتي استخدم اسلوب التسعير بناءً على العائد سياخذ عائد ٧٪ من قيمة سعر البيع يعني على اساس ماياخذه ال٣٠الف اجار بحدد له سعر البيع صار السعر ٤٢٥ الف بناءً على ال٧٪ وفعلاً
وفعلاً كتبت اعلان عقار يعطي عائد ٧٪ شمال الرياض وحي واعد ؛ وبالفعل اسبوع وتم البيع .. حصلت المبلغ وتقدمت مباشرة بشراء شقة اخرى بنفس الحي حطين ب٤٥٠ الف ريال مساحة ١٨٥ متر دورين ولكن هذي المرة قررت اثثها بالكامل واقوم بتاجيرها ؛وتاجرت الحمدلله ب٥٠ الف ريال ؛ التكلفة ٥٠٠ العائد ٥٠
يعني ١٠ ٪ مرة اخرى وكنت دخلت السنة الثانية لي بالوظيفة وسنتي الاولى بالعقار؛ صارت الاصول ٤٥٠ الف والخصوم ( تذكرون قرضي ١٧٥ الف) والدخل من العقار ٤١٦٠ ريال والوظيفة ٧٥٠٠ يعني وصلت ١١٦٦٠ ريال شهري .. عرضتها ايضاً للبيع على اساس ال٧٪ وبنفس الطريقة استخدام اسلوب التقييم على العائد
يعني قيمة العقار المبني على العائد هي ٦٤٥ الف ريال تقريباً ؛ للمعلومية تم بيعها ب٧٠٠ الف ريال وكانت هذي اخر مرة ابيع فيها شقة كعقار لان وقتها اكملت سنتين ووصل دوري بالابتعاث ؛ كنت في قمة حيرتي بين اركز على العمل التجاري او التعليم والتطوير ؟ ترددت كثير لكن اتخذت القرار بالابتعاث
قبل اتكلم عن الابتعاث فيه مواقف حصلت ؛ اولها بعدما شريت الشقة اللي ب٤٥٠ الف وقبل بيعي لها كان رصيدي البنكي صفر بل سالب بالقرض يعني ادارة السيولة عندي مضروبه 😅 وهذا خطأ تعلمت منه ضروري يكون عندك( اصول متداولة) او نقد high liquid assets تقدر تسيله في اقل من ٩٠يوم هذا المفهوم نسيته
رغم انه ضمن مفاهيم المحاسبة بس للاسف ماطبقته ذاك الوقت ؛ واليوم حرفياً امشي عليه ضرورة تواجد سيولة كافية ؛ وكثير من الاعمال التجارية الناجحة في نموذجها تفشل بسبب سوء ادارة السيولة ؛ المهم هذا سبب لي بكارثة شخصية مالية لكن ربي نجاني منها ..
الكارثة هي جتني فجأة حاجة للنقد لان سيارتي تذكرونها الدردعه من ايام الجامعة وهي معي النترا قديمة ومكسره وماكلة لها كم حادث 😅 وصارت تتوقف ولا اقدر اخذ قرض شخصي لان علي ولافي حل الا التاجير التمويلي وهذا نصيحتي انحاشو عنه اعلمكم ليه التاجير التمويلي كارثة مالية عليك ..
