Thread by @hakuna1906

Am LCD, wou ech den Direkter sinn, gouf et am Ufank vum Schouljoer vill Opreegung wéinst eisem "Code vestimentaire". Hei ee perséinleche Message.
TLDR: ech zéihen d'Plainte géint den Auteur vun der Karikatur zeréck. (1/x)

Dëst Dokument (een Deel vum Code de vie), ass den 28. Februar 2020 am Conseil d'éducation finaliséiert ginn (jo, just virum Covid). Lo am September hu mer dëst Dokument quasi "einfach esou" an den Ëmlaf ginn. (2/x)

Ech hunn net realiséiert dass do ee Problem kéint entstoen, well et sech net ëm nei oder méi restriktiv Reegelen handelt. Dat war ee Feeler, an dat hätte mer sécherlech missen anescht a besser kommunizéieren. (3/x)

Ënnert dem Stréch ass a bleift et a mengen An awer de richtegen Message, an steet esou och am Gesetz: all Schüler (Jongen a Meedercher) mussen sech korrekt undoen fir an d'Schoul. (4/x)

Et ass dunn op de soziale Medien zu engem Shitstorm komm - och doduerch dass, bewosst oder onbewosst, ganz kloer falsch an manipuléiert Informatiounen verbreet a gedeelt goufen. D'Auteuren vun deene Posten, hunn et bis haut nach net fir néideg fonnt dat ze korrigéieren. (5/x)

Eise Schülercomité huet sech direkt bei mir gemellt, mir haten eng konstruktiv Entrevue, a mir hunn zesummen decidéiert dass een erklärende Communiqué un d'Klasse géif goen. Genau esou soll dat och funktionéieren - de Schülercomité huet seng Aufgab virbildlech gemaach. (6/x)

Leider ass et awer weidergaangen, an ee Saz deen ech esou wuertwiertlech net gesot hunn, gëtt aus dem Kontext gerappt an ëmmer nees als soi-disant Zitat vu mir genotzt a géint mech verwennt. (7/x)

Ech well dofir hei ganz ausdrécklech kloerstellen, dass all Zort vun Iwwergrëff (verbal oder physesch) géint ee Meedchen oder géint ee Jong wéinst senge Kleeder, inacceptabel ass, an dass mir do als Schoul konsequent dergéint virginn. (8/x)

An deem selwechte Kontext ass och eng Zeechnung vun engem jonken Erwuessenen (kee Schüler, wéi ëmmer neess behaapt gëtt) verëffentlecht ginn, déi fir mech perséinlech eng rout Linn iwwerschratt huet. (9/x)

De Message deen do suggeréiert gëtt, ass absolut ënnert der Gürtellinn, inakzeptabel, dorunner leiden ech perséinlech, an dorunner leit och eis Schoul. (10/x)

Ech hu mech entschloss, d'Plainte géint den Auteur vun der Zeechnung zeréck ze zéien. Ech wollt ee kloert Zeeche setzen, dass déi doten Zort vu perséinlecher Verunglimpfung ze wäit gaangen ass. Ech wënsche mer, an hoffen, dass dëst Thema elo endlech zum Ofschloss kënnt. (11/x)

Ech muss no mir an no menger Famill kucken.
Ech brauch meng ganz Energie fir, zesumme mat menger Direktiounséquipp, de Proffen an dem Personal, den LCD duerch des schwiereg Corona-Situatioun ze féieren. Dat huet fir mech absolut Prioritéit. (12/12)