Thread by @nchokkan

எங்கள் நிறுவனத்திலுள்ள ஒரு வேலை வாய்ப்பைப்பற்றி இன்று மதியம் பதிவுசெய்திருந்தேன். அதற்காகப் பலர் தங்களுடைய தகவல்களை அனுப்பியிருந்தார்கள், அவற்றை உரியவர்களுக்கு அனுப்பிவைத்துக்கொண்டிருக்கிறேன். |1

அந்த மின்னஞ்சல்களையெல்லாம் மேலோட்டமாக இன்னொருமுறை பார்த்தபோது, இவ்விதமான வேலை நாடல் மின்னஞ்சல்களுக்கென்று சில சிறு குறிப்புகளை எழுதத் தோன்றியது. வேலை தேடுகிற புதியவர்கள்/ வேலை மாற எண்ணியுள்ளவர்களுக்கு இவை பயன்படலாம். |2

1. உங்களுடைய படிப்பு, வேலை அனுபவம் போன்ற விவரங்களைக் கொண்ட கோப்புக்கு resume.docx என்று பொத்தாம்பொதுவாகப் பெயர் வைக்காதீர்கள். உங்கள் முழுப்பெயர் அதில் இருக்கட்டும், இயன்றால் உங்களுடைய சிறப்புத்திறன், எத்தனை வருட அனுபவம் போன்றவற்றையும் சேர்க்கலாம். |3

நிறுவனத்திலுள்ளோர் கோப்பைத் திறக்குமுன் உங்களைப்பற்றிய ஒரு சிறு அறிமுகம் கிடைத்துவிடும்.

2. மின்னஞ்சலின் தலைப்பையும் (Subject) இதே நோக்கத்துக்காகப் பயன்படுத்துங்கள் “Job Application”, “Hello Sir” என்றெல்லாம் பொதுவாக எழுதாமல், எந்த வேலைக்கான விண்ணப்பம் என்பதைக் குறிப்பிடுங்கள்.|4

வேலை அறிவிப்பில் Job ID என ஏதாவது எண் இருந்தால், அதையும் சப்ஜெக்டில் குறிப்பிடலாம்
இதெல்லாம் எதற்காக?
அந்நிறுவனத்தில் இதுபோல் பல வேலை வாய்ப்புகள் இருக்கும், தலைப்பிலேயே விஷயத்தைத் தெளிவாக்கிவிட்டால், நீங்கள் எதற்காக விண்ணப்பம் செய்கிறீர்கள் என்பது பளிச்சென்று புரியும்.|5

3. Dear Sir/Madam என்று தொடங்கும் அறிமுகக் கடிதங்களால் பெரிய பயன் ஏதும் இருக்காது. அவற்றை அநேகமாக யாரும் படிக்கமாட்டார்கள். உங்கள் மன நிறைவுக்காக 2 வரி எழுதுகிறீர்கள் என்றால் சரி, அதற்குமேல் அவற்றைச் செதுக்கிக்கொண்டிருக்கவேண்டாம். |6

4. அறிமுகக் கடிதத்தில், ரெஸ்யூமில் எழுத்து, இலக்கணப் பிழைகள் இல்லாதபடி பார்த்துக்கொள்ளுங்கள். இவற்றைக் கண்டறிந்து திருத்த இணையத்தில் ஏராளமான கருவிகள் உள்ளன, இல்லாவிட்டால் நண்பர்களிடம் உதவி கேட்டுத் திருத்திக்கொள்ளலாம். |7

அது அவ்வளவு முக்கியமா என்றால், முக்கியம்தான். எழுத்துப்பிழையைப் பார்த்தவுடன் எரிச்சலாகிறவர்கள் பலர் உண்டு. எரிச்சலுடன் அவர்கள் நம்முடைய விண்ணப்பத்தைப் பரிசீலிப்பது நம் வாய்ப்புகளைச் சிறிதளவேனும் பாதிக்கலாம். ஆகவே, இதற்காக ஒரே ஒருமுறை 1 மணி நேரம் செலவிடுங்கள். |8

5. ஒரே மின்னஞ்சலை நான்கைந்து பேருக்கு அனுப்புவதில் தவறில்லை; அதற்காக அனைவரையும் ஒரே மின்னஞ்சலில் போடாதீர்கள், தனித்தனியே அனுப்புவது அவர்களை மதிப்பதாகும். |9

6. A என்ற நிறுவனத்துக்கு அனுப்பிய வேலை விண்ணப்பத்தை அப்படியே Bக்கு ஃபார்வர்ட் செய்யலாம்; ஆனால் கீழே உள்ள A என்ற நிறுவனத்தின் பெயரை அழிக்காமல் விட்டுவிடக்கூடாது. இன்று எனக்கு வந்த ஒரு மின்னஞ்சலில் இப்படி அடுக்கடுக்காக 3 நிறுவனங்களின் பெயர்கள் இருந்தன. |10

