Thread by @KudaVakeelu

Mohamed Shaweed v Mohamed Latheef [2017/SC-A/39]

މައިގަނޑު އިޝޫ: ކުންފުންޏާބެހޭ ގާނޫނުގައިވާ ގޮތުގެ މަތިން ކުންފުނި އުވާނުކައި އަދި ކުންފުންޏެއްގެ ދަރަނިތައް ހަލާސްނުކޮށް ކުންފުނީގެ މުދާތައް ބަހާފައިވާ ހާލަތުގައި މުދާ ލިބުނު ފަރާތްތައް ކުންފުނީގެ ދަރަންޏަށް ޒިއްމާކުރެވިދާނެތަ؟

1/ ހ. ވާލީ ވިލާ މޫސާ ފަހީމް އާއި އޭނާގެ ބޭބެ މ.ތްރީއޭ ވިލާ އަބްދުއްލާ އަލީ އާ ދެ މީހުން، ކުންފުނިތައްވެސް (ވާލީ ބްރަދާސް ޕވޓ ލޓޑ އާއި ތްރީ އޭ ބްރަދާސް ޕވޓ ލޓޑ) ހިމެނޭ ގޮތަށް ވިޔަފާރިތަކެއް ހިނަގަމުން ދިޔަ. މި ވިޔަފާރިތަކުގެ %60 ހިއްސާވަނީ އަލީ އަށް. %40 ހިއްސާ ވަނީ ފަހީމަށް.

2/ މި ދެ ބެއިންގެ ތެރެއިން ފަހީމް މަރުވި. މަރުވުމުން، ފަހީމްގެ ތަރިކައިގައި ހިމެނޭ ވާލީ ބްރަދާސް ޕވޓ ލޓޑ އާއި ތްރީއޭ ބްރަދާސް ޕވޓ ލޓޑ ގެ ހިއްސާތަކުގެ މައްސަލަ ހައިކޯޓުން ނިންމާފައިވަނީ، އެ ކުންފުނިތަކުގައި ވާ ފަހީމްގެ ހިއްސާ (%40) ލިބިގެންވަނީ ފަހީމްގެ ވާރިސުންނަށް ކަމަށް.

3/ ހައިކޯޓުން މި ގޮތަށް ހުކުމް ކުރުމުން، އޭރުގެ ސިވިލް ކޯޓު (މަދަނީ ކޯޓު) ން ހައިކޯޓުގެ ހުކުމާ އެއްގޮތަށް (%40 ފަހީމްގެ ވާރިސުންނަށް) ދެ ކުންފުނީގެ ހިއްސާތަކާއި މުދާތައް މަދަނީ ކޯޓުން ބަހައިދިން. (މަދަނީ ކޯޓުގެ ނަންބަރު 462/2004)

4/ ކަންތައް މިހެން ހިނގާފައި ވަނިކޮށް، ވާލީ ބްރަދާސް ގައި މާކެޓިންގ އަދި ސޭލްސް މެނޭޖަރެއްގެ މަގާމު އަދާކުރި ސ.މަރަދޫފޭދޫ އަލަނާސިގޭ މ.ލަތީފް، ފަހީމްގެ 8 ވާރިސުންގެ މައްޗަށް ދައުވާކުރި.

ދައުވާކުރީ ލަތީފަށް ލިބެން ޖެހި ނުލިބިވާ 1.4ރ މިލިއަން މުސާރައިގެ %40 (5،75،200ރ) އަށް.

5/ ލަތީފް ކުރި ދައުވާ ގެ މައްސަލަ ސިވިލް ކޯޓުން ވެސް، ހައިކޯޓުން ވެސް ނިންމީ ލަތީފް ކޮޅަށް.

ސުޕްރީމް ކޯޓުގެ މި މައްސަލައަކީ، ހައިކޯޓުން ލަތީފްކޮޅަށް ނިންމި ނިންމުމާ މެދު ފަހީމްގެ ވާރިސުންގެ ތެރެއިން ޝަމްވީދް ހިތްހަމަނުޖެހިގެން ހުށައެޅި މައްސަލަ.

