Thread by @RaneSays

📌📌📌
एय, बेगडी शिवप्रेमी.. झालं का मन शांत? मागितली माफी! पुढे? विषय संपला. चला आता पुढे कोणी शिवरायांच्या नावाने राजकारण करतंय का पाहू.. आपली सोशल मीडियाची टीम, बेगडी शिवप्रेमींची संख्या काही कमी नाही. ट्रोल करू. नाक घासायला भाग पाडू. मग पुन्हा पुढचा कोणीतरी महाभाग येणार..

काहीबाही बोलणार, आम्ही पेटून उठणार. वर्षानुवर्षे हेच चालत राहणार. सदर महिलेचा राग आला मात्र या बेगडी शिवप्रेमींची कीव वाटली. फक्त तिने तिचा कार्यभाग साधला असे काही नाही. या बेगडी शिवप्रेमींनीं देखील आपली फॉलोवर्सची भूक भागवली. इतक्या विरोधातून 'आउटपुट' काय निघालं हे स्वतःला..

विचारलं का? फक्त माफीनामा मिळाला या विचाराने अनेकांनी आपली खोटी मनं शांत करून घेतली. व्हिडीओ एक वर्षांपूर्वीचा. काल-पर्वा कोणीतरी उकरून काढला. आणि आमचे 'बेगडी' शिवप्रेमी उसळले. (सच्च्या शिवप्रेमींची मला उमगलेली व्याख्या पुढे करेनच) मग या बेगड्या काळजाच्या लोकांनी त्या महिलेचा..

पाणउतारा करणारे, अगदी शिव्या घालणारे मेसेज लिहिले. व्हायरल केले. मग मनसे कार्यकर्त्याने फक्त 'एकच' वर्षांनंतर जाऊन कार्यक्रमाचा सेट फोडला. त्यामागचे गणित मला अद्याप उमगलं नाही. (स्टॅन्डअप स्क्रिप्ट व्हेन्यूवाल्यांना लिहून दिले जात नाहीत. ते टुकार विनोदवीर थेट स्टेजवर बोलतात.

त्यांची नांगी ठेचायला हवी हे खरे.. मात्र सेट फोडून कुठला पुरुषार्थ दाखवला? चोर सोडून संन्याशाला मार इतकंच काय ते तिथे घडलं) चला ठीके! सदर महिलेने माफी मागितली. पण पुन्हा प्रश्न निर्माण होतो, पुढे काय?

'मी राजांना मानतो. सर्वच जण मानतात. मात्र त्याने माझ्या राज्याला..

राष्ट्राला का म्हणून फायदा झाला? माझ्या राजांचे अशे कुठले गुण मी घेतले की माझं कौतुक आज सातासमुद्रापार होतंय?' असं कधी स्वतःला विचारलं? तोंडात गुटखा, नजर तिच्या देहावर, गाड्यांचा कर्णकर्कश हॉर्नचा आवाज वाजवत गाव उंडारणार. गाडीवर छत्रपतींचा फोटो लावणार. आणि शिवप्रेमी म्हणून..

मिरवणार. कोणी सांगितलंय? तिचा माफीनामा यावा म्हणून तिलाच वाईट बोलताय? मी काही तिच्या चुकांच समर्थन करत नाहीये. मात्र तिच्या चुका दाखवताना आम्ही मात्र 'परस्त्री मातेसमान' हे तत्त्व विसरतो याची हलकीशी जाणीव करून देतोय. फक्तच सोशल मीडियावर शिवप्रेमी लिहिलं म्हणजे तुम्ही खरंच..

शिवप्रेमी होता का? हे स्वतःला विचारून पहा. स्वतः स्वतःसोबत खोटं बोलता येणार नाही.

मी वारंवार विचारतो आहे की तिने माफी मागितली, पुढे काय? ते यासाठी की.. राजांचा इतिहास, पराक्रम आपण सर्वच जण जाणतो. अक्षरशः एक एक जिवंत चित्रपट ज्या व्यक्तीवर, आणि त्याच्या जीवभावाच्या मैत्रांवर

उभा राहतो. त्या राजांचा, थोरल्या युवराजांचा इतिहास केवळ चौथीच्या पुस्तकापर्यंत मर्यादित का? यासाठी लढा दिलात का हरामखोरहो.. आम्हाला फ्रेंच राज्यक्रांती शिकवली जाते, बोस्टन ती पार्टी डोक्यात भरली जाते मात्र गनिमीकावा म्हणजे काय? राजांची युध्धनीती कशी होती, राजांचे गुण आपल्या

दैनंदिन व्यवस्थापनात कसे आणावे? असे अनेक धडे..त्यांच्या आयुष्यातील छोटे मात्र प्रेरणादायी प्रसंग आम्हाला सातवी, आठवीच्या कळत्या वयात अभ्यासक्रमात हवेत यासाठी हॅशटॅग चालवले? नाही. हे बेगडी शिवप्रेमींचे काम नाही. त्यासाठी सच्चे शिवप्रेमी काम करतील की.. हे सच्चे शिवप्रेमी कोण?

