Thread by @VGananathan

பிற்படுத்தப்பட்டோர் ஒதுக்கீடு இன்றைய நிலை என்ன?

*

கோல்காபூர் மன்னர் சாகு மகாராஜ், பார்ப்பனரல்லாத இந்துக்களுக்கு இடஒதுக்கீடு கொடுத்த நாள் ஜூலை 26, 1902. பார்ப்பனரல்லாத இந்துக்களுக்கான ஒதுக்கீடு தொடர்ச்சியாக தாக்குதலுக்குள்ளாகி வரும் சூழலில், சாகுமகாராஜ் நினைவுக்குரியவராகிறார்.

சாகு மகராஜின் நினைவையொட்டி எழும் ஒரு முக்கியமான கேள்வி, பிற்படுத்தப்பட்ட இந்துக்களுக்கான இட உரிமைச் சட்டத்தின் உண்மையான பலன் கிடைக்கிறதா?

பிற்படுத்தப்பட்ட மக்களுக்கான இட ஒதுக்கீடு நிறைவேற்றப்பட்டு 25 ஆண்டுகளுக்குப்பின் செய்யப்படும் ஆய்வுகள் அதிர்ச்சியையே தருகின்றன.

இந்தியாவின் ஒன்றிய அரசின் முதன்மை குடிமைப்பணிகளான Group A பதவிகளில் 14% இடங்களும், Group Bல்- 13% பிற்படுத்தப்பட்டோர் இடங்களும், Group C- 5% இடங்களும் நிரப்பப்படவில்லை. அதாவது பிற்படுத்தப்பட்ட இந்துக்களுக்கு வந்து சேர வேண்டிய சுமார் 1.76 லட்சம் பணி இடங்கள் வந்து சேரவில்லை.

இங்கே ஒரு கேள்வி எழும். தகுதி வாய்ந்த போட்டியாளர்கள் இருந்தால், இட ஒதுக்கீடு முழுமையாக நிறைவேற்றப்பட்டிருக்கும் அல்லவா? தகுதியான ஆட்கள் கிடைக்கவில்லை என்றால் எப்படி அந்த இடங்களை நிரப்ப முடியும்?

இக்கேள்விக்கு விடை சொல்கிறது 2019 பிற்படுத்தப்பட்டோர் ஆய்வுக்குழுவின் அறிக்கை.

அறிக்கை தகவலின்படி, பிற்படுத்தப்பட்டோர் இடஒதுக்கீடு முழுமையாக நிறைவேற்றப்படாததற்கு காரணம் தகுதி குறைவு அல்ல - தகுதியான ஆட்கள் இருந்தாலும், அரசு வகுத்துள்ள இடஒதுக்கீட்டு முறைமை ஒழுங்காக கடைபிடிக்கப்படாததால் தான் - முழுமையான இடஒதுக்கீடு - வந்து சேரவில்லை.

பிற்படுத்தப்பட்ட மக்களுக்கான ஒதுக்கீடு நிறைவேற்றப்படவில்லை என்றால், அந்த இடங்கள் காலியாக இருக்கின்றனவா?

இல்லை. நிரப்பப்பட்டிருக்கின்றன.

பிற்படுத்தப்பட்ட மக்களுக்கான இட உரிமை இடங்களை யார் நிரப்பியிருக்கிறார்கள் என்றால், உயர்சாதி பிரிவினருக்குத்தான் அந்த இடங்கள் சென்றுள்ளன.

ஆக, குறிப்பிட்ட பணிகளுக்கு பணியாளர்களை தேர்வு செய்யவேண்டிய அதிகாரிகள், அரசு வகுத்துள்ள சட்டங்களை பின்பற்றாமல், பிற்படுத்தப்பட்ட மக்களுடைய இடங்களை உயர்சாதியினருக்கு அளிக்கின்ற போக்கு இருப்பதால், தகுதி இருந்தும், திறமை இருந்தும், உரிமை இருந்தும் வாய்ப்பு மறுக்கப்படுகிறது.

நேர்முகத் தேர்வுகள் - நேரடியாக தேர்ந்தெடுக்கும் பணிகளிலேயே மோசடிகள் அதிகம் நிகழ்கின்றன. ஆக, நேரடியாக தேர்ந்தெடுக்க வாய்ப்புள்ள இடங்களில் எல்லாம், தகுதியோ, திறமையோ பார்க்கப்படுவதில்லை. சாதி பார்க்கப்படுகிறது. உயர்சாதியா என பார்க்கப்படுகிறது. இது நம்ம ஆளா என்று பார்க்கப்படுகிறது

இத்தகைய சூழ்ச்சி நடக்கும் என்று தெரிந்துதான், சாகு மகராஜ் இடஒதுக்கீட்டை நிறைவேற்றும்போது, பார்ப்பனரல்லாத இந்துக்களுக்காக ஒதுக்கீடு செய்யப்பட்ட இடங்கள் காலியாக இருந்தாலும், அவற்றை பார்ப்பனர் - பார்சி - ஷான்வி - பிரபு போன்ற மிக முன்னேறிய ஆதிக்கத்தினருக்கு கொடுக்கக்கூடாது என்றார்.

