Thread by @PawarSpeaks

काही दिवसांपूर्वी माझी भेट घेण्यासाठी काही लोकांना विनंती केली होती. श्री. दवे यांनी यासंदर्भात वेळ मागितला होता. त्यानंतर आमच्या पक्षाच्या जिल्हाध्यक्षांना याची कल्पना देऊन त्यांनाही या बैठकीला उपस्थित राहण्यासाठी सांगितले.
#pressconference #Pune

जिल्हाध्यक्षांकडून समजले की, दवेच नाही तर महाराष्ट्रातील अन्य ठिकाणाहूनही अनेक लोक भेट घेण्यासाठी इच्छुक आहे. यामध्ये वेगवेगळ्या जिल्ह्यांतून नऊ ते दहा संघटनांचे साधारण ४० लोक आले होते. ज्यामध्ये अनेक मुद्दे मांडण्यात आले.

त्यापैकी त्यांच्यात माझ्या पक्षातील काही सहकाऱ्यांनी विधाने केली त्यासंबंधीची अस्वस्थता होती.याबद्दल त्यांना सांगितले की, पक्षांतर्गत त्या विधानांविषयी चर्चा झाली असून अशा पद्धतीने पुन्हा कोणत्याही जाति-धर्मावर न बोलता धोरणात्मक कार्यक्रमावर बोलण्याचा अधिकार आहे असा निर्णय झाला.

त्यामुळे भेटीसाठी आलेल्या सर्व मंडळींनी हा विषय इथेच संपवावा, असे बैठकीदरम्यान मी सांगितले. अलिकडच्या काळात ग्रामीण भागातील ब्राह्मण समाजाचा वर्ग हा नागरी भागात जास्त येतोय. त्यामुळे नोकरीमध्ये संधी मिळवण्यासाठी आरक्षण मिळावे ही त्यांची दुसरी मागणी होती.

मात्र साधारणत: महाराष्ट्रातील आणि केंद्रातून मिळालेल्या माहितीनुसार अशा नागरी भागातील नोकऱ्यांचे लोकसंख्येतील प्रमाण पाहता मला स्वत:ला याठिकाणी आरक्षणाचे सूत्र बसेल असे वाटत नाही, असे मत मी बैठकीत मांडले. आरक्षण हे कोणालाच देऊ नका अशी बैठकीला आलेल्यांची भूमिका होती.

मात्र असे करता येणार नाही. देशातील दलित, आदिवासी, ओबीसी या घटकाला आरक्षण हे द्यावेच लागेल. हा वर्ग शैक्षणिक आणि प्रगतीसंदर्भात मागे राहिलेला आहे. त्यामुळे इतर समाजाच्या स्तरापर्यंत हा वर्ग येईपर्यंत आरक्षणाची अशी चर्चा करता येणार नाही.

त्यामुळे आरक्षणाला तुम्ही विरोध करू नये असे मत मी त्यांच्यापुढे मांडले. विविध समाजांना विकासाला अथवा व्यवसायाला मदत करण्यासाठी विविध महामंडळे आहेत. तशा प्रकारचे महामंडळ ब्राह्मण समाजासाठी स्थापन व्हावे अशी तिसरी मागणी त्यांनी मांडली.

त्याला परशुराम हे नाव सुचवण्यात आले आहे. मात्र हा प्रश्न माझ्या संबंधात नसून राज्य सरकारशी निगडीत आहे. त्यामुळे संदर्भात मुख्यमंत्र्यांना याची माहिती देऊन, मुख्यमंत्र्यांशी चर्चा करण्यासाठी त्यांच्याकडे बैठकीसाठी वेळ मागू, असे मी सर्वांना आश्वस्त केले. यानंतर ही बैठक संपली.

माझ्या मते राज्यात वातावरण खराब होईल असे वाटत नाही. पण जबाबदार लोकांनी, जबाबदार राजकीय पक्षाच्या घटकांनी केलेल्या काही विधानांच्या संबंधी एखादा वर्ग किंवा समाज अस्वस्थ होऊ शकतो. त्यात गैरसमज असतील तर जाणकारांनी ते दूर करण्याची काळजी घ्यावी.