6/ ސުޕްރީމް ކޯޓުގައި ޝަމްވީދް ނެގި ދެ ނުކުތާއަކީ:

(ހ) ކުންފުންޏަކީ ވަކި ޝްހްސެއް ކަމަށް އަދި ކުންފުންޏެއްގެ ދަރަނީގެ މައްޗަށް ކުންފުނީގެ ހިއްސާދާރުން ޒިންމާނުކުރެވޭނެކަމަށް
(ށ) ފަހީމް މަރުވިތާ 17 އަހަރު ދުވަސް ފަހުން ދައުވާ ކުރުމުގެ ހައްގު ލަތީފަށް މިހާރު ލިބިގެން ނުވާކަމަށް

7/ ފުރަތަމަ ނުކުތާގައި ސުޕްރީމް ކޯޓުން ނިންމީ:

- ގާނޫނުގައި ވާ ގޮތަށް ކުންފުނި އުވާނުލައި ކުންފުނީގެ މުދަލާއި ފައިސާ ހިއްސާދާރުންގެ މެދުގައި ބަހައި ދީފައި އޮތްނަމަ ވެސް، އެއީ މިހާރު އޮތް ހަގީގަތް ކަމުން، ލަތީފް ކުރާ ދައުވާއަކީ އެ ހަގީގަތާ ވަކިކުރެވޭނެ ދައުވާއެއް ނޫންކަން.

- ލަތީފަށް "ދައްކަންޖެހޭ ފައިސާއެއް ކަމަށް ސާބިތުވާ ނަމަ" އެ ފައިސާއަކީ، ފަހީމްގެ ވާރިސުން ލަތީފަށް ދޭން ޖެހޭނެ ފައިސާއެއްކަން.

8/ ފުރަތަމަ ނުކުތާގައި ސުޕްރީމް ކޯޓުން މި ގޮތަށް ނިންމި ނިންމުން ބިނާކުރީ، މަދަނީ ކޯޓުގެ ނަންބަރު 462/2004 (މި ތްރެޑްގެ 2-3 ކިޔާލާ) ގެ ހުކުމުގައި އެ މައްސަލައިގައި ބެލިފައިނުވާ ދަރަނިތަކަށް ފަހީމްގެ ވާރިިސުން ޒިންމާވުން އެ މައްސަލައިގައި ބަރީއަކޮށްފައިނުވާތީ.

9/ ދެވަނަ ނުކުތާގައި ސުޕްރީމް ކޯޓުން ނިންމީ:

- ކުންފުނީގެ މުދާތަކަކީ (ހިއްސާތަކެއް ނޫން، މުދާތައް) ހިއްސާދާރުންގެ ވާރިސުންނަށް ވާރުވާނެ އެއްޗެއް ނޫންކަމުން، ކުންފުނީގެ މުދަލާއި ފައިސާގެ %40 ފަހީމްގެ ވާރިސުންނަށް ދީފައި ވަނީ، ވާރުތަމުދަލުގެ ގޮތުގައި ނޫންކަން.

- ވާރުތަމުދަލުގެ ގޮތުގައި ދީފައިވާ މުދަލެއް ނޫންކަމުން، ލަތީފް ކުރާ ދައުވާއަކީ ފަހީމްގެ ތަރިކައިގެ މައްޗަށް ނުބެލޭވެނެކަން.

- ތަރިކައިގެ މައްޗަށް ކުރެވޭ ދައުވާއެއް ނޫންކަމުން، ތަރިކައިގެ މައްޗަށް 60 ދުވަހުގެ ތެރޭ ދައުވާކުރަން އޮންނަ އޮތުން މި މައްސަލައިގެ މައްޗަށް ނުހިނގާނެކަން.

