Thread by @aradhya___

കഠോപനിഷത്തിലെ ആത്മദർശനം
ഭാഗം 4

#hinduculture
മൂന്നാം വല്ലിയിൽ 

സംസാര ജീവിത പ്രയാണവും ,  ബ്രഹ്മപദം നേടാനുള്ള മാർഗങ്ങളെ കുറിച്ചും ഉള്ള വിവിധ വിശദീകരണങ്ങൾ ആണ് ഉള്ളത് 1

വേര് മേല്പോട്ടു പോയി അതിസൂക്ഷ്മതയിലെത്തുന്നതും ശാഖകൾ കീഴ്പ്പോട്ട് അനന്തമായി പടർന്നു നില്ക്കുന്ന വിധത്തിലുള്ളതുമായ ഒരു മഹാവൃക്ഷമായിട്ടാണ് സംസാരത്തെ ഈ ഉപനിഷത്ത് വർണിച്ചിട്ടുള്ളത്. മുകളിലുള്ള വേരിന്മേൽ ഒന്നും ചെയ്യാതെ സാക്ഷി ഭാവത്തിൽ ഇരിക്കുന്ന ഒരു പക്ഷിയായും അതുപോലെ താഴേ 2

ശാഖയിൽ ,സംസാരവൃക്ഷത്തിലെ ഫലങ്ങളനുഭവിക്കുന്ന മറ്റൊരു പക്ഷിയായും , ജീവനെ , അതിന്റെ സാക്ഷീ രൂപത്തിലും ,വിഷയ ഫലഭോക്താവായുള്ള ബദ്ധരൂപത്തിലും വെളിവാക്കുന്നതാണ് പക്ഷി രൂപത്തിലുള്ള ഉപനിഷത്തിന്റെ കല്പന .സംസാര വൃക്ഷത്തിന്റെ ഫലങ്ങൾ അനുഭവിക്കുന്ന ശാഖയിലുള്ള പക്ഷി ബദ്ധനും ഒന്നും 3

ഭക്ഷിക്കാതെ വേരിലിരിക്കുന്ന പക്ഷി മുക്തനുമാണ് എന്ന് താല്പര്യം.

(ആറാം വല്ലിയിലും ഇതേ ഉദാഹരണം ആവർത്തിക്കപ്പെടുന്നുണ്ട് )

4

ജീവനെ രഥി രൂപത്തിലും ഇന്ദ്രിയങ്ങളെ കുതിരകളായും ചിത്രീകരിക്കുന്ന ഒരു നല്ല കല്പനയും ഈ ഉപനിഷത്തിലുണ്ട്. 

ആത്മാനം രഥിനം വിദ്ധി

ശരീരം രഥമേവ ച

ബുദ്ധിം തു സാരഥിം വിദ്ധി

മനഃ പ്രഗ്രഹമേവ ച .

ഇന്ദ്രിയാണി ഹയാനാഹുർ-

വിഷയംസ്തേഷു ഗോചരാൻ

ആത്മേന്ദ്രിയമനോയുക്തം

ഭോക്തേത്യാഹുർമനീഷിണഃ

5

(കഠോപനിഷത്ത്, അദ്ധ്യായം 1

മൂന്നാം വല്ലി ,ശ്ലോകം 3&4)

പദ്യ വിവർത്തനം :- 

ആത്മാവെ രഥിയായ് കാണൂ

ശരീരം രഥമായുമേ

ബുദ്ധി തെളിക്കുമാളായി

മനസ്സെ കടിഞ്ഞാണുമായ്

ഇന്ദ്രിയങ്ങൾ കുതിരകൾ

വിഷയങ്ങൾ പോകും വഴി

ആത്മാവിന്ദ്രിയമാനസം

ചേർന്നാൽ ജീവിത സംഗ്രഹം

6

അർത്ഥം:-

ജീവനെ രഥിയായ് സങ്കല്പിക്കൂ , ശരീരമാണ് രഥം. ഈ ശരീരത്തെ നയിക്കുന്ന സാരഥിയാണ് ബുദ്ധി. മനസ്സാകുന്ന കടിഞ്ഞാണിട്ടാണ് ശരീരത്തെ നയിക്കുന്നത്. ഈ രഥം വലിക്കുന്ന കുതിരകളാണ് ഇന്ദ്രിയങ്ങൾ. വിഷയങ്ങളിൽ കൂടിയാണ് ഇന്ദ്രിയങ്ങളാകുന്ന കുതിരകൾ വലിക്കുന്ന ഈ രഥം ഓടുന്നത്. 7

അങ്ങനെ ആത്മാവാകുന്ന രഥി, രഥമാകുന്ന ശരീരം , ഇന്ദ്രിയങ്ങളാകുന്ന കുതിരകൾ , മനസ്സാകുന്ന കടിഞ്ഞാൺ, വിഷയങ്ങളാകുന്ന വഴി എന്നി പ്രകാരം യോജിക്കപ്പെട്ടതാണ് ഈ ജീവിത രഥ പ്രയാണം.

