Thread by @meemainseen

یوسفیؔ کی خاکم بدہن میں ایک صاحب کا ذکرہے جو نئے نئے اردو کے لیکچررمقررہوئے تو پہلی تنخواہ لیتے ہی صبغے اینڈ سنز (سوداگران و ناشران کتب) کےہاں پھولی ہوئی سانسوں کے ساتھ تشریف لائے اور چھوٹتے ہی بولے ’آپ کےہاں منٹوؔ کی وہ کتاب بھی ہے جس میں دھرن تختہ کے معنی ہیں؟‘
+++

صاحب ہمیں اس بات کا ہمیشہ قلق رہے گا کہ جو عمرمنٹوؔ کو ’بغیرسمجھے‘ پڑھنے والی تھی وہ خاندان کے بزرگوں سے چال چلن کا سرٹیفکیٹ ’اٹیسٹ‘ کروانے کی وضعداری کی نظر ہوگئی۔ جن دنوں کا ہم ذکر کررہے ہیں فیضؔ کی نسخہ ہائے وفا اور جونؔ ایلیا کی شاید پر نظروں کے زاویے تیکھےہوجایاکرتےتھے
+++

منٹوؔ کے تونام پر ہی گرہستی تعزیرات کےضابطہ فوجداری ودیوانی نے حرکت میں آجاناتھا
فیضؔ صاحب لاکھ دار کی رومانوی منظرکشی کرتے رہیں تب زندگی سہانی اورجینےکی تمناجوان تھی
آپس کی بات ہےایک تنخواہ داراردولیکچررکی پھولی ہوئی سانسوں کےساتھ بھی منٹوکوپڑھنےکا اپنامزہ ہے
+++

کہ منٹوؔ ہرزمانےکاکہانی کار ہے
وہ لاہور کی ایک نسبتاًسردسویرتھی جب پچھلی رات کو اسلام آباد سے لاہور آئے سجادحیدراور میں میانی صاحب کی بھول بھلیوں میں میرے کورس میٹ میجرملک اظہرشہیدکو کھوج رہے تھے کہ اس تلاش بسیارمیں ہم آغاحشرؔکاشمیری اور ساتھ ہی تھوڑادورمنٹوؔ سے جا ٹکرائے
+++

اس تھریڈ کی ابتدائی ٹوئیٹ کی تصویراسی دن کی یادگارہے
منٹوؔ کی حالیہ لوحِ مزار بھی طنزوکنائے اور رمزواشارے میں کم تونہیں مگر کہنے والے کہتے ہیں کہ انہوں نے اپنی زندگی میں ہی اپنا ایک اور کتبہ بھی تصنیف کررکھا تھا۔ اورصاحبو تارڑؔ صاحب کی زمین میں ’نقل کتبہ کتبہ باشد‘
+++

یہاں سعادت حسن منٹوؔ دفن ہے اور اس کے ساتھ ہی کہانی کہنے کے وہ تمام رمزاور راز بھی دفن ہیں۔ منوں مٹی تلے آسودہ وہ ابھی تک اسی سوچ میں غلطاں ہے کہ دونوں میں سے کون بڑا کہانی کار ہے۔ خداوند کہ وہ
+++

راویٔ رنگین بیان روایت کرتے ہیں کہ اوپر بیان کی گئی عبارت منٹوؔ کی پہلی لوحِ مزار تھی جو کچھ عرصہ تو رہی مگر پھر خوفِ فسادِخلق یا کسی اور وجہ سے موجودہ کتبے سے تبدیل کردی گئی۔ واللہ اعلم
ہم نے ایک عظیم کہانی کارکی برسی پر اسے یادکیا۔ اللہ منٹوؔ سے راضی ہو۔ آمین
#Manto
___