Thread by @appa_v

విశాలి పేరి గారి తో
*_ఓయ్ బాలు వింటున్నావా ..._*

_దశాబ్దాలుగా నీ పాటలతో సినీ సంగీతానికి ఊపిరులూదిన నీకు శ్వాస ఆడకపోవటమేమిటి బాలూ..._

నిన్ను _గాన గంధర్వుడు_ అంటారే, గంధర్వులకు ఇటువంటి ఆరోగ్య సమస్యలు ఏమీ ఉండొద్దు కదా!?

ఏ చిన్న సమస్య ఉన్నా నీ పాటలతో స్వాంతన పొందే మాకు నీ ఆరోగ్య సమస్య వినగానే మనసంతా అదోలా అయింది...

ఎప్పటిలా కాక నీ సాగరసంగమాలు, శంకరాభరణాలు ఈసారెందుకో బాధను పెంచుతున్నాయి. _ఆరేసుకోబోయి.._ అంటూ మా నాన్నను అలరించావు.

_అబ్బ నీ తీయనీ దెబ్బ_ అంటూ నా గుండెల్లో నిలిచావు. నిన్న మొన్న, _నిలవదే మది నిలవదే_ అంటూ మా అయిదేళ్ల బుజ్జిగాడికీ ఓ పాట పాడి వినిపించావు. తరతరాలకు చెరగని చిరునామా కదా నీ గొంతు. మరిప్పుడు అలా హాస్పిటల్లో నీ గొంతుకేదో కృత్రిమ శ్వాస అంటున్నారు?!!

కొనుక్కున్న అవార్డులు అందుకోవడానికి వేదికలెక్కి అడ్డగోలుగా మాట్లాడే సదరు సెలెబ్రిటీలు ఉన్న ఈ రోజుల్లో ... పెట్టుకోవడానికి జాగా లేనన్ని అవార్డులు పొందిన నువ్వు ఎక్కిన ప్రతీ వేదికకు నీ మాటలతో సంస్కారం నేర్పావే. నీకూ అందరిలా అనారోగ్యమెంటి!!!

జీవితంలో ఒక్క సారి నిన్ను కలిస్తే చాలనుకున్న నాకు... పాత్రికేయుడిగా, యాంకర్‌గా నీ పక్కన కూర్చొని నువ్వు నటించిన _మిథునం_ సినిమా చూసే అవకాశం వచ్చింది. నీతో రెండు గంటల లైవ్ ఇంటర్వ్యూ చేసే అదృష్టం వచ్చింది. ఒక రోజంతా నీతో సమయం గడిపా.

చివరికి స్టూడియో వదిలి ఎయిర్‌పోర్టుకు వెళ్లేప్పుడు పుత్రవాత్సల్యంతో గట్టిగా ఆలింగనం చేసుకున్నావ్ చూడు. ఇంక చూస్కో నాకదో _లైఫ్ టైం అచీవ్‌మెంట్_ తెలుసా!

_అన్నమయ్య_ క్లయిమాక్స్ సీన్‌లో భగవంతుడు అన్నమయ్యతో అంటాడే.. నీపాటల కోసం రూల్స్ అన్నీ మార్చేస్తాను,

నీకు మళ్లీ యవ్వనం ప్రసాదిస్తాను అని ...ఆ మాటలు నీకూ వర్తించాలి కదా ...పాటలు రాసింది ఆ మహానుభావుడే అయినా సినిమాలో పాడింది నువ్వేకదా.

రోజూ వినే తెలుగే అయినా నీ గొంతులోనుంచి వస్తే ఇంపుగా మారుతుంది, దానికోసం నువ్వు ఈ భాషకు జోడించే హొయలు , చిన్నెలు, ఒయ్యారాలు, తళుకులు, బెళుకులు, కఠినత, బిగువు...ఆహా పంచేంద్రియాలు పొందే అనుభూతులన్నీ ఒక్క చెవుల ద్వారానే నీ పాటతో అందిస్తావు.

సరే కానీ ఇంక లే, హాస్పిటల్నుంచి వచ్చేయి .. పవన్ కళ్యాణ్ కొడుకు, శ్రీదేవి బిడ్డ లాంటి నెక్స్ట్ జనరేషన్ వెయిట్ చేస్తోంది నీ ప్లేబ్యాక్ సింగింగ్ కోసం..నువ్వు చెయ్యాల్సిన అభిషేకాలు ఇంకా మిగిలే ఉన్నాయట స్వరాలు ఎదురుచూస్తున్నాయి.

అయినా నువ్వే అంటావుగా ప్రతీకార్యక్రమం ముగింపులో ఎప్పటికీ మీ "బాలు"డినే అని, మరి బాల్యంలో ఈ అనారోగ్యమేమిటి... లే, లే లేచి వచ్చేయి. ఇంకా చాలా పాడాలి తియ్యగా....
౼౼౼౼౼౼౼౼౼౼౼౼౼౼౼౼౼౼౼౼౼
అభిమానుల అందరి గుండె చప్పుడునీ ఈ వాక్యాలలో వినిపించిన అజ్ఞాత రచయితకి🙏🙏🙏🙏

Thread Reader App
@threadreaderapp
"unroll "