ஏனென்றால், தொடர்ச்சியான ஒரு பகுப்பாய்வை உருவாக்கி, பார்ப்பனரல்லாத மக்களுக்கான இடங்கள் பூர்த்தியாகவில்லை என்றால், ஏன் பூர்த்தியாகவில்லை என கண்டறியவும், முழுமையாக பூர்த்தியாகும் சூழலை உருவாக்க முடியும். மிக முக்கியமாக, தகுதி இல்லை என்று பார்ப்பனரல்லாதோரை நிராகரிக்க முடியாது.

பிற்படுத்தப்பட்டோர் ஒதுக்கீட்டிலும் காலி இடங்களை பிறரை வைத்து பூர்த்தி செய்யலாம் என்று இருந்தால், தகுதி இல்லை என்றோ, ஆட்கள் இல்லை என்றோ, அல்லது சட்டத்தை மீறியோ நிச்சயம் குளறுபடிகள் நடக்கும்.

இவ்வளவு விழிப்புணர்வு பெற்றுள்ள இன்றைக்கும், ஒன்றிய அரசின் குடிமைப்பணிகளில் மட்டுமல்ல, மத்திய அரசின் அதிகாரத்தின் கீழ் வரும் எந்த ஒரு பணியின் கீழும் பிற்படுத்தப்பட்ட மக்களுக்கு நியாயமாக, உரிமையாக, நேர்மையாக வந்து சேரவேண்டிய இடங்கள் வரவில்லை என்பதே நிதர்சனம்.

இந்தியாவில் உள்ள 23 ஐ.ஐ.டிகளில், மொத்தம் உள்ள பணியாளர் இடங்களில் 2390 இடங்கள் பிற்படுத்தப்பட்டோருக்கு ஒதுக்கப்பட வேண்டும். ஆனால், 329 இடங்களில் மட்டுமே பிற்படுத்தப்பட்ட பணியாளர்கள் பணிபுரிகின்றனர்.

இந்தியாவில் உள்ள 18 IIMகளில் மொத்த பணி இடங்களில் 211 இடங்கள் பிற்படுத்தப்பட்டோருக்கு வரவேண்டும். ஆனால், 27 பேர் தான் உள்ளனர்.

40 மத்திய பல்கலைக் கழகத்தில் 2019 வரை ஒரே ஒரு பேராசிரியர் கூட பிற்படுத்தப்பட்டோர் கிடையாது - ஒரே ஒரு உதவிப்பேராசிரியர் கூட பிற்படுத்தப்பட்டோர் கிடையாது.

மத்திய பல்கலைக்கழகங்களில் உள்ள மொத்த பேராசிரியர் இடங்களில் 303 இடங்கள் பிற்படுத்தப்பட்டோருக்கு வந்திருக்க வேண்டும். ஆனால், வந்து சேர்ந்திருப்பது 0. உதவிப்பேராசிரியர் இடங்களில் 707 இடங்கள் பிற்படுத்தப்பட்டோருக்கு வந்து சேர்ந்திருக்க வேண்டும். ஆனால், வந்து சேர்ந்திருப்பது 0.

சமூக நீதி அரணான அம்பேத்கர் பெயரால் இயங்கும் மத்திய பல்கலையில் Ph.D, M.Phil, முதுகலை, இளங்கலை அவ்வளவு ஏன் வெறும் சான்றிதழ் பெறுவதற்கான சாதாரண சான்றிதழ் கல்விகளில் கூட ஒரே ஒரு பிற்படுத்தப்பட்ட இந்துவுக்கு கூட இடமில்லை !

விவசாயம் தொடங்கி ஆராய்ச்சி வரை, மத்திய அரசில் 78 அமைச்சரவை துறைகள் உள்ளன. இந்த 78 அமைச்சரவையில் ஒரே ஒரு துறையில் கூட 27% இட ஒதுக்கீடு முழுமையாக நிறைவேற்றப்படவில்லை

சுமார் 22 மத்திய அமைச்சரவை துறை பணிகளில் 10% கூட பிற்படுத்தப்பட்டோர் இடஒதுக்கீடு நிறைவேற்றப்படவில்லை

2019 ஜூன் இறுதியில் நாடாளுமன்றத்தில் தாக்கல் செய்யப்பட்ட புள்ளிவிவரத்தின் படி, மத்திய அமைச்சரவையின் எந்த ஒரு துறையிலும், துறை செயலாளர்களில் ஒரே ஒருவர்கூட பிற்படுத்தப்பட்டோர் கிடையாது. எந்த ஒரு துறையிலும், கூடுதல் துறை செயலாளர்களில் ஒரே ஒருவர் கூட பிற்படுத்தப்பட்டோர் கிடையாது.

நிலைமை இப்படி இருக்க, உயர்சாதி ஏழைகளுக்கு 8 லட்சம் வரம்பு கொடுத்த பாஜக,

பிற்படுத்தப்பட்ட இந்துக்களின் வருமான வரம்பில் விவசாயத்தையும், மாதச்சம்பளத்தையும் சேர்க்கத் துடிக்கிறதென்றால் என்ன அர்த்தம்?

யாருக்கு வறுமையைத் தாங்கி படிக்க கொஞ்சமாவது வக்கிருக்கோ அவர் படிக்கக்கூடாது என்று அர்த்தம்.

யாருக்கு கனவு காண கொஞ்சோண்டு வசதி இருக்கோ அவர் படிக்கக்கூடாது என்று அர்த்தம்

யாருக்கு வர்ணாசிரம அடிமைத்தனத்தை ஒழிக்க கொஞ்சோண்டு வலுவிருக்கோ அவர் படிக்கவே கூடாது என்று அர்த்தம்.