Thread by @ThanjaiMadhavan

த‌மிழ‌ர் வாழ்வில் பாட்டுப் பண்பாடு...!

பழங்காலத்திலிருந்தே எந்தத் தொழிலில் ஈடுபட்டாலும், பாடிக்கொண்டே தொழில் செய்வது தமிழரின் உடலில் ஊறிப்போன வழக்கம்.

ஏற்றப்பாட்டுக்கு எதிர்ப்பாட்டில்லை என்பார்கள். குன்றக்குறவர் கிளியோட்டுவது முதல் நெய்தல் நிலத்தில் கலஞ்செலுத்தும் கப்பல்...

பாட்டுவரை தமிழர் வாழ்வில் பாட்டில்லாத தொழிலில்லை.

பயிர் நடும்போதும், களை எடுக்கும்போதும், நெல்லிடிக்கும் போதும், குழந்தைக்குத் தாலாட்டுப் பாடும்போதும் மனம் உருகிப் பாடுவார்கள்.

மாடுமேய்க்கும் போது ஊதிய புல்லாங்குழல் அனைத்துயிர்களையும் தன்வயப்படுத்தும் ஆற்றல் கொண்டது.

விழாக் காலங்களிலும் பாட்டுக்கும் ஆட்டத்திற்கும் குறைவே இல்லை.

போர்க் காலங்களில் கூட எண்ணிலாத பாடல்கள் பாடியிருக்கின்றனர்.

அரசனின் தேரின் முன் பாடப்படுவது #முன்தேர்க்குரவை, தேரின் பின்பாடுவது #பின்தேர்க்குரவை.

தெய்வ வழிபாட்டின்போது குரவையாடிப் பாடுவது மரபாக இருந்தது.

#கழங்கு, #அம்மானை, #தோணோக்கம், #தெள்ளேணம் என்னும் மகளிர் ஆடல் பாடல்கள்கூட தெய்வப் பாடல்களாகிவிட்டதைத் திருவாசகத்தில் காண்கிறோம்.

அரசன் பாட்டுக் கேட்டே தூங்கவேண்டும். பாட்டுக் கேட்டே விழித்தெழ வேண்டும்.

இப்பாடல்களுக்கு முறையே #கண்படைநிலை, #துயிலெடைநிலை என்று பெயரிட்டனர்.

இதற்கென்றே அமர்த்தப்பட்ட இசை வல்லுநர்க்கு 'கண்படைநிலைப் பாணர்', 'துயிலெடை நிலைப் பாணர்' என்று பெயரிருந்ததாக அறிகிறோம்.

குழந்தை பிறந்தவுடன் தாலாட்டுப் பாட்டு. குழந்தை பருவத்தில் பாடுதற்கென்றே பிள்ளைத்தமிழ்ப் பாடல்கள் எழுதப்பட்டன.

குழந்தைகளுக்கென்றே விடுகதைகளாகவும், குருவி காக்கைப் பாடல்களாகவும் கதைபொதி பாடல்களாகவும் எழுதப்பெற்றன.

சிறுவர்
விளையாட்டுகளுக்கென்றேயமந்த சிறுவர் பாடல்கள் பல உண்டு.

சிறுவர் சிறுமியர் குமரப்பருவம் எய்தியதும் கும்மி கோலாட்டம், ஒயிலாட்டம், தேவராட்டம், மயிலாட்டம், கரகாட்டம் போன்ற

பல்வேறு கூட்டுப்பாடல்கள் ஆடல்களில் ஈடுபடுகின்றனர்.

இல்லறத்தில் பூப்புநீராட்டு, திருமணம் போன்ற நிகழ்ச்சிகளில் நலங்குப் பாடல்கள், வாழ்த்துப் பாடல்கள், கேலிப்பாடல்கள், கதைபொதிப் பாடல்கள் எனப் பல்வகைப் பாடல்களைப் பாடுகின்றனர்.

