Thread by @Lavvelenata

Ve conto na storia.
Na storia bruta anca questa.
Tanto bruta che xe finia co denunce, arresti, processi, bagoi, casini, e besteme.
Xente che se gà ciapà a corteae. Par gnente na storia bea.
E tante besteme.

Mi conosso a version veneta dea facenda.
Che però a un certo punto sconfina, va far un giro in Sicilia e dopo torna in Veneto.
Na bruta storia come pol essarghene tante.

Ghe xe na parte de Veneto, tra do fiumi dove chea nebbia par avolgere no sol el paesaggio ma anca el cervello de serta xente.
E co tei conossi te pol sol domandarte “ma quanto mona sio?” – “svejarse no eh?” – “ma come se fa credarghe a certe robe?”

Xe che quando dei MONA GENERICI incontra un MONA PI GRANDO che gà capio come far skei ciavando i mona pi picoi anca i mona generici deventa vittime e colpevoi nel stesso tempo.
De base però SEMPRE MONA I RESTA. Xe che magari qualcun paga el so essar mona.

Ancò ve conto na storia bassa.
Bassa come a tera.
Bassa come chea parte del Veneto in mezo tra el Po e l’Adige dove che nebion e zanzare regna par la maggior parte dei giorni all’anno.
Na storia de basso spessor, gnente de che. De mona, picoi e grandi.
E de BANDITI.

Anca a tera xe bassa, se fa fadiga lavorarla, no a se pol comandar, gà i so ritmi e e so dinamiche ma a pol far skei.
Tanti skei.
Te pol piantar erba e nasse skei.
Ma nasse skei anca se no te impianti un casso, e anca se tera no ti ghe n’hà proprio.

A tera de oggi penso sia quea pi dura da lavorar. Na soppa de ignoransa.
In na zona depressa. Risparmiada anca daea prima ondata de Covid. Desmentegà da dio e spesso anca dai omani. Ma no da tuti ciò. EL POLESINE.

Ma xe terra dove che in tanti gà fato affari. Ciavando chealtri.
Ghe iera na combricoea de consulenti. Ghe iera. Perché un pochi xe sparii, un pochi xe dadrio e sbare, altri xe isoeai casa e un par xe passai a miglior vita.

A combricoea de sti consulenti se mete insieme verso inissi anni 2000 in na società che par comodità ciamo I SKEI DEA TERRA SRL.
Sede legale 45030 Calto (Rovigo).
A prima.

Nel corso del tempo a stessa compagine xe deventà:
I SKEI DEA TERRA 1 SRL
A TERRA DEI SKEI SRL
I NOVI SKEI DEA TERRA SRL
A TERRA DEI NOVI SKEI SRL
ma a combricoea iera fatta sempre dai stessi.

MARIO agronomo e BEPI commerciaista.
Oltre a iori do un certo LUIGI perito agrario, un par de ragionieri convertii al controeo de gestion, un par de segretarie e TONI.
TONI xe el protagonista asoluto dea storia de oggi.

Nel corso dei tempi sti banditi xe riussii insinganar i contadini dee zone del Poesine.
Che comunque no xe che i brillasse de inteigensa e de prontessa de suo.
Ma xe colpa dea nebia.

All’inissio i banditi li gà coinvolti in tute chee nove coltivasion de moda prometendoghe vagonae de skei se i convertiva e produsion fasendoghe spendar na marea de skei...

... dall’erba medica passando pai lamponi, dae lumache par tirar su a bava par far creme, passando pal bambù e rivando aea spirulina....

Tuti prodotti spaciai come acqua de Lourdes che fa miracoi e che CO GNENTE fa ciapar na marea de skei. Tutta roba par cui, secondo iori no servia starghe drio, che bastava darghe na ociada ogni tanto e che produceva skei.
E SIMMIE DE MARE praticamente.

E alora vanti a parlarghe e caressar e lumache perché e producesse bava, vanti a piantar e infestarse de bambù o metar tubi de plessiglass sui campi e vardar e alghe che ghe noa dentro.

E puntualmente dopo anni e co iera ora del raccolto quei che dovea comprar erba medica, toneate de lamponi, bava, bambù e spiruina spariva e i contadini no i ciapava gnanca i 5 skei da mona.

E spariva anca i banditi dea I SKEI DEA TERRA SRL.
Pa tornar co nome novo nel giro de 24 ore e col novo bisness miracoeoso che sensa far un casso assicurava na rendita impressionante.

Ma ciava uno, ciava do, ciava tre anca el contadin del Poesine taca svejarse.

E taca assarse insiganar sol co proposte dove che almanco no ghe iera da far fadiga, compra tubi e spendar skei de acqua o dedicarghe tempo ae lumache a farle strissar so speci de tapi rulant pa far produre bava contro e rughe.

E dal cilindro dea banda dei banditi vien for i PSR (Piani de sviluppo rurale).
Xe stà TONI che ripeto xe za ndatò a processo e xe drio scontar a so pena.

