Thread by @anbezhil12

#திருக்காமீஸ்வரர்_திருக்கோயில் வில்லியனூர்
இத்தலத்தில் இறைவன் திருக்காமீஸ்வரர் என்ற திருநாமத்துடன் சுயம்பு மூர்த்தியாய் அருள்புரிகிறார். ஒரு சமயம் பெருமாளுக்கும் பிரம்மாவுக்கும் தங்களில் யார் பெரியவர் என்ற போட்டி ஏற்பட்டது. இதனால் இருவரும் சிவனிடம் சென்று முறையிட்டனர். சிவனும்

அவர்கள் இருவரில் யார் தன் அடியையும் முடியையும் முதலில் காண்கிறார்களோ அவரே பெரியவர் எனக் கூறினார். இருவரும் அடி முடி தேடிச் சென்றனர். அப்போது பிரம்மா தான் போட்டியில் வெல்லும் நோக்கில் சிவனின் முடியைக் கண்டதாக பொய் கூறிவிடுகிறார். பொய் கூறியதால் அவருக்கு சாபம் ஏற்பட்டது. அந்த

சாபத்தை போக்க அருளுமாறு சிவனிடம் வேண்டினார். சிவனும் தொண்டை நாட்டில் முத்தாறு நதிக்கரையில் வில்வ வனம் படைத்து அதில் சிவ பூஜை செய்தால் சாபம் நீங்கும் என கூறி மறைந்தார். பிரம்மனும் சிவன் கூறியபடி பிரம்ம தீர்த்தம் உண்டாக்கி இத்தலத்தில் சிவ பூஜை செய்து சாபத்தில் இருந்து விடுபட்டார்.

வில்வ காடாய் இருந்ததால் வில்வநல்லூர் என்று அழைக்கப்பட்டு பின்னர் மருவி வில்லியனூர் என்றாகியது. இத்தலத்து இறைவன் மீது பங்குனி மாதத்தில் மூன்று நாட்கள் சூரிய ஒளி படுகின்றது. இத்தலத்து அம்மன் முன் இரண்டு நந்திகள் இருப்பது சிறப்பாகும். இங்கு பைரவர் தனது நாய் வாகனம் இல்லாதிருப்பதால்

இத்தலம் முக்தி தளமாக விளங்குகிறது. இக்கோயிலின் உள்ளே வடபுறத்தில் பிரம்ம தேவரால் ஏற்படுத்தப்பட்ட பிரம்ம தீர்த்தம் மிகப்பிரம்மாண்டமாக நடுவில் மஞ்சள் நிறத்தில் தக தகவென்று காட்சி தரும் நீராழி மண்டபத்துடன் காட்சி தருகிறது. குஷ்ட நோயால் பாதிக்கப் பட்டவர்கள் இத்தல தீர்த்தத்தில் நீராடி

சிவனை வழிபட்டால் குணமடையும் என்பது நம்பிக்கை. மண்டபத்தின் முடிவில், கோபுர வாசலின் வலது புறத்தில் விநாயகரின் சன்னதியும் இடப்புறத்தில் வள்ளி தெய்வானை சமேத ஆறுமுருகப்பெருமான் சன்னதியும் உள்ளது. ராஜகோபுரத்தின் ஒரு நமக்கு வலதுபுறத்தில் அதிகார நந்தி மற்றும் சுயசாம்பிகை ஆகியோர் உள்ளனர்.

பிரகாரத்தில் சமயக் குறவர்களான திருஞானசம்பந்தர், திருநாவுக்கரசர், மாணிக்கவாசகர் ஆகியோரையும், சந்தான குறவர்களான மெய் கண்டார், அருணந்தி சிவாச்சாரியார், மறைஞான சம்பந்தர், உமாபதி சிவாச்சாரியார், பொள்ளாப் பிள்ளையார் ஆகியோருடன் 63 நாயன்மார்களின் திருவுருவச் சிலைகள் பிரதிஷ்டை சரி செய்யப்

பட்டு உள்ளது. ஈசனின் கருவறை பின்புற கோஷ்டத்தில் பெருமான் காட்சி தருகிறார் பிராகாரம் வலம் வரும்போது பிரம்மா துர்க்கை ஆகியோர் காணலாம். கருவறையில் அம்பிகை அருள் மிகு கோகிலாம்பாள் என்ற திருப்பெயருடன் காட்சி தருகிறார். சிவபெருமானின் சன்னதியைப் பார்த்தபடி ஒரு நந்தியும் அம்பிகையின்