9/ ލަތީފް ދައުވާކުރި ފައިސާއާމެދު ސުޕްރީމް ކޯޓުން ބުނީ، އޭގެ ތެރެއިން އެއްވެސް ފައިސާއެއް ލަތީފަށް ދެވިފައިވާކަމަކަށް ހުށަހަޅާފައިވާ ލިއެކިއުންތަކުން ފެންނަންނެތުމުން، އެ ފައިސާ ލިބެންޖެހޭކަމަށް.

10/ މަތީގައި މި ބުނި ނިންމުންތަކަށް ވާސިލުވުމަށް ސުއޫދު ފ. ބޭނުންކުރީ ކުންފުންޏާ ބެހޭ ގާނޫނާއި ކޮމްޕެނީ ލޯގެ ޕްރިންސިޕަލްތައް. މި ގޮތުން، މި މައްސަލައަކީ ކުންފުންޏާބެހޭ ގާނޫނާގުޅޭ ގިނަ އުސޫލުތައް ތަފްސީލުކޮށްދިން މައްސަލައެއް.

11/ މި ގޮތުން ސުއޫދު ފ. ތަފްސީލުކޮށްދިން ކުންފުންޏާބެހޭ ގާނޫނާ ގުޅޭ މައިގަނޑު އުސޫލުތަކަކީ:

(ހ) ކުންފުންޏަކީ ވަކި ގާނޫނީ ޝަހްސެއްކަން [ޕރ 11] separate legal entitu

(ށ) މެންބަރުން ގަންނަން އެއްބަސްވެފައިވާ ހިއްސާގެ އަގަށް ވާ މިންވަރަށް ކުންފުނީގެ ދަރަންޏަށް ޒިންމާވުން [ޕރ 12] limited liability

(ނ) ކުންފުންޏެއް އުވާނުލައި ކުންފުނީގެ މުދާ، އެ ކުންފުނިން ވަކިކޮށް، ހިއްސާދާރަކަށް/ހިއްސާދާރުންނަށް ނުދެވޭނެކަން. އަދި ސަބަބުތައް [ޕރ 15]

(ރ) ހިއްސާދާރުންގެ މިލްކަކީ ކުންފުނީގެ ހިއްސާކަން އަދި އެއީ އުފުލޭ މުދަލެއްކަން [ޕރ 16]

(ބ) ހިއްސާދާރަކު މަރުވެއްޖެ ނަމަ، މަރުވި ހިއްސާދާރުގެ ހިއްސާގެ ހައްގުވެރިޔާ/ވެރިން ކަމުގައި، ކުންފުނީގެ ހިންގާ ގަވާއިދާ ހިލާފުނުވާ ގޮތެއްގެ މަތިން، ޝަރުއީ ކޯޓަަަކަށް ކަނޑައެޅިދާނެކަން. [ޕރ 17]

(ޅ) ހިއްސާދާރަކު މަރުވިޔަސް، ކުންފުނި އުވިގެން ނުދާނެކަން. [ޕރ 18]

(ކ) މައިނޯރިޓީ ހިއްސާދާރަކާ/ދާރުންނާއި މެޖޯރިޓީ ހިއްސާދާރަކާ/ދާރުންނާ މެދު ހިޔާލު ތަފާތުވެއްޖެނަމަ،ކުންފުންޏާބެހޭ ގާނޫނުގެ 73 ވަނަ މާއްދާގައި ވާ ގޮތަށް އަމަލުކުރެވިދާނެކަން. [ޕރ 18-19]

(އ) ޑިރެކްޓަރުން ކުންފުންޏަށް ގެއްލުންވާގޮތަށް އަމަލުކުރަމުން ދާނަމަ، ކުންފުނި އުވާލުމަށް، ހިއްސާދާރަކަށް ކޯޓުގައި އެދެވިދާނެކަން އަދި އެ ގޮތަށް އެދުމުން، ކުންފުނި އުވާލުމަކީ "އޮތް އެންމެ އަދުލުވެރި އަދ ިއިންސާފުވެރި ގޮތް" ނަމަ އުވާލުމުގެ އަމުރެއް ކޯޓަށް ނެރެވިދާނެކަން [ޕރ 20]

@threadreaderapp unroll please