Thread by @NaveenFilmmaker

என் அப்பா, திரு.முகமதலி அவர்களின் நினைவுநாள் இன்று. அதற்கான ஒரு நீண்ட thread இது. என் சிறு வயதிலேயே மகேந்திரன் பாரதிராஜா பாலுமகேந்திரா பாலசந்தர் போன்ற பெயர்களை எனக்கு அறிமுகம் செய்தது அப்பா அம்மாவின் உரையாடல்கள்தான். அந்த ரசனமிக்க காதல் ஜோடிக்கு என் முதல் நன்றி

என் அப்பா!
அரை டவுசர் போட்ட காலத்தில், அதிலும் அவரிடமிருந்த ஒரே அரை டவுசர் அவருடைய பள்ளி சீருடையான அந்த ஓட்ட காக்கி டவுசர்தான், அந்த கஞ்சிக்கு வழியில்லாத காலத்திலேயே எப்படியோ ஒரு ‘Click-3’ கேமிரா வாங்கி, போட்டோக்கள் பல எடுத்தவர்.

எடுத்த போட்டோக்களின் சதுர நெகடிவ்களை கழுவி ப்ரிண்ட் போட கூட அவரிடம் காசில்லை. ஒரு சில போட்டோக்கள் தவிற அவர் க்ளிக் செய்த பல போட்டோக்களை அவரே நெகட்டிவாக மட்டும்தான் பார்த்திருக்கிறார்.

நான் ஆறாம் வகுப்பு படிக்கும்போது அப்பா ப்ரெய்ன் ட்யூமர் காரணமாக இரண்டு வருட சிகிச்சைக்கு பிறகு இறந்து போனார். அவருடைய ஒரு பச்சை சூட்கேஸ் எங்கள் வீட்டில் இருந்தது. அதை திறந்தால் படுபுடவை கட்டி ஊர்வசி அழகாக அமர்ந்திருக்கும் ஒரு பேப்பர் கட்டிங் ஒட்டியிருக்கும். மிகவும் ரசனையான ஆள்.

அந்த பெட்டியில் அவருடைய முக்கியமான பொருட்கள் இருக்கும். அதில் அவர் பிண்ட் போடாத பல சதுர நெகட்டிவ்கள் இருந்தன.
2010ல் அந்த நெகட்டிவ்களை எப்படியாவது டெவலப் செய்து ப்ரிண்ட் போட வேண்டும் என்று முடிவெடுத்தேன்.

என் தந்தையின் நிறைவேறா கணவை பூர்த்தி செய்வதன் மூலம் எனக்கு ஒரு மன நிறவு கிடைக்கும் என்று எண்ணினேன். அந்த பழைய கால சதுர நெகட்டிவ்களை ப்ரிண்ட் போடும் வசதி இப்பொழுதிருக்கும் எந்த கடைகளிலும் இல்லை. வடபழனி முருகன் கோயில் தெருவில் ஒரு பழைய போட்டோ ஸ்டுடியொ இருந்தது.

ஒரு நெகட்டிவ்கு ரூபாய் 30 என்று பேரம் பேசி சாஃப்ட் காப்பியாக கன்வர்ட் செய்தேன்.
அந்த போட்டோக்களை பார்த்த பிறகுதான் தெரிந்தது எனக்கு சினிமா ஆர்வம் எங்கிருந்து வந்ததென்று.

80களில் குங்குமம் குமுதம் விகடனில் வந்த தொடர்கதைகளையெல்லாம் வாராவாரம் வெட்டி வைத்து கடைசியில் ஒரு முழு நாவலாக பைண்ட் செய்து வைப்பார் அப்பா. எண்டமூரி வீரேந்திரநாத், சுஜாதா, பாலகுமாரன், சிவசங்கரி முக்கியமாக கலைஞர். கலைஞரின் தமிழுக்கு அப்பா அடிமை. கலைஞரின் பேரபிமானி
#HBDKalaignar98

எங்க ஊரு கொக்கராயன்பேட்டைல மாரியம்மன் கோயில் திருவிழா சமயத்துல, ரெக்கார்ட் டான்ஸ் நிகழ்ச்சி நடக்குமாம். ரெக்காடான்சர் ப்ரேமா ஆடும் அந்நாட்களில் ஊரே ரெக்க கட்டி பறக்கும். ஓட்ட காக்கி டவுசர போட்டுகிட்டு எங்கப்பா அவங்ககூட அப்படி ஒரு டான்ஸ் போடுவாராம்.

ஒருதடவ 'கன்னத்தில் என்னடி காயம்' பாட்டுக்கு, எக்கிஎக்கி ப்ரேமா கன்னத்த கில்லிட்டு ஆடிட்டிருந்த அப்பா கூட்டத்துகுள்ள இருந்த அவரு அப்பாவ பாத்துட்டாரு. விட்டாரு ஜூட்டு. அந்த பையன் வந்தாதான் ஆடுவேன்னு ப்ரேமா சொல்லிருச்சாம். அப்பறம் ஊர்காரங்கலாம் எங்க தாத்தாவ அனுப்பிட்டு அப்பாவ..

..கூட்டிட்டு வந்து ஆட்டத்த கண்டினியூ பன்னாங்களாம். அப்படி ஒரு மன்மதராசா எங்கப்பா. ஊருல இருக்க அத்தன பொன்னுங்களும் அப்பாவ சைட் அடிப்பாங்களாம். ஆனா அப்பா லவ் பன்னது எங்கம்மாவ மட்டுந்தானாம். நான் பார்த்த சிறந்த காதலர்கள் அப்பா அம்மாதான். LUV U APPA