Thread by @IsintuSakithi

UNomkhubulwana:

• UNomkhubulwana uyinkosazana, uyintombi yaseZulwini. Yena ucebisa abantu ngokudla, balime bavune kugcwale izinqolobane. Igama leNkosazane leyamaniswa nokulima "ukukhubula" ngekhuba. Abantu bakwaZulu babekujabulela kakhulu ukuzibonakalisa kweNkosazana ngoba

bayazi ukuthi basuke bezelwa unyaka kavunivila, bazodla kugcwale izinqolobane.

Uma izwe lihlaselwe umkhuhlane noma kuhlasele indlala nesomiso, abadala babesuke sebazi ukuthi kukhona into embi eyenziwe isizwe ngakhoke kufanele kuhlanganiswe izibonda zezwe, kuyoshwelezwa

kulamathongo, kwakubhekwa intaba ephakeme kuyiwe kuyo kuyokwenziwa umhlatshelo wokushweleza beseke siyaphela isomiso leso noma umkhuhlane, nendlala. Kwakukholwa ukuthi uNomkhubulwana unikeza abantu izivuno ezinhle, kube nenala kuphihlike ukudla emasimini.

Le Nkosazana yabe

itshalelwa insimu yayo, ilinywa ngamakhosikazi wonke esigodi, ayeyilima ngamakhuba nemikhono. Kwakutshalwa ingxubevange yembewu, kuthi lapho komila khona kube yinto nje exubene, kungahlakulwa kungavunwa kodwa ithela iziduli zabasali, amathanga, amabele, amabhece, ummbila nakho

konke okulinywayo. Nanti igama elalihlatshelelwa mhla kulinywa le nsimu:

"Nang' uMagejana nango !
Sibiz' amabele awomame !
Wo hhaye! Buyani madoda,
Niz' ekhaya! Wo hhaye hhaye!"

Kwakuthi ngesinye isikhathi uNomkhubulwana aphiselwe uNomdede igama lotshwala ayephiselwa lona

liqondisa futhi nedili lonke nje likaNomkhubulwana obunye babusiwa ensimini yakhe, obunye buphuzwa, kuhutshwe ihubo lakhe uNomkhubulwana. Izintombi ziyamema kumbe uma izulu libalele ziphume ziye entabeni ziyocela imvula. Mhla zizovuka kuyiwe entabeni zilala ndawonye zonke

zilindwe amaqhikiza. Akulalwa ngalobo busuku kuculwa kuze kuse, kuyothi uma sekuntwela ezansi bese ziqala zilungiselela ukukhuphuka intaba. Phela zikhuphuka ziya kocela imvula eNkosazaneni uNomkhubulwana.

Usekhona usakhonzwa nanamuhla umkhosi kaNomkhubulwana ezigodini ezithile.

Le nsimu ilinywa entwasahlobo kungakanduliswa, ukuze sonke isizwe sikhululeke ekulimeni. Izintombi ziphuma namageja ziyolima insimu eyaziwa ngokuthi ekaNomkhubulwana. Ziyilima zicula kuyothi zingalindele iqale imvula. Kuvamisile ukuthi zibuye sezigijima sezinethwa imvula

isiphendulile iNkosazana. Insimu le ilinywa endaweni esithele futhi okungangeneki kalula kuyo ukuze ingabhuqwa yimpahla okuyizinkomo nezimbuzi. Kayihlakulwa futhi kayivunwa le nsimu, ize idliwe yiyo impahla ngezikhathi zamahlanga sekunguthelawayeka.

Inkonzo kaNomkhubulwana

ifezwa ngezintombi ngoba uma ekhonzwa ukhonzwa ngazo. Imicimbi eyenziwa izintombi iyayithinta inhliziyo yakhe. Noma ngabe izulu lomisile uma kuphuma izintombi ziyocela imvula, uyayidedela ngoba icelwe izintombi. Uyazazisa kakhulu izintombi ngoba naye uyintombi nto. Isiko

lokugcina izintombi limqoka kakhulu kwaZulu. Ubuntombi lobu babusiza ezindaweni eziningi zesizwe:
• Kwakusetshenziswa izintombi ukucela imvula kuNomkhubukwana.
• Yizo izintombi nto ezazikhuza imikhuhlane yabantwana.
• Yizintombi ezazilima insimu yeNkosazana.

Kuya ngezigodi ubunjalo baNomkhubulwana njengoba engakaze abonwe muntu, abantu bamchaza njengoba nabo babetsheliwe. Bonke bahlangana ekutheni uyintombi, uyinkosazana yemvula nenala.

🙌🙌🙌 Nina beNkayishana kaMenzi eyaphuza umlaza ngameva 🙌🙌🙌