Thread by @mohandastg

എത്രയോ മഹത്തുക്കളുടെ ജീവചരിത്രം ഞാൻ പൊളിച്ചെഴുത്ത് എന്ന എന്റെ പരിപാടിയിലൂടെ അനാവരണം ചെയ്തു! പക്ഷേ ഒരു മഹദ് വ്യക്തിമാത്രം എന്റെ പഠനത്തിന് വഴങ്ങിയില്ല - ത്യാഗരാജ സ്വാമികൾ! ഒന്നര വർഷം കഷ്ടപ്പെട്ടിട്ടും ഒരു നരേഷൻ തയ്യാറാക്കാൻ കഴിയാതെ നിരാശനായി.
1/10

ത്യാഗരാജ സംഗീതം എപ്പിസോഡാക്കാൻ വളരെ എളുപ്പം. പക്ഷേ അത് എത്രയോ പേർ എത്രയും ഭംഗിയായി ചെയ്യുന്നു! പ്രാഥമികമായ ശ്രുതി - താള ജ്ഞാനങ്ങൾ പോലുമില്ലാത്ത ഞാൻ അത് ചെയ്താൽ അപഹാസ്യമാകും. അതിനാൽ അത് വേണ്ട എന്ന് തീരുമാനിച്ചു. പക്ഷേ ത്യാഗരാജൻ മനസ്സിൽ നിന്ന് ഇറങ്ങിപ്പോയുമില്ല.
2/10

അന്ന് പ്രോഗ്രാമിന്റെ പ്രൊഡ്യൂസറായിരുന്ന മനോജ് മനയിലിനോട് എന്റെ പ്രയാസം പറഞ്ഞു. മനോജ് പറഞ്ഞു - ശുദ്ധ സംഗീതം മാത്രമായിരുന്നോ ത്യാഗരാജന്റെ സംഭാവന? ജനങ്ങൾ വെറുതെ ഒന്ന് സന്തോഷിക്കട്ടെ എന്ന ലഘു വിചാരം മാത്രമായിരുന്നോ ആ സംഗീതത്തിന്റെ ലക്ഷ്യം? ആ വഴിക്ക് ഒന്ന് ചിന്തിക്കൂ...
3/10

അങ്ങനെ ഞാൻ വീണ്ടും അന്വേഷണം തുടങ്ങി. ത്യാഗരാജനെപ്പറ്റി, അദ്ദേഹം ജീവിച്ചിരുന്നപ്പോൾ നിലനിന്നിരുന്ന സാമൂഹ്യ രാഷ്ട്രീയ സാഹചര്യത്തെപ്പറ്റി, ഈസ്റ്റ് ഇന്ത്യാ കമ്പനിയുടെ മർദ്ദന ഭരണത്തെപ്പറ്റി, ഹിന്ദു സമാജത്തിന് നഷ്ടമായിക്കൊണ്ടിരുന്ന ആധ്യാത്മികതയെപ്പറ്റി...
4/10

അർത്ഥശൂന്യമായ ആചാരത്വരയെപ്പറ്റി, ഭാരതീയ സംസ്കൃതിയെ അതിന്റെ തനിമയിൽ നിലനിർത്താൻ ത്യാഗരാജനടക്കമുള്ളവർ തുനിഞ്ഞിറങ്ങിയതിനെപ്പറ്റി.. എല്ലാം അപഗ്രഥിക്കുന്ന ഒരു ഗവേഷണ പ്രബന്ധം കിട്ടി. പത്തെഴുപതു വർഷം മുൻപ് എഴുതിയത്!
5/10

ത്യാഗരാജന്റെ ഓരോ കീർത്തനത്തിനും ഒരു സാമൂഹ്യ സാംസ്കാരിക ലക്ഷ്യമുണ്ട് എന്ന് ഞാൻ മനസ്സിലാക്കി. വീരപാണ്ഡ്യ കട്ടബൊമ്മൻ രാഷ്ട്രീയ അധിനിവേശത്തിനെതിരെ ആയുധമെടുത്ത് ഈസ്റ്റ് ഇന്ത്യാ കമ്പനിയോട് പൊരുതിയപ്പോൾ...
6/10

ആധ്യാത്മിക നഷ്ടത്തിന്റെ വിടവിലൂടെ കടന്നു കയറുന്ന സാംസ്കാരിക അധിനിവേശത്തെ ശാസ്ത്രീയ സംഗീതത്തിലൂടെ ചെറുക്കുകയായിരുന്നു ത്യാഗരാജൻ!
വരികളുടെ അർത്ഥം മനസ്സിലായാൽ ഇന്നത്തെ പല പാട്ടുകാർക്കും ത്യാഗരാജ സംഗീതം പാടാൻ നാവ് പൊന്തില്ല. കേൾവിക്കാർക്ക് ആത്മനിന്ദയാൽ തല കുനിക്കേണ്ടിയും വരും!
7/10

നമ്മുടെ സ്വാതന്ത്ര്യ സമരം ദീർഘമായ ഒരു പ്രക്രിയയായിരുന്നു.. നൂറ്റാണ്ടുകളുടെ ദൈർഘ്യം! അതിൽ അഹിംസ ആയുധം ഭക്തി നൃത്തം കാവ്യം സംഗീതം ഭജന പ്രഭാഷണം ക്ഷേത്രം ഉത്സവം ആചാരം ഇതിഹാസം പുരാണം കൃഷി കച്ചവടം... ഇങ്ങനെയുള്ളതെല്ലാം നമുക്ക് ഇന്ധനമായിത്തീർന്നു.
8/10

അതിലേക്കായി തന്റെ സംഗീതാർച്ചനയാൽ സ്ഫുടം ചെയ്തെടുത്ത ഒരു സമാജ നിർമ്മിതി സാധ്യമാക്കിയവൻ ത്യാഗരാജൻ. ഭാരതമൊട്ടാകെ നിറഞ്ഞ ധർമ്മ വിഗ്രഹമായ രാമനെയായിരുന്നു ത്യാഗരാജൻ ആയുധമാക്കിയത്. പിൽക്കാലത്ത് മഹാത്മാഗാന്ധിയും രാമനെത്തന്നെ ആശ്രയിച്ചു..
9/10

തെലിസി രാമ ചിന്തന തോ നാമമു...
സേയവേ ഓ മനസാ...

മനസ്സേ... അറിഞ്ഞുകൊണ്ട് സ്ഥൈര്യപൂർവം രാമനാമം ജപിക്കൂ ... ഒരു നിമിഷം മതി 🙏
10/10