तसेच अशी स्थिती होणार नाही याचीही काळजी घ्यावी, अशीच चर्चा ही आजच्या बैठकीत दोन्ही बाजूकडून झालेली आहे. पेट्रोल-डिझेल इम्पोर्ट केल्यानंतर पहिला टॅक्स हा केंद्र सरकार घेतं. या टॅक्सची लिमिट हे केंद्र करतं. त्यानंतर राज्ये करतात.

पहिला टॅक्स जो केंद्राचाच इतका होता की त्यामुळे राज्य सरकारला आपला टॅक्स वाढवावा लागत होता किंवा कमी करण्यासाठी स्कोप नव्हता.

आता राज्यावर अजिबात संकट येणार नाही इतका जर केंद्र सरकारने टॅक्स कमी केला असेल तर त्याचा परिणाम होईल. नाहीतर ठीक आहे, अजिबातच नाही म्हणण्यापेक्षा एक पाऊल टाकले एवढाच निष्कर्ष काढता येईल.

राज्यसभेमध्ये राष्ट्रवादी काँग्रेस पक्षाची एकच जागा आहे. ही जागा निर्वाचित करण्यासाठी आवश्यक नंबर आमच्याकडे आहे. एक जागा निवडून देऊनही काही मते शिल्लक आहेत. दोन वर्षांपूर्वी ज्या निवडणुका झाल्या त्यावेळी सुद्धा एकच जागा मिळत होती.

मात्र मी मुख्यमंत्र्यांना दोन जागा राष्ट्रवादीला मिळाव्यात अशी विनंती केली. तेव्हा मी व फौजिया खान दोघांच्या जागा होत्या. त्यामुळे शिवसेनेने त्यावेळी माघार घेतली. मात्र पुढच्यावेळी दुसरी जागा ही शिवसेनेला द्यावी ही मागणी त्यांनी केली ती आम्ही मान्य केली.

त्यामुळे एक जागा लढवून उर्वरित मतही शिवसेनेच्या उमेदवाराशिवाय कोणालाही देऊ शकत नाही. शिवसेना जे नाव देईल त्याला आमचा पाठिंबा असेल.

महागाई, बेरोजगारी, कायदा सुव्यवस्था या सगळ्या मूलभूत प्रश्नांकडून लक्ष विचलित करण्यासाठी सत्ताधारी पक्षाकडून नवे प्रश्न उपस्थितीत केले जात आहेत. त्याचा सामान्य माणसाला काही फरक पडत नाही.

सामान्य माणसाला प्रश्न आहे त्याच्या मुलाच्या नोकरीचा, त्याचा प्रपंच चालवण्यासाठी ज्या गोष्टी लागतात त्याच्या किमतीचा प्रश्न आहे. हे प्रश्न आजचे केंद्रातले राज्यकर्ते सोडवू शकत नाहीत.

त्यामुळे नाही त्या गोष्टींना लक्ष्य करून कारण नसताना समाजा समाजात अस्वस्थता निर्माण करण्याचा जाणीवपूर्वक प्रयत्न दिसतोय. कोर्टाने नवाब मलिक यांचे दाऊदशी संबंध आहेत असे केवळ मत नमूद केले आहे, त्यांचा हा निर्णय नाही. गेली अनेक वर्षे मी नवाब मलिक यांना ओळखतो.

माझ्या मनात मलिक यांच्या इंटेग्रिटीबद्दल अशा चुकीच्या लोकांशी संबंध ठेवण्यासंबंधी विश्वास नाही. असे आरोप केले जातात. याचे उदाहरण मी स्वत: आहे. माझ्यावरही असेच अनेक आरोप केले होते.

शेवटी ज्यांनी आरोप केले त्यांच्या हातात सत्ता आल्यानंतर त्यांनी विधिमंडळात भाषण करून सांगितले की आम्ही जी टीका करत होतो त्यात काही तथ्य नाही. केवळ विरोधासाठी विरोध म्हणून बोलत होतो. माझी खात्री आहे संपूर्ण चित्र समोर आल्यानंतरच नवाब मलिक यांची स्थिती स्पष्ट होईल.