Thread by @ndfcagayan

DDS, PNP ANG NASA LIKOD NG PAMAMASLANG SA MGA KAAWAY SA PULITIKA AT AKTIBISTA

CRISPIN APOLINARIO
Tagapagsalita
Danilo Ben Command
New People's Army - West Cagayan
11 June 2021

Sa paglitaw ng star witness sa kontrobersyal na pagpatay kay Calbayog City Mayor Ronaldo Aquino, muli na namang nailantad ang dati nang madungis na rekord ng mersenaryong Philippine National Police (PNP).

Kasabay ito ng pagsisiwalat ni PMSgt. Jose "Jay" Senario - star witness sa naturang kaso - na kapwa niyang opisyal ng PNP ang nasa likod ng pagpaplano at pag-ambush sa alkalde gamit ang tauhang-pulisya na diumano'y nakabonete.

Hindi hiwalay ang nangyari sa Calbayog sa mga kaso ng pananambang sa Cagayan. Matatandaang dalawang ex-Mayor na kapwa nanunungkulan noon bilang Sangguniang Bayan ng Lasam, Cagayan ang tinambangan kasama ang dalawang staff noong Pebrero 15.

Patay sa pananambang ang apat matapos paulanan ng ilang daang bala.

Noong 2019, tinambangan ng mga nakaboneteng kalalakihan habang naka-tricycle na bumibyahe ang lider-magsasakang si Leo Angelo Miranda sa bayan ng Ballesteros, Cagayan.

Patay si Miranda matapos tadtarin ng tama ng bala.

Patunay ang mga naturang pamamaslang sa pag-iral ng Duterte Death Squad (DDS) sa katauhan ng mga berdugong militar at pulisya.

Hindi na mapagkakaila pa sa mamamayan ang mahabang rekord ng krimen ng AFP-PNP sa kabila ng paghuhugas kamay katulad ng kanilang hayok-sa-dugo at pasistang punong-kumander na si Rodrigo Duterte.

Sa ilalim ng rehimen, naging karaniwan at mas malaganap ang kultura ng impunidad o kawalang pananagutan.

Naungusan ni Duterte ang idolo niyang si Ferdinand Marcos sa duguang rekord sa pagpatay ng mga matatandang walang kalaban-laban tulad nina Randall Echanis, mag-asawang Topacio at iba pang inakusahang "nanlaban."

Patunay ang lantay-teroristang pamamahala ni Duterte sa desperasyon nitong makapanatili sa poder sa gitna ng pagsahol ng krisis-panlipunan.