De ometti come TONI ghe n’è na’ stamarea in giro e mi sinceramente go paura che col Recovery Fund ghe ne nassa presto tanti altri come porcini in Cadore coe prime piove.
Ma questa xe n’altra storia.
E secondo mi bruta anca questa.

Cossa ga fato TONI coi PSR?
O mejo cossa voeveo far TONI coi PSR …

Alora i PSR xe co-finansiai dall’Europa e dae Regioni e queste ultime gestisse el maloppo.
Coi PSR se pol far tante robe: piantar albari, sistemar un terrassamento, lavorar so na zona svantagiata, dar el via a nove produsion, ecc. ecc.
Tante robe.

Tante bee robe e se usai ben pol veramente dar na man ai agricoltori sposando in pien e linee guida dea PAC.
TONI mete el naso so sto bisnes. E capisse che pol essar el salto de quaità.
Basta erba miracoeosa, lamponi, bambù e spiruina.

cà che i PSR gà a parte finae de rendicontasion detajada e de controeo che verifica veramente el vero utiizo del finanziamento. Assa star massa fadiga. Massa carte da presentar. E po te sa mia chi che fa e verifiche …

E allora gnente.
Bel bisnes, tanti skei che gira ma massa pericoeosa a fase final.

Ma se TONI decide de far bisnes TONI no lo ferma nissun.
E studiando – perché no tuti i mona xe stupidi e ignoranti e spesso i banditi sa de pi de chealtri– scopre n’altro bel strumento chel pol usar pai propri comodi e i so obietivi: I CONTRIBUTI DIRETTI.

Tomboea.
No i gà da essar giustificai secondo l’attività agricoea ma i vien concessi in base al tipo de terreno e estension de tera che te possiedi.
Fatta.
Agricoltor ciapa skei in base a quanti etari de tera gà.

E co chei skei pol far quel che vol.
N’dar in ferie, comprasse a machina nova, ndar a putane, sputanarsei soe machinete.

E farse mandar in mona da quei che invesse co chei skei là gavaria fatto dei bei progetti, da quei co voja de far ben, de modernisarse, de usarli nee giuste maniere.

Altro che brassi rubai all’agricoltura.

SKEI CIAVAI ALL’AGRICOLTURA.

Manna dal cielo dio bello.
Altro chea bava dee lumache, a erba medica, a spirulina o el bambù che te ghe ne impianti un ettaro ae sera e aea matina te si infestà e te te trasformi in na foresta del Vietnam.

In pi zontaghe che pa aver i contributi diretti te passi pa dei centri de assistensa agricoea che no gà obbligo de verificar quante proprietà de terreni te possiedi e allora te pol dirghe sensa problemi che te si proprietario de 20,200, 2000 etari e de Parco dea Vitoria a Monopoi

E se TONI te iuta, te pol deventar proprietario momentaneo de tera de nissun .. o mejo dove nissun gà domandà contributo. Bingo.
Ciapà a cuccagna.
Se qualcun no se mete pa traverso.

Perché in Poesine oltre i banditi dea I SKEI DEA TERRA SRL ghe xe anca altre società de consuenti che laora ben a favore dei agricoltori e in generae dee imprese.

Fasemo che ghe sia tra queste na società che se ciama PAL BEN DEA TERRA.
Ditta individuae.
De un certo PIERO.

Piero xe uno de quei bravi. Che se fa in quattro come consulente. Ghe a tera la conosse.
Ma a diferensa de quei de I SKEI DEA TERRA no fa convegni nee varie associasion de categoria, no gà entrature poitiche, no gà mega ufici co targhe e segretarie.

Piero xe el consuente cojon veneto che sta sempre e sol daea parte dee imprese.
Come ghe n’è tanti.
Come dovaria essar tutti.

Piero sa a storia dei contributi diretti.
E pa nome e par conto del so cliente TISSIO a cui xe drio farghe consulenza pa modernizar a coltivassion dell’ajo va domandar al centro de assistensa agricoea el giusto contributo.

-No varde Piero so sta tera qua xe za stati assegnai contributi …
-Cossa ?
-Si qua risulta che azienda CAIO intestataria dei terreni mappale x, x, ecc. ecc. gà ottenuò contributi pa …

-Cossa ? Pian. Fermi tutti. Azienda CAIO? Questa xe tera de TISSIO no de CAIO …
-No so cossa dirle Piero …

Piero se incassa. Tanto. E anca TISSIO. E i se mete a ricerca de CAIO. Gira e rigira i riva a CAIO. Ghe xe na signora MARIA de Arian che gà un orto grando come un spuo fato da do gombine, na casetta modesta, mezo ettaro de gelsi morari e che coltiva BACCHI DA SETA.

-Ciò MARIA come vaea coi bachi da seta ?
-Tasi va dio caro. A son ancor drio pagar el kit inissiae … doveo deventar mercante dea seta e farme na fortuna e invesse continuo pagar skei e basta .. ma se beco TONI xe un omo morto ..
-Chi xeo TONI ?