8

ധീരനും, ബുദ്ധിക്ക്  തെളിച്ചം വന്നവനും , കാമം നശിച്ച് ശുദ്ധമനസ്സോടു കൂടിയവനും ബ്രാഹ്മീ സ്ഥിതിയെത്തുന്നു.

ഈ പൊരുളിനെ അറിയു. എഴുന്നേൽക്കു ,  ഉണരു എന്ന ഉദ്ബോധനവും , ഈ മാർഗം അത്യന്തം പ്രയാസ കരമാണെന്നും ഈ വല്ലിയിൽ പറയുന്നു.

ഉത്തിഷ്ഠത ജാഗ്രത

പ്രാപ്യ വരാൻ  നിബോധത!9

ക്ഷുരസ്യ ധാരാ നിശിതാ ദുരത്യയാ
ദുർഗം പഥസ്തത് കവയോ വദന്തി. 
അർത്ഥം :എഴുന്നേൽക്കു, പ്രമാദം വിട്ടുണരു, വരിഷ്ഠന്മാരെ പ്രാപിക്കൂ, അവരിൽ നിന്ന് ഉപനിഷത് പൊരുളിനെ അറിയൂ ക്ഷുരകന്റെ കത്തിയുടെ ധാരയിൽ നടക്കുന്നതു പോലെ പ്രയാസമാണ് ഈ മാർഗത്തിലൂടെ സഞ്ചരിക്കുന്നതെന്ന് സത്യം ദർശിച്ചവർ പറയുന്നു.10

ബാക്കി വല്ലികളിൽ ആത്മാവിനെ കുറിച്ചും അതിൻ്റെ സാക്ഷാത്കാര വഴികളെ കുറിച്ചും വെളിപ്പെടുത്തുന്നു
11

ആത്മാവ് പൂർണൻ , അദ്വൈതൻ, അനന്യൻ , അമൃതൻ , എന്ന മട്ടിലാണെന്നിരിക്കെ ഈ ആത്മാവിന് മൃത്യു ഭാവം ( ദ്വൈത ഭാവം ) എന്ന സ്ഥിതി എങ്ങനെയോ വന്നു ചേർന്നു. ഈ മൃത്യുവിന്റെ രഹസ്യം എന്താണ് എന്നാണ് കഠോപനിഷത്തിൽ നചികേതസ്സ് യമ നോട് ചോദിക്കുന്നത്. ചോദ്യം രചനയിൽ എളുപ്പമാണെന്നു തോന്നുമെങ്കിലും

12

യാഥാർഥ്യം അങ്ങനെയല്ല. വാക്കും മനസ്സും ഇന്ദ്രിയങ്ങളും എല്ലാം ദ്വൈതാവസ്ഥയിലാണ് നില്പ്. (അതായത് അന്യത്തിൽ പ്രതിഷ്ഠിതം എന്ന നിലയിൽ ) അനന്യമായി നില്ക്കുന്ന ആത്മാവിനെ 'അന്യം' എന്ന മട്ടിലല്ലാതെ വർണിക്കുവാൻ വാക്കിനോ മനസ്സിനോ മറ്റിന്ദ്രിയങ്ങൾക്കോ ശക്തിയില്ല. എത്ര തന്നെ വിസ്തരിച്ചാലും 13

വിചിത്രമായ വാക്കുകൾ കൊണ്ട് വിവരിച്ചാലും അവയിൽക്കൂടി ആത്മാവിനെ പിടിക്കുവാൻ പറ്റുകയില്ല. എങ്കിലും ഏതൊരു വിഷയത്തിന്റെ ചർച്ചയിലും സത്യനിർണയത്തിനു വാക്കല്ലാതെ മറ്റൊരുപാധി നമുക്ക് സഹായകമായി ഇല്ല.14

തുടരും

കടപ്പാട് @bsarathcp