Thread by @bandisanjay_bjp

ఈనెల 8వ తేదీన కొన్ని రైతుసంఘాలు, ముఖ్యంగా పంజాబ్ కు చెందిన రైతు సంఘాలు, కాంగ్రెస్ అనుబంధ రైతు సంఘాలు ప్రకటించిన భారత్ బంద్ కు టీఆర్ఎస్ పార్టీ మద్దతు ఇవ్వడాన్ని తీవ్రంగా ఖండిస్తున్నాం. కాంగ్రెస్ పార్టీకి, టీఆర్ఎస్ పార్టీకి తేడా లేదు.

గత ఆరేళ్ల టీఆర్ఎస్ పాలనలో రైతులకు ఒరగబెట్టింది ఏంటో స్పష్టం చేయాలి. 2014, 2018 ఎన్నికల్లో టీఆర్ఎస్ పార్టీ రైతుల పంటరుణాలు మాఫీ పేరుతో హామీలు గుప్పించి గద్దెనెక్కాక పూర్తిస్థాయిలో నెరవేర్చకుండా రైతులను మోసం చేసింది.

ముందు తెలంగాణ రైతులకు టీఆర్ఎస్ సర్కారు రుణమాఫీ చేసి,ఆతర్వాత రైతు సమస్యలపై స్పందిస్తే బాగుండేది. రుణమాఫీ ఆలస్యం చేసినందుకు ఇప్పటికైనా క్షమాపణ చెప్పాలి. రూ.లక్ష లోపు వడ్డీలేని రుణాలు ఇవ్వాల్సి ఉండగా రాష్ట్ర ప్రభుత్వం తన వాటా ఇవ్వని కారణంగా రైతులు 13% వడ్డీలు చెల్లిస్తున్నారు.

రాష్ట్రంలో ప్రధానమంత్రి ఫసల్ బీమా యోజన అమలు కావడం లేదు. ఫలితంగా రైతులు అకాల వర్షాలు, కరువుతో తీవ్రంగా నష్టపోతున్నారు. టీఆర్ఎస్ ప్రభుత్వానికి రైతుల పట్ల ఉన్న ప్రేమ ఇది. తెలంగాణలో వ్యవసాయ యాంత్రీకరణకు నిధుల్లేవు. సూక్ష్మ సేద్యానికి నీళ్లు ఇవ్వడం లేదు.

కేంద్రం ఇస్తున్న నిధులతో టీఆర్ఎస్ నాయకులకు ట్రాక్టర్లు కొనిస్తున్నారు. ఇప్పటికైనా రైతు సంక్షేమం కోసం తెలంగాణ ప్రభుత్వం నిధులు విడుదల చేసి ప్రధానమంత్రి ఫసల్ బీమా యోజన, వ్యవసాయ యాంత్రీకరణ, సూక్ష్మ సేద్యం లాంటి పథకాలను అమలు చేయాలని బిజెపి డిమాండ్ చేస్తోంది.

అప్పటివరకు రైతుల గురించి మాట్లాడే నైతిక హక్కు టీఆర్ఎస్ కు లేదు. రాష్ట్రంలో వ్యవసాయ మార్కెట్ కమిటీల్లో మీ తాబేదార్లను, మీ పార్టీ నాయకులను నియమించుకొని రైతులకు అన్యాయం చేస్తున్నారు.

మీ మార్కెట్ కమిటీ చైర్మన్లు, సభ్యులు దళారులతో కుమ్మక్కై రైతులకు గిట్టుబాటు ధర రాకుండా అవినీతికి పాల్పడుతున్నారు. దీన్ని ప్రశ్నించిన రైతులను జైళ్లపాలు చేస్తున్నారు.ఇప్పటికైనా మీకు దమ్ము,ధైర్యం ఉంటే మీ మార్కెట్ కమిటీలను రద్దుచేసి రైతుసంఘాలకే మార్కెట్ కమిటీల నిర్వహణను అప్పజెప్పాలి.

పార్లమెంట్ లో ఆమోదం పొందిన బిల్లుల పట్ల టీఆర్ఎస్ ప్రభుత్వం విజ్ఞత లేకుండా మాట్లాడటం, కాంగ్రెస్ పార్టీ ప్రేరిత బంద్ లో పాల్గొనడం వారి రాజకీయ దివాళాకోరుతనాన్ని బయటపెడుతోంది.

రాజకీయ అవసరాల కోసం రైతులను రెచ్చగొట్టొద్దని డిమాండ్ చేస్తూ, తెలంగాణ రైతులెవ్వరూ కూడా ఈ బంద్ లో పాల్గొనద్దని విజ్ఞప్తి చేస్తున్నాం.