Thread by @adarshahgd

ಮಹಾತ್ಮರು ಮಹಾತ್ಮರನ್ನು ನೋಡುವ ದೃಷ್ಟಿಕೋನ.....😍🙏

ಸುಮಾರು ವರ್ಷಗಳ ಹಿಂದೆ ಭೈರಂಬೆ ಬಟ್ಟೆ ವಿನಾಯಕ ದೇವಸ್ಥಾನದಲ್ಲಿ ಮೈಸೂರಿನ ರಾಮಕೃಷ್ಣಾಶ್ರಮದ ಸ್ವಾಮಿಗಳಿಂದ 3 ದಿನದ ಅಧ್ಯಾತ್ಮ ಶಿಬಿರ ಏರ್ಪಟ್ಟಿತು.
#Swarnavalli

ಆ ವೇಳೆಯಲ್ಲಿ ಮೈಸೂರಿನಿಂದ ಬಂದ ಸ್ವಾಮೀಜಿಯವರಲ್ಲಿ ಒಬ್ಬರಾದ ಶ್ರೀ ಶ್ರೀ ಜಗದಾತ್ಮಾನಂದ ಸ್ವಾಮಿಗಳು ನಮ್ಮ ಶ್ರೀಗಳವರ ದರ್ಶನ ಪಡೆಯುವ ಅಭಿಲಾಷೆಯವನ್ನು ಭೈರಂಬೆ ಕೆ.ಮ್ ಹೆಗಡೆ ಅವ್ರ ಹತ್ತಿರ ವ್ಯಕ್ತ ಪಡಿಸಿದರು.

ಅವ್ರ ಆಸೆಯಂತೆ ಪೂಜ್ಯ ಗುರುಗಳ ಅನುಮತಿಪಡೆದು ಮರುದಿನ ಅವ್ರನ್ನ ಶ್ರೀ ಸ್ವರ್ಣವಲ್ಲಿ ಮಠಕ್ಕೆ ಕರೆದುಕೊಂಡು ಬರಲಾಯಿತು. ಮಠದಲ್ಲಿ ಶ್ರೀ ದೇವರ ದರ್ಶನವನ್ನು ಮಾಡಿಸಿ ಪೂಜ್ಯ ಸರ್ವಜ್ಞೇಂದ್ರ ಸರಸ್ವತಿ ಮಹಾಸ್ವಾಮಿಗಳ ದರ್ಶನವನ್ನು ಪಡೆಯಲು ಮಾಳಿಗೆಯ ಮೇಲೆ ಕರೆತಂದರು.

ಪೂಜ್ಯ ಜಗದಾತ್ಮಾನಂದ ಸ್ವಾಮಿಗಳು ಮಹಾಸ್ವಾಮಿಗಳನ್ನ ಕಂಡಕೂಡಲೇ ಗುರುಸ್ತುತಿಯನ್ನು ಮಾಡಿದರು. ಆನಂದಭಾಷ್ಪ ಹೊಂದಿ ಭಾವೋದ್ವೇಗದಿಂದ ಹೀಗೆ ಉಚ್ಛರಿಸಿದರು - "ಪೂಜ್ಯ ಸ್ವಾಮೀಜಿಯವರೇ, ತಮ್ಮ ಚರಣ ಕಮಲಗಳಿಗೆ ಸಹಸ್ರ ಸಹಸ್ರ ಪ್ರಣಾಮಗಳು. ನಾನು ದೇಶ ವಿದೇಶಗಳ ಸಂಚಾರ ಮಾಡಿದ್ದೇನೆ.

ನನಗೆ ಶ್ರೀ ಚಕ್ರ ಆರಾಧನೆಯಲ್ಲಿ ಸಿದ್ಧಿಪಡೆದ ಮಹಾತ್ಮರನ್ನು ನೋಡುವ ಭಾಗ್ಯ ಈವರೆಗೆ ಸಿಗಲಿಲ್ಲವಾಗಿತ್ತು. ಇಂದು ಆ ಸೌಭಾಗ್ಯ ದೊರೆಯಿತು ತಾವು ಮಹಾನ್ ತಪಸ್ವಿಗಳು ಶ್ರೀ ರಾಜರಾಜೇಶ್ವರಿಯನ್ನು ಒಲಿಸಿ ಕೊಂಡಿದ್ದೀರಿ. ತಮ್ಮಂತ ಪೂಜ್ಯ, ಮಹಾತ್ಮರ ದರ್ಶನದಿಂದ ನನ್ನ ಜನ್ಮ ಸಾರ್ಥಕವಾಯಿತು.