Toni xe un ometto distinto che xe venuo da mi anni fa. No so mia se xe da Badia o da Calto. Un de qui che parla ben. Distinto. Fasea parte de na società che se ocupava de supporto ai agricoltori tramite i skei dea Region e dell’Europa.

Me gà dito che lu xe in grado de farme ottegner finansiamenti europei, contributi a fondo perduto, skei sensa pagar, me gà spiegà i affari che se podea far coi bachi da seta …

.... me gà domandà un poche de carte de a me azienda, gà vossuo un fià de firme de delega e 2000 euro par la pratica. E basta.

Dopo qualche mese lo go sercà par saver quando i me rimborsava i skei del kit ma no semo mai stà in grado de trovarlo.
O go dato pa spario.
O morto.

-Grassie Maria, desso gò capio.
-Sa gheto capio Piero?
-Tissio .. te spiego cossa gà fato Toni. Ndemo ber qualcossa va ..

TONI xe riussio mettar su centenari de ettari de tera e far su sentenari de migliaia de euro de contributi europei sensa aver mai avuo gnente a che fare coea tera.
Perché a xe bassa e se fa fadiga lavorarla.
Ma no quea de chealtri.

TONI se xe costruio na rendita coe tere de MARIA-CAIO e molto probabilmente anca de tante altre aziende.
Gà capio che a tera fa skei e a metà dei anni 2010 co un bottino de 300 etari de altri gà otenuo quasi un milion de euro de fondi europei.

Come gà fato? Gà sfruttà el fato che i controi xe previsti sol sui contributi superiori ai 150mia euro anno ma basta star sotto e ciao controi.....

E se nissun domanda contributo su un teren chiunque pol domandarghe.
E TONI cossita gà fato.

A MARIA nostra ghe dà a Piero a specie de contrato che gà firmà co TONI. Piero raccoglie tanti contratti tipo quei dea Maria.
Tutti fatti da TONI.

So carta intestà dea società I SKEI DEA TERRA SRL e dee successive che nasseva daea matina aea sera sempre col stesso indirisso, col civico diverso, intestà sempre aea banda dei banditi.

Piero taca sentir e storie de quei che nel Poesine gà avuo a che far coi banditi de I SKEI DEA TERRA .. uno che gà cambià tuti i tratori perché TONI ghe gà dito che riussiva portarghe casa contributo europeo pa comprar macchinari...

... uno che gà piantà BAMBU’ co un finansiamento europeo che jera drio spetar.
Più o meno a stessa musica.
Stonada. E bruta.
Piero va denunciar Toni. Porta aea GDF tutte e carte.

GDF taca far el so lavoro. I va far un salto dai SKEI DEA TERRA NUOVO NOME. Porta via raccoglitori de carte. De TONI però gnanca l’ombra.
TONI però no xe pi in Veneto.
Se gà trasferio in Sicilia.
Mejo del clima de nebia e zanzare del Poesine.

Trasferimento de attività. Ma sempre stessa metodologia. Bandito al nord come bandito al sud.
Prima te ciavi i tui e dopo chealtri.

Stessa magia che sol vardando i macchinari usai torna novi, sovrafatturasion, fornitori esteri fittissii, stesse promesse de portar casa fondi europei, ecc. ecc
E giro de fature pa operasion inesistenti.

Fatture de docensa, tutoraggio, consuenza, collaborasion varie … acquisti de roba … sol su carta e soprattutto de importo inferiore rispetto a quel scrito in fatura.
Ma TONI xe sgajo ciò.

Fa el salto de quaità in Sicilia.
Falsi corsi de formasion co partecipanti all’oscuro iscritti a registro, firme false … false dichiarasion da parte dei fornitori che dichiara falsi come a morte de aver ricevuto in contati el pagamento ....

… costi gonfia coi contratti ciavi in man sensa dover dar giustificasion dee singole voci di spesa ..
Tutto pa ciavar l’Europa.
TONI e a so società in Poesine iera bravissimi a far na roba.

Sempre dea serie che quel Alto che gà trasformà acqua in vin iera un dietante … TONI sol vardando un machinario lo fasea deventar novo visto che i fondi comunitari finansia sol acquisto de roba nova.

TONI però in Sicilia pesta i pie a massa xente che fa el so stesso lavoro .. e xe costretto scampar e torna su in Poesine.
Se torna sempre casa.

Ma casa te speta qualcun che in qualche maniera te fa pagar quel che te gà combinà.
E chel qualcun te vien tor casa e te porta drito in Strada Regionale 443 Dir. N. 2 e da la taca tutto …

… tutto quel che se trova anca oggi sui giornai del Veneto e dea Sicilia so come se riesse truffar i agricoltori coi skei de l’Europa.
End.

PS: Mi co quel che gò ciamà Piero … ghe lavoro.