Thread by @appa_v

"చింతన"!!

*చేపలమ్ముకునే ఇద్దరు పల్లెపడుచులు ఒకరోజు చేపలమ్ముకుని చీకటి పడేవేళ ఇంటికి తిరిగి వస్తుండగా భోరున వర్షం కురవసాగింది. త్రోవలో ప్రక్కనే ఉన్న ఓ ఇంటివైపు పరుగెత్తేరు ఇద్దరూ తల దాచుకోవడానికి. ఎంతసేపటికీ వర్షం తగ్గలేదు.చాలా దూరం వెళ్ళాలి.

ఎలాగా, ఏం చేయడమా అని వాళ్ళు ఆలోచిస్తుండగా ఇంతలో లోపలినుండి ఆ ఇంటాయన వచ్చేడు. వాళ్ళ పరిస్థితి చూసి “ ఇంత వర్షంలో రాత్రిపూట మీరు ఇళ్లకెలా వెళ్ళగలరు? అంచేత ఈ రాత్రికి మీరు లోపలి వసారాలో పడుకొండి. ప్రొద్దున్నే లేచి వెళ్లిపోదురుగాని.” అన్నాడు. ఆ మాటకు వాళ్ళెంతో సంతోషించి సరే అన్నారు.

ఆ ఇంటాయన ఓ పువ్వులమ్మే వ్యక్తి. ఆ ఇంటి వసారాలో బుట్టలతో పువ్వులున్నాయి.ఆ ఇద్దరు పల్లెవాళ్ళూ చేపల తట్టలను బయట ఉంచేసి వసారాలో పడుకున్నారు.వసారా అంతా పూల పరిమళాలే. ఎంతసేపయినా ఆ ఇద్దరికీ నిద్రపట్టలేదు. ఆ పూల పరిమళం వాళ్లకు ఇంపుగా అనిపించలేదు.ఇబ్బందిగా అనిపించింది.

అంచేత ఇలా కాదని బయటకు వెళ్లి వాళ్ళ చేపల తట్టలను తీసుకుని వచ్చి తలక్రింద పెట్టుకుని పడుకున్నారు. విచిత్రం వాళ్లకు వెంటనే నిద్ర పట్టేసింది.

ఎప్పుడూ చేపల్ని తట్టలకెత్తుకుని అమ్ముకోవడమే వాళ్ళ జీవిక. వాటి మధ్యనే ఉండి ఆ వాసనలోనే జీవిస్తుండడంతో వాళ్లకు ఆ వాసన నిత్యగంధమైపోయింది.

అంచేత పూల పరిమళాలు వాళ్ళ నాసికా పుటాలకు నచ్చలేదు.

చేపల వాసన అనే ఐహిక వాసనకు అలవాటు పడిపోయిన మనిషికి పూల పరిమళం అనే ఆధ్యాత్మిక వాసన నచ్చదు. ఒకవేళ ఎప్పుడయినా ఆధ్యాత్మిక ఆలోచన కలిగినా చిత్తచాంచల్యం వల్ల తిరిగి ఐహిక సంపర్కంలో పడిపోతాడు.

Thread Reader App
@threadreaderapp"unroll "