🧵 چەند خاڵێک سەبارەت بە گرنگی هەڵسەنگاندنی تاکتیکی و ستراتیژیکی شەفافانەی حیزبە سیاسیەکانمان لەسەر بارودۆخی ڕاپەڕین و هەلومەرجی سیاسی ئێستا. ئەم خاڵانە گرنگن بۆ بەرچاوڕوونی خەڵک و دەرفەت رەخساندن بۆ گۆڕینی بارودۆخەکە. #كوردستان #ژن_ژیان_ئازادی #ژینا_ئەمینی
ئێمە چەندین خاڵی بەهێزی تاکتیکی و ستراتیژیمان هەیە، بەڵام لە هەمانکات دا کەموکوڕی گرنگمان هەیە کە پێویستە چارەسەر بکرێن و هەڵسەنگاندنیان بۆ بکرێ. هێزی سەرەکی ئێمە لە توانای کۆکردنەوە و ئاراستەکردنی خەڵکە، کە گرێدراوی جێگا و پێگای سیاسی و پەیوەندیمانە لەگەڵ گەلی خۆمانەوە.
بەڵام لە هەمانکات دا چەندین خاڵی لاوازمان هەیە کە پێویستە چارەسەر بکرێن. لەوانە نەبوونی کۆمینیکاسیۆنی روون و شەفاف، شێوازی گفتوگۆکردنمان لەگەڵ لایەنە فارسەکان، نەبوونی هاوپەیمانی کاریگەر و بەکارهێنانی تۆڕە کۆمەڵایەتییەکان بە شێوەی ناکاریگەر.
١.پێویستە بە ڕوونی ئامانجەکانمان و ڕوانگە و هەڵسەنگاندنی سیاسیمان بە شێوەیەکی شەفاف بگەیەنین بە خەڵک. شکست دەخۆین ئەگەر کۆمینیکاسیۆنمان ڕوون و شەفاف نەبێ لەگەڵ گەلی خۆمان بۆ ئەوە هەندێک گرووپی فارس رازی بکەین، چونکە دەبێتە هۆی ئەوە کە گەلی خۆمان نیگەران و دوودڵ بن لە کارەکانمان.
هەڵەیە کە دوودڵ بین یان بترسین لە گەیاندنی هەڵوێستە سیاسییەکانمان بە شێوەیەکی شەفاف و ڕوون هەم بە لایەنە فارسەکان و هەم بە گەلی خۆمان لەسەر پرسە هەستیارەکان.
هەڵەیە ئەگەر پێمان وا بێ کە دەتوانین بە کەمڕەنگکردنەوەی داواکارییەکانمان ڕێبکەوین لەگەڵ ئەو لایەنانە کە هیچ هاوبەشییەکی سیاسی و باهیمان لەگەڵ نییە.
بۆیە گرنگە کە وزە و کات لەسەر شەفافیەت و کۆمنیکاسیۆن لەگەڵ گەلی خۆمان دابنێین و ئەولەویەت بدەین بە بەرژەوەندییەکانی گەلی خۆمان. ئەمە دەبێ لە هەموو کاتێکدا لە پێشەنگدا بێ. متمانە بە حیزبە سیاسییەکانمان لە ناو گەلی خۆمان هەمیشە فاکتەری سەرەکی دەبێت بۆ کاریگەری سیاسیمان.
٢. هەرچەندە دروستە کە دەبێ گفتوگۆ لەگەڵ هەموو لایەنەکان بکرێت، بەڵام ئەمه دەبێ به بێ سازشکردن لەسەد داخوازییه سیاسی یان بەهاکانمان بکرێ و نابێ شەرعییەت بدرێ به ئەو لایەنە فارسانە که هەمان سیاسەتی ڕژیمیان هەیە بەرامبەر بە نەتەوەی کورد.
لە هەمان کاتدا دووڕیانێکمان هەیە، ناتوانین هەندێک گرووپ پشتگوێ بخەین. گرنگە تێبگەین کە نەیارانی سیاسی و نەتەوەیی وەکوو سەڵتەنەت تەڵەبەکان هەرگیز بەها، ئامانج، داواکاری و بەرژەوەندی ئێمە قەبووڵ ناکەن. دەبێت هێڵێکی دیاریکراو لە نێوان ئامانجەکانمان و ئەو گرووپانەدا بکێشین.
قەبووڵ نەکردنی ئەمە دەبێتە هۆی ئەوە کە ئەو گرووپە ڕاستڕەو و توندڕەوە ڕەگەزپەرەستە فارسانە لە داهاتوو دا ببنە هەڕەشەیەکی وجودی بۆ سەر نەتەوەی کورد. ئەم لایەنە، ئەگەر بتوانن، هەمان سیاسەتی ڕژێم لە دژی ئێمە پێڕەو دەکەن.
هەر بۆیە دەبێ سیاسەتێک پەێڕەو بکەین کە گوشاری زیاتر بخەینە سەر ڕێژیم بە بێ ئەوە شەرعییەت بدەین بە گرووپ و لایەنی فاشیستی توندڕەوی فارس. هەر چەندێ وڵامێکی ڕوونمان نییه بۆ ئەوە که کام لایەنی فارس له نێوخۆی ئێراندا کاریگەری زیاتری هەیه، دەبێ بایەخ بەو لایەنانە بدەین کە دژمان نییە.
زۆر گرنگە هێز کۆبکەینەوە بە دژی ڕژیم، بەڵام ئەمە بە هیچ شێوەیەک لەگەڵ سەڵتەنەت تەڵەبەکان و گرووپە ڕاستڕەوە توندڕەوەکان ناکرێ. ئەمەش دەمانباتە سەر کێشەی سێیەممان.
