Thread by @SaradhiTweets

అర్జునుడికి దశ నామాలున్నాయ్. అవి తలుచుకుంటే భయం పోయి ధైర్యం, ఉత్సాహం వస్తుంది.. ఒక సంధర్భంలో తన పది పేర్లూ అర్జునుడే చెప్పుకున్నాడు.

అది ద్వాపర యుగం కాలం , పాండవులు అజ్ఞాతవాసం లో ఉన్న సమయం. గోవులను కాపాడడానికి ఉత్తర కుమారుడిని సారధి గా చేసుకున్న సంధర్భం . యుద్ధానికి ముందు తన దశనామాల గురించి ఉత్తరుడికి తెలియజేశాడు. తనను తాను అర్జునుడిగా చెప్పుకున్నా ఉత్తర కుమారుడు నమ్మలేదు.

దీంతో ఉత్తరుడు.. బృహన్నలా! అర్జునికి పది పేర్లున్నాయి వాటిని వివరిస్తే నేను నిన్ను అర్జునుడని నమ్ముతానని అన్నాడు.

అప్పుడు అర్జునుడు చెప్తూ....

కుమారా!

1-అర్జునుడు, 2-ఫల్గుణుడు, 3-పార్ధుడు, 4-కిరీటి, 5-శ్వేతవాహనుడు, 6-బీభత్సుడు, 7-విజయుడు, 8-జిష్ణువు, 9-సవ్యచాచి, 10-ధనుంజయుడు అనే దశ నామాలు ఉన్నాయని తెలిపారు.

అప్పటికీ ఉత్తరునికి విశ్వాసం కుదరక బృహన్నలా... ఆ దశనామాలు వివరిస్తే నువ్వే అర్జునుడవని నమ్ముతానని పేర్కొన్నాడు. అప్పుడు అర్జునుడు ఇలా వివరించాడు..

నేను ధరణి అంతటిని జయించి ధనమును సముపార్జించాను కాబట్టి, ధనుంజయుడనయ్యాను.

ఎవ్వరితోనైనా పోరాడి విజయం సాధిస్తాను కనుక విజయుడిని, ఎల్లప్పుడూ నా రథానికి తెల్లటి అశ్వాలను మాత్రమే వినియోగిస్తాను కాబట్టి శ్వేత వాహనుడిని,

ఇంద్రుడు ప్రసాదించిన కిరీటం నా తలపై ప్రకాశిస్తుంది కాబట్టి కిరీటినియ్యాను.

శత్రువులతో పోరాడే సమయంలో ఎలాంటి పరిస్థితిలో కూడా సంయమనం కోల్పోకుండా బీభత్సానికి పాల్పడను కాబట్టి బీభత్సుడిని,

రెండు చేతులతో నారిని సంధించినా కానీ ఎక్కువగా ఎడమచేతితో అతి సమర్ధంగా నారిని సంధిస్తాను కాబట్టి సవ్యసాచిని అయ్యాను.

నా మేనిఛాయ తెల్లగా ఉంటుంది కాబట్టి అర్జునుడు,

ఉత్తర ఫల్గుణీ నక్షత్రంలో జన్మించాను కనుక ఫల్గుణుడిని,

మా అన్న ధర్మరాజుకు ఎవరైనా హాని కలిగించి దేవతలు అడ్డు తగిలినా వారిని సంహరించక వదలను కాబట్టి జిష్ణువు అనే పేరు వచ్చింది.

మా అమ్మ అసలు పేరు పృధ.. కుంతి భోజుని కుమార్తె కాబట్టి ఆమె కుంతీదేవి అయింది.. నేను పృధపుత్రుడిని కాబట్టి పార్ధుడిని అయ్యానని వివరించాడు.