Thread by @Raamraaj3

50 ஆயிரம் ஏக்கர் கோயில் விவசாய நிலம் மாயம்: பா.ஜ., எச்.ராஜா குற்றச்சாட்டு

சிவகங்கை : தமிழகத்தில் கோயிலுக்கு சொந்தமான 50 ஆயிரம் ஏக்கர் விவசாய நிலங்கள் காணாமல் போயுள்ளது. இதனை தமிழக அரசு மீட்க வேண்டும்,'' என சிவகங்கையில் பா.ஜ., முன்னாள் தேசிய செயலாளர் எச்.ராஜா தெரிவித்தார்.

அவர் கூறியதாவது: அரசின் கையில் தமிழக கோயில்கள் இருப்பதால், அவை அழிந்து வருகின்றன. உண்டியல், இதர வருவாய் உள்ள கோயில்களை மட்டுமே அரசு பராமரிக்கிறது. இன்றுவரை 10 ஆயிரம் கோயில்கள் இடிபாடுடன் கிடக்கின்றன. இந்த அரசு ஹிந்து கோயில்களை மட்டுமே கண்டுகொள்வதில்லை.

அதே நேரம் பிற மதக்கோயில்கள் அழிய அனுமதிப்பார்களா. சிவகங்கை கவுரி விநாயகர் கோயில் நிலம் 142 ஏக்கர் ஆக்கிரமிப்பில் உள்ளது. ஆனால், 9.58 ஏக்கரை மட்டுமே மீட்டு, அனைத்து ஆக்கிரமிப்பையும் அகற்றி விட்டதுபோல், தி.மு.க., அரசு நாடகம் ஆடுகின்றது.

கோயில் நில ஆக்கிரமிப்பு அகற்ற குழு

சென்னை உயர்நீதிமன்றம், அறநிலையத்துறைக்கு விடுத்துள்ள உத்தரவில் கோயில் நிலங்களை மீட்க மாவட்ட வாரியாக 5 பேர் குழு அமைக்க கூறியது. ஆனால், அது குறித்து அரசிடம் எந்த நடவடிக்கையும் இல்லை.

அறநிலையத் துறையின் கீழ் 4 லட்சத்து 78 ஆயிரத்து 239 ஏக்கர் விவசாய நிலங்கள் உள்ளன. ஆனால் இத்துறை கொள்கை விளக்க குறிப்பில் 5 லட்சத்து 25 ஆயிரம் ஏக்கர் உள்ளதாக கூறியுள்ளது. அப்படியானால் எஞ்சிய 50 ஆயிரம் ஏக்கர் நிலம் எங்கே போனது என்பது பற்றி அரசு அறிக்கை வெளியிட வேண்டும்.

ஆக்கிரமிப்பு நிலங்கள் பட்டியல்

அறநிலையத்துறையின் கீழ் உள்ள கோயில் சொத்துக்களில் 2 கோடியே 44 லட்சத்து 51 ஆயிரத்து 348 சதுர அடியில் 22 ஆயிரத்து 599 வணிக வளாகங்கள், 29 கோடியே 14 லட்சத்து 66 ஆயிரத்து 216 சதுர அடியில் 33 ஆயிரத்து 627 வீட்டு மனைகள் ஆக்கிரமிப்பில் உள்ளன.

சென்னை - காஞ்சிபுரம் ரோட்டில் பாப்பான்சத்திரம் ஊராட்சி காசி விஸ்வநாதர் கோயிலுக்கு சொந்தமான ஆக்கிரமிப்பில் உள்ள 177 ஏக்கர் நிலத்தை மீட்க வேண்டும்.கோயில் நிலத்தில் புனித ஜான் பள்ளி ஆக்கிரமிப்பு செய்துள்ளதை அகற்றக்கோரி 2018 செப்.,2ல் உண்ணாவிரதம் இருந்தேன்.