जे स्वतःहून शिवप्रेमी म्हणून घेत नाहीत. ते चंद्रकोर लावून 'उगीच' मिरवत नाहीत. ते सोशल मीडियावर 'आमचा राजा असा होता' याचं ज्ञान न पाजळता, राजांच्या आयुष्यावर शांत, निश्चलपणे संशोधन करत आहेत. डॉक्टरेट मिळवत आहेत. आपल्या कृतीतून राजे कसे होते याचा धडा लोकांना देत आहेत. ते शिवप्रेम.

आजही रायगडी गेलात तर आप्पा परब नावाचा खर्यार्थाने 'तरुण' असलेला वयस्कर व्यक्ती तुम्हाला आढळेल. त्याने जे निःस्वार्थीपणे केले त्याला शिवप्रेम म्हणतात. आपले आई-बाप सोडून सीमेवर गेलेला जवान म्हणजे शिवप्रेम, उगीच सोशल मीडियावर शेखी मिरवून, गाड्यांवर फोटो लावून शिवप्रेमी बनता येत नाही

इथे शिवजी राजेंच्या गुणांबद्दल कोणीच चर्चा करत नाही. आपण ते कशा पद्धतीने आत्मसात करायला हवे यावर कोणीच बोलत नाही. जो उठतो तो एकमेकांना शिकवतो.. राजे असते तर असं नि तस.. बरं ते राज्यकर्ते.. त्यांचं ते राजकारण आहे. त्यांनी ते करू नये असं वाटत असेल तर कोणीही माथी भडकवायला आलं तर..

ते भडकवून घेऊ नका. तुम्ही भडकता म्हणून त्यांचं राजकारण चालतं. मागच्या दोन दिवसात झालेलं प्रकरण हे वाईट होतं. शांतपणे समजून घ्या. त्या महिलेची व्हिडीओ युट्युबवर होती. बरोबर? ती कोणीतरी तुचीयाने 'शिवप्रेमी' असल्याच्या आविर्भावात सोशल मीडियावर व्हायरल केली. काही बेगडींनी ती उचलून..

धरली. यामुळे झालं काय? न पाहिलेल्या व्यक्तीने पण ती पाहिली. चार लोकांमध्ये मर्यदित असलेला अपमान गावभर करण्यात आमचेच बेगडी शिवप्रेमी कामी आले. त्या महिलेला ट्रोल केलं. तिने माफी मागितली. लक्षात घ्या. व्हिडीओ वर्षभरापूर्वीची आहे. ती आपल्याच लोकांनी बाहेर काढलीय. तिने माफी

मागितल्यावर आम्ही आमचं 'मोठं मन' आहे सांगून माफही केलं. यातून शिवरायांचा अपमान, तिचे आणि बेगडी शिवप्रेमींचे फॉलोवर्स वाढणे, ज्याने व्हिडीओ काढली त्याचे जाहिरातीचे पैसे निघाले. बस्स! आता बोला शिवरायांचे मोठेपण आपण कुठे जपले?

साधं गणित होतं. मी व्हिडीओ पहिली. मला मनस्वी राग आला.

मी ती व्हिडीओ रिपोर्ट केला. त्या महिलेला मेल लिहून माझा राग व्यक्त केला. तिला वैयक्तिकरित्या माफी मागायला सांगितली आणि व्हिडीओ दिलीत करण्यास सांगितले. माफी न मागितल्यास 'रीतसर' तक्रार करतो अशा माहितीवजा सल्ला दिला. विषय तिथेच संपला असता. हा केवळ शिवरायांच्या नावाखाली

बेगडी शिवप्रेमींचा मोठं होण्याचा स्टंट होता. स्वतःला मोठं करताना, त्यांनी तिला (शिवकालीन भाषेत 'शत्रूला') मोठं केलं. इतिहासात देखील हेच घडत आलंय.. स्वतःच्या महत्त्वाकांक्षा साध्य करायला आपण वेळोवेळी 'अब्दालीला' स्वतःहून बोलावून घेतलंय. शहाणे व्हा रे. यापुढे राजांचा अपमान झाला ना?

त्याचा निषेध पद्धतशीर नोंदवू. मुळात कुठल्याही महापुरुषाचा अपमान होणार नाही याकरिता संविधानात काही बदल करता येईल का याचा अभ्यास करू. आणि ती मागणी लावून धरू.

यावर व्यक्त व्हायचं नाही असं ठरवलं होतं. मात्र सोनी टीव्हीचा प्रकार, आता ही महिला, तो घोष.. राजांचा अपमान सुरूच होता,

माणसं बदलत होती, आणि आपण तेच ते बेगडं प्रेम दाखवून माफीनामे जमवत होतो.. ठरवून लिहिले नाही. वाटले ते लिहत गेलो त्यामुळे थ्रेड विस्कळीत आहे. भावना, मुद्दा समजून घ्यावा.

(कामचलाऊ शिवप्रेमींनी पोस्ट मनाला लावून घेऊ नये. तुम्ही अजून कोण अपमान करतोय का हे पाहून आपली पोळी शेकून घ्यावी)