التاجير التمويلي هو انك تستاجر سيارة من شركة بفائدة + تامين شامل مجبر عليه وهم المأمنين والمؤمن لهم يعني لو صار حادث ترجعه لهم وعلى حسابك تنطق بدون سيارة الين يخلصون اصلاحها وانت تدفع القسط لهم هم كسبانين ٢٠٠٪ وانت خسران كل شي طبعاً كم الفائدة !؟ المتوسط يصل الى١٠٪ والاسواء
ان السيارة تسجل باسم الشركة يعني حتى لو تبي تسافر لازم ترجع لهم وتاخذ ورقة ؛ مادري ادا تغير الوضع الان بس التاجير التمويلي منتج من وجهة نظري سيء ؛ طبعا اظطريت لها وكنت باخذ سيارة كامري وباقي بس الدفعة ووعدت الشركة اوفرها بعد نهاية الاسبوع ولكن صار شي غير
يوم الجمعة جاني اتصال من رجل يشتري ويبيع في العماير وكان يبي عمارة صاحبها كبير بالسن ؛ ولكن كلما تكلم مع مكتب قالو المكاتب ليست للبيع ولافهم السبب ؛ طبعاً لحسن حظي ان في المكتب يتكي عندي رجل طاعن بالسن وفاضي ويجي ليسولف ويتقهوى ويعيد سواليفه اللي حفظتها 😅 لكن ماتوقعت بيرزقني
بيرزقني الله من ورا هالشايب ؛ جيت المكتب يوم الجمعة العصر والاقيه سابقني ومقهويه العامل كالعادة وقلت له قصة اللي يبي يشتري العمارةوبحكم معرفة الشايب بسكان الحي وشيبانهم قال مشينا نكلم صاحب العمارة وبالفعل طلعنا مباشرة وقلطنا عنده وبدون مواعيد؛طق الباب ودخلنا ؛ متفاهمين الشيبان 😅
اتصلت على صاحبي اللي يرغب بشراء العمارة وكان معي دفاتر عقود بيع وحضر وكتبت عقد البيع وتم البيع في المحكمة في يوم الاحد ؛ كان قيمة العمارة ٣ مليون وعمولتها المفروض ٧٥ الف لكن سلمني ٨٥ الف مكافئة لي واستلم الشايب مكافئة اخرى من المشتري ب١٥ الف للمعلومية قيمة العمارة اليوم ٥ مليون
اخذت هذا المبلغ واشتريت سيارة اخيراً نقداً وبدون قروض وتخلصت من سيارتي الخردة .. جا الابتعاث بعد شراءي للسيارة ب٦ شهور فبعتها بالتقسيط على احد اصدقائي لكن بنفس السعر الذي اشتريته به يعني ماخسرت شي ؛ للمعلومية بعدما بعت الشقة وقبل الخروج للابتعاث طبقت نظرية مهمة
تعلمتها من احد تجار العقار وهي اذا بغيت تشتري عقار للاستثمار ومتردد بين منطقتين اوجد لك شريك واشتر عقار في مكان وعقار في مكان اخر واكتب الصك باسمكم؛ وبالفعل اشتريت مع صديق لي عقارين واحد في حي بدر شمال الرياض ب٩٦٠ الف ١٢٠٠م والاخر بالقيروان ٤٠٠ م ب ٤٠٠ الف وسافرت لبلد الابتعاث
كانت سفرتي لاستراليا لاجل درسة اللغة وادارة الاعمال المتخصص في التحليل المالي ؛ ما اخفيكم لقيت هدوء بحياتي مطفش هناك لا اتصالات ولاعقارات وحتى عالم المحاسبة حسيت اني بعيد عن كل شي، لكن كنت ابي التعلم السريع للغة ؛ المعهد كان فاشل واغلب الطلاب للاسف اما صينيين يريدون الجنسية
اى حتى شباب وبنات صغار من كل الجنسيات مو مهتمين بالتعلم يدورون عمل اضافي وجنسية؛ شخصياً لقيت نفسي وحيد لاصديق لا اهل ولا حتى عرفت اداخل المجتمع فجاني حزن وكئابه وتحطم ماله حد وفكرت ارجع لكن عندي هدف وهي اللغة على الاقل؛ بعد شهر من الاحباط تعرفت على رجل عراقي معه جنسية استراليه
وشكيت له الحال وقال اعلمك اللغة ؛ وبالفعل بدأت اكلمه بانجليزتي المكسرة وهو يصحح لي ونصحني بالدخول مع المجتمع الاسترالي وهو مجتمع صراحة صعب وشايفين ارواحهم ولكن لقيت الشيبان والعجز اسهل ناس ادخل معهم واتكلم وكلامهم بطيء يمدي الحق على كلماتهم ؛ وفي حركة حلوه طحت فيها طورتني بسرعه
صرت اكتب مقالة انجليزية واطرحها على صديقي العراقي ويصححها لي طبعا مو بلاش يحسب علي الساعة ب٢٠ دولار حتى لو يسولف معي يقول هات ٢٠ وكنت اعطيه بس برضه احلله 😅 صرت اخليها كلها كتابه وتصحيح ؛ اول ماكتبت مافهم ولا كلمة كسرت ام القواعد ودخلتها ببعضها وكنت اكتب انجليزي بقواعد العربية 😅
بعد سنة كنت اسهر فيها وانا اكتب واقرا والخص واعرضها على مدرسيني احياناً واقراها اوقات بصوت عالي على الطلاب وسط ضحكهم لاني كنت اكتب كثير عن كل شيء تقريباً وحتى مرة كتبت عن السعادة وما انسى ذيك المقالة خذت منها معلومة وحده علقت في ذهني ان الانسان يكون سعيد بوجود هدف وتحديات امامه..