7. Resumeக்குள் என்ன இருக்கவேண்டும் என்பது மிகப்பெரிய தலைப்பு, அதையெல்லாம் சொல்ல இது இடமில்லை. ஆனால் குறைந்தபட்சம் உங்கள் தொலைபேசி எண்ணும் மின்னஞ்சலும் இருக்கவேண்டும், அவை கோப்பைத் திறந்தவுடன் பளிச்சென்று கண்ணுக்குத் தெரியவேண்டும், படிப்பு, வேலை அனுபவம் (இருந்தால்) |11

ஆகிய தகவல்களைச் சுருக்கமாக எழுதுங்கள் (கூடுதல் தகவல்கள் தேவைப்பட்டால் அவர்களே கேட்பார்கள்), குறிப்பிட்ட சாதனைகளை, விருதுகளை எழுதுங்கள், புகைப்படங்கள் பெரும்பாலும் அவசியப்படாது, ரெஸ்யூமில் Marital Status, Hobbies எல்லாம் எதற்கு என்று எனக்கு இதுவரை புரியவில்லை. |12

8. குறிப்பாக, ரெஸ்யூமில் பொய் சொல்லாதீர்கள், ஆன்லைன் நேர்காணல்தானே என்று இன்னொருவரையோ இணையத்தளங்களையோ உதவிக்கு அழைத்துக்கொண்டு திருட்டுத்தனம் செய்யாதீர்கள், பிழையான வழியில் சென்று அதன்மூலம் கிடைக்கிற எந்த நன்மையாலும் பலனில்லை என்பது காந்தி சொன்னது, அதில் அர்த்தம் உள்ளது. |13

9. இன்னொரு கோணத்தில் பார்த்தால், இன்றைக்கு Resumeஐவிட, LinkedInபோன்ற தளங்களில் உருவாக்கும் (தொடர்ந்து வளர்ந்துகொண்டேயிருக்கிற) ஆளுமைப்பக்கங்கள், Portfolio எனப்படும் பணித்தொகுப்புகள், பிறர் உங்களுக்குப் பொதுவில் அளிக்கின்ற புகழாரங்கள் ஆகியவற்றுக்கு மதிப்பு மிகுதி. |14

உங்களுடைய இணைய அடையாளம் எப்படி இருக்கிறது என்று கொஞ்சம் யோசியுங்கள், துணிவும் திறமையும் உள்ளவர்கள் ஓரிரு ஆண்டுகளில் அதையே தங்கள் ரெஸ்யூம் ஆக்கிக்கொண்டுவிடலாம். |15

10. வேலை தொடர்பான கேள்விகள் இருந்தால் தாராளமாகக் கேளுங்கள், அதேசமயம், யாரிடம் பேசுகிறோம் என்பதைப் பொறுத்துக் கேள்விகளை அமையுங்கள். எடுத்துக்காட்டாக, சம்பள விஷயங்களை HR (மனிதவளக்) குழுவினர் தவிர மற்றவர்களிடம் கேட்டால் சரியான பதில் கிடைக்காது. |16

11. மின்னஞ்சல் அனுப்பியபிறகு, ஓரிரு நாட்களுக்கு எந்தப் பதிலும் வராவிட்டால் நினைவூட்டுங்கள். பத்தாவது நிமிடமே ‘என்னாச்சு? ஏதேனும் தகவல் உண்டா?’ என்று கேட்டால் அது மறுமுனையில் உள்ளவர்களுக்கு எரிச்சலைத்தான் உண்டாக்கும். |17

12. நல்ல வேலைகளை மக்கள் தேடுவது எந்த அளவு உண்மையோ, அதே அளவுக்கு நல்ல மக்களை நிறுவனங்கள் தேடிக்கொண்டிருக்கின்றன; என் நிறுவனத்தில் சில HR நண்பர்களுடன் கிட்டத்தட்ட நாள்தோறும் பேசிக்கொண்டிருக்கிற அனுபவத்தில் சொல்கிறேன், |18

ஒரு சிறந்த திறமையாளர் கிடைத்துவிட்டால் தலையில் தூக்கிவைத்துக்கொண்டு கொண்டாட அவர்கள் தயாராக இருக்கிறார்கள்; அதேசமயம், அதற்காக ஏராளமானோரை வடிகட்டவேண்டிய மிகக் கொடுமையான (அழுத்தம் நிறைந்த) சுமைக்கும் அவர்கள் ஆளாகியிருக்கிறார்கள். |19

ஆகவே, அவர்களைக் கொஞ்சம் பரிவுடனே அணுகுங்கள், அவர்களும் பேரியந்திரத்தின் சிறு பற்சக்கரங்கள்தாம். |20/20