Thread by @MSivaRajan7

#சைவ_வைணவ_ஒற்றுமை

சைவ- வைணவ ஒற்றுமை பேசிய பொய்கையாழ்வாரின் திரு அவதார நாளான ஐப்பசி திருவோணம்  இன்று.

அரனும் அரியும் ஒன்றே’  என்று கூறும் முதல் குரல், ஆழ்வார்களில் முதல்வரான பொய்கையாழ்வாரின் குரல்.

பொய்கையாழ்வாரின் முதல் திருவந்தாதியில் ஒரு பாசுரத்தில்,

அரன் நாரணன் நாமம் ஆன்விடை புள் ஊர்தி
உரை நூல் மறை உறையும் கோயில் வரை நீர்
கருமம் அழிப்பு அளிப்பு கையது வேல் நேமி
உருவம் எரி கார் மேனி ஒன்று. (5)
-என்றவாறு,

“அரன்,  நாராயணன் ஆகியவை உனது பெயர்கள். எருது, கருடன் ஆகியவை உம் வாகனங்கள்.

ஆகமமும் வேதமும் உன் பெருமை பறைசாற்றும் நூல்கள்.

மலையும் (கைலாய மலை) கடலும் (திருப்பாற்கடல்) உன் இருப்பிடங்கள்.

அழித்தலும், காத்தலும் நினது தொழில்கள்.

வேற்படையும், சக்கரப் படையும் நின் ஆயுதங்கள்.

தீயின் சிவப்பும், கார் மேகத்தின் கருப்பும் நின் உருவம்.

ஆயினும் உடல் – ஒன்றே!” என்கிறார்.

பொய்கையாழ்வார் தம் இன்னுமொரு பாசுரத்தில், ஒருவருக்குள் ஒருவர் உறைவதை எடுத்துக் காட்டியிருப்பார்.

பொன் திகழு மேனிப் புரிசடை அம் புண்ணியனும்,
நின்று உலகம் தாய நெடுமாலும் - என்றும்
இருவர் அங்கத்தால் திரிவரேலும் ஒருவன்
ஒருவன் அங்கத்து என்றும் உளன் (98)

“பொன் நிற உடலும் பின்னிய சடையும் கொண்ட சிவபெருமானும், நின்று கொண்டே உலகை அளந்த நெடிய திருமாலும், எப்போதும் இரண்டு வடிவங்களில் திரிவார்கள் என்றாலும், சிவன் திருமாலின் உடம்பாக இருக்கிறான்.

திருமால் சிவனுக்குள் உறைபவனாய் அவன் வாழ்வுக்குக் காரணம் ஆகிறான்” என்று விசிஷ்டாத்வைத தத்துவப் பொருளையும் பேசுகிறார்.

கைய வலம்புரியும் நேமியும்; கார்வண்ணத்து
ஐய! மலர்மகன் நின் ஆகத்தாள்; செய்ய
மறையான் நின் உந்தியான்; மாமதிள் மூன்று எய்த
இறையான் நின் ஆகத்து இறை (28)

“கையில் சங்கு, சக்கரம் கொண்டு இலங்கும் மேகவர்ண மேனி கொண்டவனான நின் அருகில் இலக்குமி இருக்கிறாள்.

உன் உந்திக் கமலத்தில் பிரமன் இருக்கிறான்.

முப்புரம் எரித்த சிவபெருமானும் உன் உடலின் ஒரு பாகம்தான்” என்கிறார்.

இன்று ஐப்பசி  மாதம்  திருவோணம் நட்சத்திரம். பொய்கையாழ்வார் திருவடிகளை வணங்குவோம்.

#பொய்கையாழ்வார்_சிறப்புகள்

#பொய்கையாழ்வார்_திருவடிகள்_சரணம்

#சைவ_வைணவ_ஒற்றுமை_பேசிய_பொய்கையாழ்வார்