Follow @savidhasasi

12,399 views

Sasithra

Follow @savidhasasi

, 16 tweets, 19 min read

My Authors

#SavidhaDiary

"என்னது..
பிரசவ வலியில்லாம இருக்கற ஊசியா..?
அதெல்லாம் வேணாம்..!"
என்று மறுத்துக் கூறிய புவனேஸ்வரியின் பாட்டிக்கு வயது எண்பதைத் தாண்டியிருக்கும்..
கூன் விழுந்த உடல்..
சுருக்கங்கள் நிறைந்த முகம்..
ஆனால் குரலில் மட்டும் அத்தனை தெளிவு..
1/n

"பாட்டிம்மா..
உங்க பேத்தி வலி தாங்க மாட்டேங்கறா..
பனிக்குடம் வேற உடைஞ்சிடுச்சிருக்கு..
இந்த ஊசியைப் போட்டுட்டா, அவளுக்கு கொஞ்சம் சுலபமா இருக்கும்..
இந்த ஊசியால, அம்மாவுக்கும், குழந்தைக்கும் பாதிப்பு எதுவும் இல்ல.."
என்று நான் கூறியதை அவர் காதில் வாங்கிக் கொண்டதாக தெரியவில்லை.
2/n

"எனக்கு நாலு புள்ளைங்க. எல்லாம் வீட்டில தான் பிரசவம். இவ அப்பன் பொறந்தப்ப உதவிக்கு கூட யாருமில்ல"
என்றார் அவர்.
"ம்மா, உங்க காலம் வேற. இப்ப நிலமை வேற. அப்ப வீட்டில நீங்க எத்தனை வேலை பாத்திருப்பீங்க?
ஆனா உங்க பேத்திக்கு மெஷின்தானே வேலை செஞ்சு தருது?" என்று நான் சொன்னதை ஏற்கவில்லை

"பரவால்ல. நான் வந்து அவகிட்ட சொல்லிக்கறேன். நல்லா வலி புடிச்சாத்தான் நல்லது.."
என்றார்.

"அதுவரை பேத்தி வலி பொறுக்கணுமில்ல பாட்டிம்மா..?"
என்பதைக் கேட்காமல் பாட்டி தொடர்ந்து பேசிக் கொண்டிருக்க இருக்க, வலியில்லா ஊசி போடும் முடிவை அவர்களிடமே தந்துவிட்டேன்..

4/n

இறுதியில் வென்றது பேத்தியின் அழுகைதான்.
"டாக்டர். பாட்டி சொன்னா சொல்லிட்டுப் போகட்டும்.
நீங்க மொதல்ல அவளுக்கு ஊசியைப் போடுங்க." என்று அவளது கணவர் சொல்ல, பாட்டியின் சம்மதம் இல்லாமல் வலியில்லா பிரசவ ஊசி, அவரது பேத்திக்கு அளிக்கப்பட்டது..
பாட்டிக்கு கோபம் என்று மட்டும் புரிந்தது
5/n

வலி சிறிது குறைந்த பிறகு, புவனேஸ்வரிக்கு மருந்துகளுடன் சிறு பயிற்சிகள், துரித நடை என அனைத்தும் கற்றுத்தரப்பட,
ஏறத்தாழ ஏழு மணிநேரம் கழிந்தபின், வாக்யூம் டெலிவரி மூலமாக 3 கிலோ எடையுடன் ஆண் குழந்தை பிறந்தது.
6/n

பிரசவ அறையிலிருந்து, ஒவ்வொரு முறையும் பேத்தியின முன்னேற்றங்களை செவிலியர் கூறும்போதும் எல்லோரையும் நம்பிக்கை இல்லாமலே பார்த்துக் கொண்டிருந்தார் பாட்டி.

"பாட்டிம்மா. கொள்ளுப் பேரனைப் பாருங்க." என்று நான் குழந்தையைக் காண்பித்த போதும், அவருக்கு சமாதானம் ஆனது போல தெரியவில்லை.
7/n

வேலைக்கிடையில் பாட்டியும், அவரது கோபமும் நான் மறந்தேவிட்ட நிலையில், நேற்று அவர்களது அறைக்குள் ரவுண்ட்ஸ் சென்றபோது அங்கே உட்கார்ந்திருந்தார் பாட்டி.

"ம்மா..
டெலிவரிக்கு பின்ன உங்களை நான் பாக்கவே இல்ல. கோபமெல்லாம் தீர்ந்துடுச்சா?"
என்று நான் கேட்க..
8/n

"கோபமெல்லாம் ஒன்னுமில்ல.
இன்னிக்கு கொள்ளுப் பேரனை வீட்டுக்கு கூட்டிட்டு போறமில்ல..
அதான், உன்னைப் பாத்துட்டுப் போலாம்ன்னு வந்தேன்.."
என்றார்..

நெகிழ்ச்சியுடன் அவரது கைகளை நான் பற்றிக் கொள்ள, தன்னிடமிருந்த கவர் ஒன்றைப் பிரித்து, அழகிய ரோஜாப்பூ ஒன்றை எனக்கு அளித்தார்..
9/n

"தோட்டத்தில பூத்தது. நீயே வெச்சிக்குக்கோ. நல்லா இரு.." என்றார்.

"தேங்க்யூ பாட்டிம்மா.."
என்று நான் நிறைவாக சிரித்ததை ரசித்தபடி அவர் புறப்பட ஆயத்தமானார்.

எத்தனையோ பரிசுகளும், விருதுகளும்
தராத மன நிறைவை,
ஒரே ஒரு ஒற்றை ரோஜா தந்துவிடுகிறது..!!
🌹
n/n