Thread by @PreetiSK1103

शिक्षणासाठी अंगावरला डाग मोडायला दिला, आई म्हणाली तू हायेस तर डाग आहे...
“संतोषच्या शिक्षणासाठी अंगावरला डाग मोडायला दिला मी. झुंबर आणि कानातली फुलं दिली. त्यानं मला म्हटलं की, अक्का मला शाळाच शिकायची नाही. म्हटलं, का रं बाळा? तर तो म्हटला, तू अंगावरला डाग मोडायलीस. अरं म्हटलं,

अरं म्हटलं, तू हायेस तर डाग आहे. मला बाकी काही नको.”
एवढं बोलल्यानंतर सरुबाईंच्या डोळ्यातून पाणी वाहायला लागलं. सरुबाई या त्या महिलांचं प्रतिनिधित्व करतात, ज्या शेतशिवारात, घरादारात अखंड राबत आमच्यासारख्या मुलांच्या शिक्षणासाठी स्वत:च्या आवडीनिवडींना तिलांजली देतात.

का तर आपण जे भोगलं, ते पोरांच्या नशीबी येऊ नये म्हणून. याचं त्यांना कुणीही, कुठेही क्रेडिट देत नाही. पण, त्यांचा संघर्ष कायम सुरू असतो.
एमपीएससीनं नुकत्याच जाहीर केलेल्या निकालात सरुबाई आणि अजिनाथ खाडे या ऊसतोड मजुरांचा मुलगा संतोष खाडे राज्यातून सर्वसाधारण यादीत 16 व्या,

तर एनटीडी संवर्गातून पहिल्या क्रमांकानं उत्तीर्ण झालाय. याचं श्रेय संतोष आई-वडिलांना देतो आणि ते द्यायलाही हवं.संतोषचे आई-वडील गेल्या 30 वर्षांपासून ऊसतोडीला जातात. यंदा मात्र मुलाच्या यशामुळे त्यांच्या हातातील ऊसतोडीचा कोयता कायमचा सुटणार आहे.

या दोघांनी ज्या हिंमतीनं, कष्टानं संतोषला शिकवलं, ते ऐकून मला माझे आई-वडील आठवले आणि डोळ्यात पाणी आलं. संतोषचे वडील अपंग आहेत. त्यांना एका पायानं व्यवस्थित चालता येत नाही. अशास्थितीत ऊसतोडीला गेल्यानंतर संतोषची आई सरुबाई याच ऊसाची मोळी एका ठिकाणाहून दुसऱ्या ठिकाणी नेत असे.

गेल्या 30 वर्षांच्या या अंग मेहनतीमुळे त्यांचा कमरेचा आणि मानेचा दोन्ही मणके वाकडे झालेत. पण मुलाच्या शिक्षणासाठी पैसे लागत असल्यामुळे त्या कधीही दवाखान्यात गेल्या नाहीत. त्यांच्यात भाषेत सांगायचं झालं तर फुटू (एक्स रे वगैरे) काढला नाही.

काही दिवसांपूर्वी बीडच्याच महेश नागरगोजे यांची बातमी केली होती. महेश ११ महिन्यांचे असताना त्यांच्या वडिलांचं निधन झालं. तेव्हापासून त्यांच्या आईनं अक्षरश: विहिरीवर कामाला जाऊन, मजुरी करुन महेश यांना शिकवलं. शाळेत भात शिजवण्याचं काम त्या गेल्या १५ हून अधिक वर्षांपासून करत आहेत.

याच महेश यांना प्रतिष्ठित डॉ.मेरी क्यूरी फेलोशिप मिळाली आहे. तीही तब्बल १ कोटी ७० लाखांची.महेशनं त्यांच्या या यशाचं श्रेय आई गयाबाई नागरगोजे यांना दिलंय.
संतोष आणि महेश या दोघांच्या यशाचा इम्पॅक्ट फार मोठा असणार आहे. हे दोघेही त्या बीड जिल्ह्यातून ज्याला दुष्काळी, ऊसतोड मजुरांचा,

शेतकरी आत्महत्येचा जिल्हा म्हणून, भाग म्हणून कायम हिणवलं जातंय, तीच तीच प्रतिमा बिंबवली जातेय. या दोघांनी त्यांच्या या यशातून या प्रतिमेला वेशीवर टांगायचं काम केलं आहे. आणि मला ते जास्त महत्त्वाचं वाटतंय.संतोषमुळे तर त्याच्या भागातील ऊसतोड मजुरांच्या मुलांमध्ये

आत्मविश्वास निर्माण झालाय. एक शिक्षक तर सांगत होते की, त्यांचा मुलगा त्यांना म्हणतो की, ‘’बाबा तुम्ही ऊसतोडीला जा, मग मीही कलेक्टर होईन.”
महेश नागरगोजे यांचा व्हीडिओही काही ठिकाणी शाळांमध्ये, तर काही ठिकाणी घरांमध्ये लोक आपापल्या मुलांना दाखवत आहेत.

इतका जबरदस्त इम्पॅक्ट या दोघांच्या यशाचा आहे, बीड पॅटर्नचा आहे. असे संतोष, महेश नियमितपणे घडत राहोत, इतरांना जगण्याची नवीन उमेद देत राहोत.
- भानुदास पाटील

#coppied