٣.پێویستە هاوپەیمانی و هەماهەنگی لەگەڵ لایەنە سیاسییەکانی دیکە بکەین، بەڵام نابێ لەگەڵ ئەو لایەنانە نزیکایەتی بکەین کە دەتوانن ببن بە هەڕەشە بۆ سەر کورد. دەبێ زیاتر بایەخ بە هاوپەیمانی لەگەڵ نەتەوەکانی دیکە و ئەو ڕێکخراو و کەسایەتیە فارسانە کە لە بواری سیاسیەوە نزیکمانن بدەین.
کێشەکە لەوەدایە کە تا ئێستا لەسەر حیسابی هاوپەیمانە سروشتیەکانمان بایەخی ناجێمان داوە بە گفتوگۆ لەگەڵ توندڕەوترین نەیارە سیاسییەکانمان. لەجیاتی قسەکردن لەگەڵ ناسیۆنالیستە ڕاستڕەوە فارسەکان کە هیچ هاوبەشیمان لەگەڵیاندا نییە، پێویستە وزە لەسەر نەتەوەکانی دیکەی ئێران دابنێین.
هاوپەیمانە سروشتییەکانمان نەتەوە جیاوازەکان و گرووپ و تاکی فارسی دیموکراتیکن. کورد دەتوانێ ببێ بە ناوەندی کۆکردنەوەی ئەم لایەنە، هەر بۆیە پێویستە کار لەسەر بەهێزکردن و پشتگیریکردنیان بکەین.
٤.ئێمە لە سەرەتای ئەم ڕاپەڕینەدا لە بواری گوفتماندا پێشڕەو بووین، بۆ نموونە بەها و دروشمەکانی وەک ژن، ژیان، ئازادی و پرسی فێدرالیسم زاڵ بوو. بەڵام لەم ئاخرانەدا زیاتر کاردانەوەی گوفتمانیمان هەبووە، بەتایبەتی بەرامبەر بە گوفتمانی ڕاستڕەوە توندڕەوەکانی سەڵتەنەت تەڵەبەکان.
بەشێک لەم کێشەیە پەیوەندی بە نەبوونی هەماهەنگی میدیایی بەکۆمەڵمانەوە هەیە، بەتایبەتی لە تۆڕە کۆمەڵایەتییەکان. کورد و گەلانی دیکە لە فەیسبووک چالاکترن تا تویتەر، کە ئامرازێکی بەهێزترە بۆ بڵاوکردنەوەی زانیاری و پرسی سیاسی.
کورد لە تویتەر سەرنجیان لەسەر وەڵامدانەوەی دەنگە ڕاستڕەوە توندڕەوەکانن لە جیاتی پشتیوانیکردن و بەرزکردنەوەی دەنگی یەکتر. فاڵۆوەر، لایک و ڕیتویتەکان کاریگەری لە سەر ناوخۆی ئێران دانانێ، بەڵام لە ڕوانگەی لایەنی دەرەکی وەکوو نیشانەی کەم یان زۆربوونی پشتیوانی سیاسی دەبیندرێ.
هەر بۆیە پێویستە باشتر کەڵک لە تۆڕە کۆمەڵایەتییەکان وەربگرین بۆ ئەوە بتوانین بە شێوەیەکی فراوانتر خەڵک هوشیار بکەینەوە سەبارەت بە دۆزی خۆمان و ئەو پرسە چارەنووسسازانە کە ڕاستەوخۆ کاریگەری لەسەر گەیشتن بە ئامانجەکانمان دادەنێ.
بێجگە لەم خاڵانەی سەرەوە پێویستە لە چەند مانگی داهاتوو دا:
-ئەگەر بانگەواز بۆ خۆپیشاندان دەدەین دەبێ بەرنامەڕیزی بکەین کە خۆپیشاندانەکان بەشێوەیەک کاریگەریان هەبێ و فشاری گشتی لەسەر ڕێژیم دابنێ بێ ئەوە لایەنی ڕاستڕەوی فارس بتوانێ کەڵکی سیاسی یان ڕاگەیاندنی لێ وەربگرێ.
-ئەگەر بانگەواز بۆ خۆپیشاندان دەدەین دەبێ بەرنامەڕیزی بکەین کە خۆپیشاندانەکان بەشێوەیەک کاریگەریان هەبێ و فشاری گشتی لەسەر ڕێژیم دابنێ بێ ئەوە لایەنی ڕاستڕەوی فارس بتوانێ کەڵکی سیاسی یان ڕاگەیاندنی لێ وەربگرێ.
- هاوسەنگی ڕابگرین لە نێوان خۆگونجاندن لەگەڵ پێشهاتە نادیارەکان و داواکاری و بەها سیاسییەکانمان. تاکتیک و ستراتیژی بەپێی پێویست ڕێکبخەین، بەڵام هەرگیز سازش لەسەر بیروباوەڕ و داواکاریەکانمان نەکەین.
- تەرکیز لەسەر گۆڕانی ڕژێم دابنێین و دووربکەوینەوە لە سەرقاڵبوون بەو پرسانە کە لایەنە ڕاستڕەوە فارسەکان هەوڵ دەدەن زەقی بکەنەوە. ئەمەش پێویستی بە دیسیپلین و تێگەیشتنێکی ڕوون لە بواری ئەولەویەتەکانمان هەیە.
• • •
Missing some Tweet in this thread? You can try to
force a refresh