ತಾವು ನನ್ನನು ಉದ್ಧರಿಸಬೇಕು" ಎಂದು ಹೇಳುತ್ತಾ ಕಣ್ಣುಗಳಿಂದ ಆನಂದಬಾಷ್ಪ ಸುರಿಸುತ್ತಾ ಶಿರಸಾಷ್ಟಾಂಗ ನಮಸ್ಕಾರ ಮಾಡಿ, ಕೆಲ ಕ್ಷಣಗಳವರೆಗೆ ಏಳಲೇ ಇಲ್ಲ. ಆಗ ಪೂಜ್ಯ ಮಹಾಸ್ವಾಮಿಗಳು ಅವರನ್ನ ಹಿಡಿದು "ಏಳಿ, ಎದ್ದೇಳಿ. ತಾಯಿ ನಿಮ್ಮನು ಅನುಗ್ರಹಿಸುತ್ತಾಳೆ" ಎಂದು ಹೇಳಿದ ಮೇಲೆ ಶ್ರೀ ಜಗದಾತ್ಮಾನಂದರು ಎದ್ದು ಕುಳಿತರು.

"ಈ ಆಸನದ ಮೇಲೆ ಕುಳಿತುಕೊಳ್ಳಿ" ಎಂದು ಮಹಾಸ್ವಾಮಿಗಳು ಎಷ್ಟು ಹೇಳಿದರು ಕುಳಿತುಕೊಳಲಿಲ್ಲ. "ತಮ್ಮಂತ ಮಹಾತ್ಮರ ಮುಂದೆ ನಾನು ಈ ಆಸನದ ಮೇಲೆ ಕುಳಿತುಕೊಳ್ಳಬೇಕೇ"?!!! ಎಂದು ಹೇಳುತ್ತಾ ನೆಲದ ಮೇಲೆಯೇ ಕುಳಿತರು ನಂತರ ಪೂಜ್ಯರಿರ್ವರೂ ಆದ್ಯಾತ್ಮದ ಬಗ್ಗೆ ಚರ್ಚಿಸಿದರು.

ಈ ದೃಶ್ಯವನ್ನು ಕಣ್ಣಾರೆ ಕಂಡ ನಮ್ಗೆಲ್ಲಾ ಕಣ್ಣಲ್ಲಿ ಆನಂದಬಾಷ್ಪ ಧಾರಾಕಾರವಾಗಿ ಸುರಿಯಿತು. ಆ ವೇಳೆಯಲ್ಲಿ ನನಗೆ ಈ ರೀತಿ ಅನಿಸಿತು- 'ದಿನಾಲೂ ಕಾಣುವ ನಮ್ಮ ಮಹಾಸ್ವಾಮಿಗಳಲ್ಲಿ ಇಷ್ಟೆಲ್ಲಾ ಅದ್ಬುತ ಶಕ್ತಿ ಇದಿಯೇ ?

ಇಲ್ಲಿಯವರೆಗೆ ಆ ರೀತಿ ನೋಡುವ ಭಾಗ್ಯ ಏಕೆ ಸಿಗಲಿಲ್ಲ ನನ್ನ ಪಾಪದ ಕಣ್ಣುಗಳಿಂದ ಗೋಚರಿಸಲಿಲ್ಲವೇ' ಇದರ ಮೇಲಿಂದ ಮಹಾತ್ಮರು ಮಹಾತ್ಮರನ್ನು ನೋಡುವ ದೃಷ್ಟಿಕೋನ ಅರ್ಥವಾಯಿತು...🙏🙏🙏
- ಎನ್ ಎನ್ ಹೆಗಡೆ ಕಣ್ಣೀಮನೆ
( ದಿವ್ಯದರ್ಶನ ಸಂಗ್ರಹದಿಂದ ಆಯ್ದ ಲೇಖನ )
#Swarnavalli