Thread by @naddiyyaathar

این ایف سی ایوارڈ کیا ہے؟

پاکستانی حکومت مختلف ٹیکسز اور محصولات کی مد میں جو آمدنی اکٹھی کرتی ہے اس کی مرکز اور صوبوں میں تقسیم کے لیے جو کمیشن بنایا جاتا ہے اسے قومی مالیاتی کمیشن یا نیشنل فنانس کمیشن کہتے ہیں جو حرفِ عام میں این ایف سی ایوارڈ کے نام سے جانا جاتا ہے.

1973کے آئین کی شق 160کے تحت صدرپاکستان کو ہر 5سال بعدیہ کمیشن بناناہوتاہے.
کمیشن میں وفاق اور چاروں صوبوں کے دو دو ارکان نمائندگی کرتےہیں اورہر صوبائی وزیر خزانہ اس کاسرکاری رکن ہوتاہے جبکہ اس کےعلاوہ ہرصوبےسےایک غیرسرکاری رکن کی تقرری صدرمملکت صوبائی حکومتوں کی سفارش پرکرتےہیں۔

کمیشن یہ طے کرتا ہے کہ جو قابل تقسیم وسائل ہیں ان میں سے وفاق کا حصہ کتنا اور صوبوں کا کتنا ہوگا۔ اس کے بعد یہ بھی طے کیا جاتا ہے کہ صوبوں کا جو مجموعی حصہ ہے اسے چاروں کے مابین کس فارمولے کے تحت بانٹا جائے گا؟کمیشن کے تمام فیصلے اتفاق رائے سے ہوتے ہیں۔

جب ممبران کے مابین وسائل کی تقسیم پر اتفاق رائے ہو جائے تو پھر اس ایوارڈ کو اگلے پانچ سال کے لیے نافذ کر دیا جاتا ہے اور بجٹ میں وسائل کی تقسیم اسی فارمولے کے تحت کی جاتی ہے. اگر وفاق اور صوبوں کے درمیان اتفاق رائے قائم نہ ہو سکے اور نیا این ایف سی ایوارڈ جاری نہ کیا جا سکے؛

تو آخری متفقہ این ایف سی ایوارڈ کے مطابق ہی بجٹ بنتا ہے.
2010 میں پپل پارٹی کی حکومت نے ساتواں این ایف سی ایوارڈ جاری کیا تھا، اس کے بعد آٹھویں اور نویں کمیشن میں اتفاق رائے نہ ہونے کی وجہ سے بجٹ ساتویں این ایف سی ایوارڈ کے مطابق ہی جاری کیا گیا.

اس سال بھی کمیشن متنازعہ ہونے کی وجہ سے ایوارڈ جاری نہیں کیا جا سکا اور بجٹ 2020-21 ساتویں این ایف سی ایوارڈ کے مطابق ہی بنایا گیا ہے.
پاکستان پپل پارٹی کے دورحکومت میں 2010 میں ساتویں این ایف سی ایوارڈ کا اعلان کیا گیا تھا جو صوبائی خود مختاری کے حوالے سے ایک تاریخی پیش رفت تھی.

اس میں پہلی بار وسائل میں سے وفاق کے حصے میں خاطر خواہ کمی لا کر صوبوں کا حصہ بڑھایا گیا۔

اس سے قبل وسائل کا سب سے بڑا حصہ وفاق کو جاتا تھا اور صوبوں کو شکایت ہوتی تھی کہ ان کے پاس عوامی منصوبوں اور امور مملکت چلانے کے لیے مالی وسائل ہی نہیں ہوتے۔

ساتویں این ایف سی ایوارڈ میں طے کیا گیا کہ وفاق کا حصہ کل آمدنی کا 48 فیصد ہو گا جبکہ صوبوں کا حصہ 52 فیصد رکھا گیا.
ساتویں ایوارڈ سے قبل صوبے آپس میں رقم آبادی کے لحاظ سے تقسیم کرتے تھے، اس لیے کم آبادی والے صوبوں خصوصاً بلوچستان اور سندھ کو شکوہ ہوتا تھا کہ ان کو کم رقم ملی ہے.

ساتویں ایوارڈ میں اس مسئلے کوکسی حد تک حل کیا گیا اور آبادی کے علاوہ دیگر عوامل کی بنیاد جیسا کہ پیداواری صلاحیت، منتشر آبادی اور پسماندگی جیسے عوامل کی بنیاد پر بھی وسائل کی تقسیم کی گئی. اس کی وجہ سے زیادہ آبادی والے پنجاب کا حصہ کم ہوگیا اور چھوٹےصوبوں کاحصہ قدرے بڑھ گیا.

برسبیلِ تذکرہ بتاتی چلوں کہ نواں این ایف سی ایوارڈ اس لیے ناکام ہوا تھا کہ TORمیں شامل نہ کیے جانے کے باوجود سلامتی کے لیے 3فیصد اور وفاق کے زیرِ انتظام علاقوں کے لیے 4فیصد کی کٹوتی پہ اصرار کیا گیا تھا۔

مزید یہ کہ دسویں این ایف سی ایوارڈ کے لیے جاری کمیشن نہ صرف متنازعہ رہا کیونکہ صدر کی طرف سے مشیر خزانہ کو سربراہ بنایا گیا جبکہ آئین کے تحت وفاقی وزیر خزانہ کمیشن کی سربراہی کرتا ہے.

نیز وفاقی حکومت سے ایک نوٹیفیکیشن جاری کیا گیا جس سے پتہ چلتا ہے کہ وفاق چاہتا ہے کہ صوبے نہ صرف دفاعی اخراجات برداشت کریں؛

بلکہ مرکزی حکومت کے ماتحت چلنے والے کاروباری اداروں جن میں پی آئی اے، پاکستان ریلوے، اسٹیل ملز، بجلی کی تقسیم کار کمپنیوں سمیت 200 کے لگ بھگ ادارے شامل ہیں، ان کے نقصانات بھی برداشت کریں. صوبوں، خاص طور پر سندھ نے یہ مطالبہ ماننے سے انکار کیا.

ایک بات جس کا ضمناً ذکرضروری ہےکہ اٹھارویں ترمیم کےبعد بہت سے محکموں اور ان کی وزارتوں کی وفاق میں ضرورت نہیں رہی لیکن وفاقی حکومت میں اتحادیوں کو کمپنسیٹ کرنے کےلیے اور کچھ سول اسٹیبلشمنٹ کی ریشہ دوانیوں کی وجہ سے وہ عہدے/وزارتیں ختم نہیں کی گئیں.
جو وفاقی بجٹ پر ناروا بوجھ ہیں.