சன்னதியைப் பார்த்தபடி மற்றொரு நந்தியும் பிரதிஷ்டை செய்யப்பட்டிருக்கிறது. அம்பிகை சன்னதியில் பார்த்தபடி உள்ள நந்திக்கு முன்பாக மற்றொரு சிறிய நந்தி அஷ்டபந்தனம் சாத்தாமல் உள்ளது. அந்த நந்தியைச் சுகப்பிரசவ நந்தி என்று கூறுகின்றனர். பிரசவ வேதனையால் துடித்துக் கொண்டிருப்பவர்கள் இங்கு

வந்து சுகப்பிரசவ நந்திக்கு அபிஷேகம் செய்து, பிறகு அந்த நந்தியின் முகத்தை தெற்குப் பக்கமாக இருக்கும்படி திருப்பி வைத்து விட்டால் சுகப்பிரசவம் நடக்கும் என்பது பக்தர்களின் நம்பிக்கையாக உள்ளது. பின்னர் வேண்டுதல் நிறைவேறியதும் திரும்பவும் வந்து அபிஷேகம் செய்து, நந்தியை முன்பு இருந்ததை

போலவே அம்பிகை சன்னிதி பார்க்கும்படி வைத்துவிட வேண்டும் என்கிறார்கள். இந்தப் பிரகாரத்தில் பைரவர், சூரியன், சந்திரன், நவக்கிரகங்களையும் காணலாம். முதலில் இங்கே அம்பிகை சன்னதி இல்லை பிற்காலத்தில் தர்மபாலன் என்ற மன்னன் வெண்குஷ்ட நோயால் பீடிக்கப்பட்டார். நோயில் இருந்து விடுபட தன்

குருவிடம் யோசனை கேட்டார் மன்னன். குரு கூறியபடி, வில்வ வனம் என்ற பெயரில் உள்ள பிரம்மனால் பூஜிக்கப்பட்ட திருக்காமேஸ்வரர் ஆலயத்துக்கு வந்து பிரம்ம தீர்த்தத்தில் நீராடி இறைவனை வழிபட்டார். பின்னர் அவனுடைய நோய் முற்றிலும் நீங்கியது. அப்போது அந்த குளத்திலிருந்து அம்பிகையின் திருவுருவம்

கிடைக்கவே அந்த திரு உருவத்தை எடுத்து கோகிலாம்பிகை என்ற திருப்பெயருடன் கோயிலில் பிரதிஷ்டை செய்துள்ளார். இக்கோவிலில் சித்திரை மாத பவுர்ணமி, வைகாசி விசாக பிரம்மோற்சவம், 9-ம் நாள் தேர்த்திருவிழா, ஆனித் திருமஞ்சனம், ஆடிப்பூரம், அம்பிகைக்கு பிரம்மோற்சவம், ஐப்பசி கந்தசஷ்டி, சூர சம்ஹாரம்

கார்த்திகை தீபம், மார்கழி திருவாதிரை, சங்கரபாணி நதியில் மாசி மக தீர்த்தவாரி, பங்குனியில் சூரிய பூஜை, பிரதோஷம் என இங்கே அனைத்து விழாக்களும் சிறப்புடன் நடந்து வருகிறது. ஆலய தீர்த்தம் ஹிருத்தாபநாசினி. தலவிருட்சம், வில்வமரம். சுயம்புவாகத் தோன்றிய திருமேனி, பிரம்மன் பூசித்த தலம், சோழ

மன்னன் தருமபாலனால் உருவாக்கப்பட்ட ஆலயம் - சூரியன், சந்திரன், இந்திரன், மன்மதன், ஆதிசேஷன் எனப் பலரும் வழிபட்ட தலம், சுகப் பிரசவத்திற்கு உதவும் பிரசவ நந்தியுள்ள தலம், பங்குனியில் சூரியன் வழிபடும் தலம், வில்லைப்புராணம் கொண்ட கோவில், ஆண்டுதோறும் கவர்னரும் முதல்வரும் தேர் இழுக்கும்

தலம், பிரெஞ்சு ஆட்சியில் கண்காணிப்பு கோபுரமாக விளங்கிய ராஜகோபுரம், புதுவை மாநிலத்தின் பெரிய கோவில், என வரலாற்றுப் பெருமைகள் கொண்ட கோவிலாக விளங்குவது வில்லியனூர் திருக்காமீசுவரர் திருக்கோவில். இந்த ஆலயம் தினமும் காலை 4.30 மணி - 12 மணி வரை, மாலை 4 மணி - 9 மணி வரை திறந்திருக்கும்.

புதுச்சேரி விழுப்புரம் சாலையில் 8 KM தொலைவில் இவ்வாலயம் உள்ளது. புதுச்சேரியில் இருந்து விழுப்புரம் செல்லும் பேருந்துகளில் செல்லலாம்.

சர்வம் ஸ்ரீ கிருஷ்ணார்ப்பணம்🙏