சென்னை அருணாசலபுரத்தில் 500 ஏக்கர், சென்னை கிரீன்வேஸ் ரோட்டில் கபாலீஸ்வரர் கோயில் நிலம் 14 ஏக்கர் ஆக்கிரமிப்பில் உள்ளன.

வேதாரண்யம் வேதபுரீஸ்வரர் கோயிலுக்கான 28 ஆயிரத்து 600 ஏக்கர் நிலத்தை ஏக்கருக்கு ஆண்டுக்கு 2 ரூபாய் 40 பைசாவிற்கு வாடகைக்கு விட்டு, இழப்பு ஏற்படுத்தியுள்ளனர். தமிழக அரசு விரைந்து கோயில் நில ஆக்கிரமிப்புகளை அகற்ற வேண்டும்.

கோயில் நில வாடகை உயர்வு

44 ஆயிரம் கோயில்களில் எஸ்.டி., பிரிவினர் உட்பட அனைத்து சமூகத்தினரும் அர்ச்சகராக உள்ளனர். இதில் எவ்வித ஏற்றத்தாழ்வும் இல்லை. ஆனால், திராவிட கட்சிகள் ஹிந்து சமயத்திற்கு எதிராக செயல்படுகின்றனர்.

ஹிந்து அறநிலையத்துறை சட்டத்திலேயே கோயில் வணிக கட்டடங்களின் வாடகையை 3 ஆண்டுக்கு ஒரு முறை உயர்த்தலாம் என உள்ளது .ஆனால், இத்துறை வாடகையை உயர்த்த எந்த நடவடிக்கையும் எடுக்கவில்லை.

சென்னையில் முன்னாள் அமைச்சர் பொங்கலுார் பழனிச்சாமிக்கு சொந்தமான கலைஞர் கருணாநிதி பொறியியல் கல்லுாரி உள்ளது. வில்வபூஜை செய்வதற்காக அறக்கட்டளை ஒன்று சிதம்பரம் நடராஜர் கோயிலுக்கு வழங்கிய நிலத்தை ஆக்கிரமித்து தான், இக்கல்லுாரி கட்டியுள்ளனர். அதையும் அரசு அகற்ற வேண்டும்.

'ஊராட்சி' ஆன தமிழக அரசு

பிரதமராக மன்மோகன் சிங் இருந்தபோது, ரூ.2.25 லட்சம் கோடிக்கு மேல் பெட்ரோலிய பில்லுக்கான தொகை நிலுவையில் இருந்தது.அவர் பிரதமராக இருந்தபோது கூட்டாளியாக இருந்தது தி.மு.க.,தான்.

மத்திய அரசை ஒன்றியம் என கூறினால், தமிழக அரசை 'ஊராட்சி' என்று தான் சொல்ல வேண்டும். இவ்வூராட்சியின் அக்கவுண்டன்ட்' தான் நிதி அமைச்சர் தியாகராஜன். காவிரிநதிநீர் பங்கீட்டில் தமிழகத்திற்கு துரோகம் இழைத்தது தி.மு.க., தான்.

'நீட்' தேர்வு சமூக பாதிப்பில்லை

உச்சநீதிமன்றம் தீர்ப்புக்கு பின்னர் தான் நீட்' தேர்வு நடத்தப்பட்டது. இதை மத்திய அரசு கூட நிறுத்த முடியாது. 2004 முதல் 2016 வரை தமிழக அரசு பள்ளிகளில் படித்த மாணவர்கள் 200 பேருக்கு தான் மருத்துவ சீட் கிடைத்தது.

ஆனால், நீட் தேர்வுக்கு பின் கடந்த ஆண்டு மட்டும் அரசு பள்ளிகளில் படித்த 450 பேர் எம்.பி.பி.எஸ்., சேர்ந்துள்ளனர். நீட் தேர்வால் சமூக ரீதியாக பாதிப்பு இல்லை, என்றார்.

தினமலர்