وبغياب الهدف والتحديات تغيب معها السعادة في الغالب ؛ من بعدها وانا استمتع بكل عقبة واسميها تحدي للتجاوز ؛ بعد سنة كانت الكتابة عندي هي افضل مهاراتي اللغوية وصرت اكتب بسرعه وكنت اجهز نفسي لمرحلة الماجستير لان كلها كتابه وبحوث .. اجتزت الايلس ب٦.٥٠ الحمدلله والكتابه وصلتها ٧
.. نكمل الثريد واعتذر عن الاطالة وبعض الاخطاء الاملائية لاني اكتب بسرعه بس احاول اختصر واكتب الاحداث الهامة فقط واللي فعلاً فيها شي مفيد واعطي تفصيل في الشي اللي استفدت منه فعلاً بشكل عملي واعذروني؛ التغريدات القادمة لمرحلة الماجستير درست فيها سنتين MBA المتخصص في المالية وفيها .
تعلمت من الماجستير التحليل المالي ولكن بشكل نظري بحت صحيح اخترت ٣ شركات في الشركات الدرجة في السوق المالية في سوق استراليا وقمت بتحليلها مع فريق طلاب استراليين وسعوديين وابشركم طلعت محفظتنا خسرانه !! يعني لو حطينا فلوس كان خسرنا المهم الدكتور نجحنا كلنا
طبعاً نجحنا الدكتور لاننا استخدمنا الطريقة الصحيحة في التحليل حتى لو كانت النتيجة خاسرة ولو خسرنا الشركة اللي ممكن نشتغل فيها ؛وهذا اثبت عندي ان ليس كل المحللين الماليين اصحاب الشهادات يربحونك ! ممكن تسلمها لشخص مادرس ويربحك فقط لانه عنده معلومة عن الشركةمايعرفها الدارس
قبل الابتعاث سويت شغلتين بنفس الوقت ؛ شريت عقار عبارة عن ارض وشريت اسهم من شركة عقارية مؤشراتها ممتازة يعني مثلاً عندهم احتياطيات ارباح كبيرة في حقوق الملكية المفروض توزع وشريتها ب١٠ ريال بعدما رجعت بعد ٣ سنوات صار سعرها ب٨ ريال !!(خسارة ٢٠٪ )والعقار اللي شريته بنفسي ارتفع ١٠٠٪
مشكلتي مع الاسهم انها لا تعطي دخل ثابت بنسبة مجزية يعني نادر ما الاقي شركة اقدر اشتري فيها اليوم واعرف انها بتعطيني عائد ٨ او ٩٪ على ٥ سنوات واقدر ابيع واخذ راسمالي ؛ الارجح بيكون في مخاطر عالية جداً ..وحصلت شي هو افضل بكثير من الاسهم عرفته قبل ابتعاثي؛ وهو المحلات التجارية..
المحلات التجارية زي مطعم تموينات مغسلة او مواد كهرباء وسباكة سوقها واسع جداً وفيها عوائد عالية تصل ٥٠٪ الى٨٠٪ في السنة لكن مخاطرها عالية ومعروف قاعدة بالاستثمار كلما زادت العوائد زادت المخاطر ؛ واهم انواع المخاطر اللي يواجهوهنا هي مخاطر التشغيل ؛ وهي احتمال..
• • •
Missing some Tweet in this thread? You can try to
force a refresh