காலைப்பண், நண்பகல்பண், மாலைப்பண், இரவுப்பண், யாமப்பண், விடியல்பண் என்று நேரத்திற்கேற்பப் பண் வகுத்தமுறை தமிழர்க்கே உரிய தனிப்பண்பாகும்.

பழங்காலத்தில் 11,991 பண்கள் இருந்ததாகக் கூறுவர். புண்பட்ட வீரர்க்கும், நோய்வாய்ப்பட்டோர்க்கும் காஞ்சிப்பண் பாடினர்.

இறந்தபின் ஒப்பாரிப் பாடல்கள் தமிழர் வாழ்வில் ஒப்பற்ற இடத்தைப் பெற்றிருப்பதை யாவரும் அறிவர்.

பிறப்பு முதல் இறப்புவரை பாட்டுப் பாடாத நிகழ்ச்சிகளே இல்லை எனலாம்.

இசைத்து உரைநடையாகச் சொல்வதைவிடப் பாட்டாக
இனிமையாகச் சொல்லும்போது கேட்போர் நெஞ்சம் நெகிழ்கிறது.

கல்மனம் படைத்தவனும் கனிந்த மனமுடைய பண்பாட்டாளன் ஆகிறான். இதனால் தமிழில் உரைநடை நூல்கள் பெருகவில்லை.

மருத்துவம், கணிதம், கணியம் (சோதிடம்), சமயம் போன்ற அத்தனையும் செய்யுளாகவே இயற்றப்பட்டுள்ளன.

தமிழில் இயற்றப்பட்ட பாடல்களுக்கு இசை வல்லுநர்கள் தாளங்கூட்டிப் பண்ணமைத்துள்ளனர்.

பண்ணமைத்தவர் பெயரும் அதே பாடலில் கூறப்பட்டுள்ளது. இதற்குப் பரிபாடல் தக்க சான்றாகும்.

தெய்வங்களைப் போற்றிப்பாடும் பாடல்களுக்குத் #தேவபாணி என்று பெயர் வழங்கியது. 108 தாளங்கள் பின்னணியில் 108 இசைக்கருவிகள் முழங்கச் சிவபெருமான் மகேந்திரமலையில் 108 தாண்டவங்களை ஆடிக்காட்டினார் என்பர்

இசைக்கருவிகளின் பெருக்கமே எண்ணிறந்த #சிந்து, #தெம்மாங்கு போன்ற நாட்டுப்புறப்பாடல் வகைகளைத் தோற்றுவித்துப் பின்னர்,

தாளக்கட்டும் #ஆலாபனை என்னும் #பண்ணத்தி ஒழுங்கும் #சுரம் மற்றும் #குரல்மட்டம் (ஸ்தாயி) போன்றவற்றின் கட்டுக்கோப்பும் சீரமைக்கப்பட்ட பண்வகைகள்...

#வேத்தியல் (சாகித்திய இசை - கருநாடக இசை) இசை எனப் பாகுபாடு பெற்றன.

ஏனையவை பொதுவியல் இசை எனக் குறிக்கப்பட்டன.

ஏழிசையாய் இசைப்பயனாய் நின்ற தமிழர் வாழ்வில் பண்ணமைந்த பாடல்களும், நாட்டுப்புற இசை தழுவிய பாடல்களும் இரண்டறக் கலந்து பின்னிப் பிணைந்து அமைந்தன.

உலகத்தமிழர் அனைவரும் இக்காலத்திலும் அனைத்து நிகழ்ச்சிகளும் தனித்தோ, கூட்டாகவோ பாடி மகிழ்ந்து, தமிழரின் இசை மரபை இடையறுந்து போகாமல் தொடர்ந்து காக்க வேண்டும்.

இயலிசை நாடகம் என முத்தமிழ் வளர்த்த தமிழ் வேந்தரின் நோக்கத்தை விடாது காப்பாற்ற வேண்டும்.

- நன்று.