Thread by @rajeshkmoorthy

Cryptocurrency Bill 2021
இந்திய அரசாங்கம் கிரிப்டோகரன்சிகளை தடை செய்யுமா இல்லையா என்பது குறித்து தற்போது பெரியதாக சமூகவெளியில் விவாதிக்கப்பட்டு வருகின்றது. அவற்றின் பயன்பாட்டை ஒழுங்குபடுத்தும் 2021 மசோதா நாடாளுமன்றத்தின் குளிர்காலக் கூட்டத் தொடரில் தாக்கல் செய்யப்பட உள்ளது.

2019 இல், இது போன்றொரு மசோதா Cryptocurrency களை மொத்தமாக தடை செய்ய (blanket ban) பரிந்துரைத்தது. அந்த மசோதா, கிரிப்டோகரன்சியை யாரும் mining செய்யவோ, உருவாக்கவோ, வைத்திருக்கவோ, விற்கவோ, மாற்றவோ அல்லது பயன்படுத்தவோ கூடாது என்று பரிந்துரை செய்தது.

2021ல், இந்த மசோதாவிற்கு ‘Cryptocurrency and Regulation of Official Digital Currency Bill, 2021 என்று பெயரிடப்பட்டுள்ளது.
அரசாங்க வட்டாரத்தில் இருந்து கிடைக்கும் தகவலின்படி, இந்த முறை, Blanket Ban இருக்காது. ஆனால் இதற்கொரு ஒழுங்குமுறை உருவாக்கப்படும் என்று தெரிகிறது.

இது முதலில் பட்ஜெட் கூட்டத்தொடருக்கு பட்டியலிடப்பட்டது. ஆனால் விரிவான ஆலோசனைகளுக்காக வேண்டி ஒத்திவைக்கப்பட்டது. அப்போது முதல்,கிரிப்டோ உலகம் கணிசமான வளர்ச்சியைக் கண்டது. இது தொடர்பாக மைய்ய அரசு, கிரிப்டோ அசோசியேஷன்கள் மற்றும் பல்வேறு நிபுணர்களுடன் ஆலோசனை செய்தது.

கடந்த சில மாதங்களாக, அரசு, கிரிப்டோகரன்சிகளை ஒழுங்குபடுத்தவும், அவற்றை ஒரு சொத்தாக (asset) கருத வேண்டுமேயன்றி , நாணயமாக (currency of exchange) அல்ல என்று தெளிவு படுத்தியிருந்தது. இந்த முதலீடுகளின் மீதான வருமானத்திற்கு வரி விதிப்பதற்கும் அரசு பரிசீலிக்கும் என்று தெரிவித்தது.

ஒன்று மட்டும் தெள்ளத்தெளிவாக தெரிந்தது. அது, நாட்டில் கிரிப்டோக்கள் நாணயமாக அனுமதிக்கப்படாது என்பது.
கால மாற்றங்களினால், அரசிற்கு 2019 மசோதா மாற்றியமைக்கப்பட வேண்டிய கட்டாயம் ஏற்பட்டது. ஏனெனில் அந்த மசோதாவில் மிகவும் சிக்கலான கிரிப்டோகரன்சி வணிகத்தைப் பற்றிய புரிதல் இல்லை.

மேலும், இன்றைய சூழ்நிலையில் ஏறக்குறைய முதலீட்டாளர்கள் அனைவரும் கிரிப்டோகரன்சிகளில் முதலீடு செய்கிறார்கள் மற்றும் அதைச் சுற்றி நிறைய வணிகங்கள் உள்ளன. ஆகையினால் அதைத் தடை செய்ய முடியாது என்பது அரசிற்கு தெள்ளத்தெளிவாக புரிந்தது.

எப்படி ஒழுங்குப் படுத்தப்படும்?
முதலாவதாக, அரசாங்கத்தால் அதிகாரப்பூர்வமாக அங்கீகரிக்கப்பட்ட தளங்கள் / exchanges மூலம் மட்டுமே கிரிப்டோ வர்த்தகம் அனுமதிக்கப்படும். இதற்காக ஒரு புதிய ஒழுங்குமுறை ஆணையம் உருவாக்கப்படலாம் அல்லது கிரிப்டோகரன்சிகள் RBI வரம்பிற்குள் கொண்டு வரப்படலாம்.

இரண்டாவதாக, கிரிப்டோ எல்லை தாண்டிய பரிவர்த்தனைகளை (Cross Border Transactions) உள்ளடக்கியிருப்பதால், வர்த்தகங்களைக் கண்காணிக்க செபி போன்ற அமைப்பிற்கு அதிக அதிகாரங்கள் வழங்கப்படலாம்.

இதில் முதலீட்டாளர் பாதுகாப்பு மிக முக்கியமானது. மோசடி நிகழ்வுகளைத் தவிர்க்க checks-and-balances வழிவகைகள் உருவாக்கப்பட வேண்டும். மேலும் முதலீட்டாளர்களுக்கு எதிரான மோசடிகளை எவ்வாறு கையாள வேண்டுமென்று ஒரு சட்ட முன்வடிவு உருவாக்கப்பட்டு, அதுவே சட்டமாக இயற்றப்பட வேண்டும்.

வரி விதிப்பு:
வரிவிதிப்பு குறித்து தொழில்துறையினர் கவலையாக உள்ளனர். அதிக வரி விதித்தால், கடந்த இரண்டு ஆண்டுகளாக அதிகரித்து வரும் கிரிப்டோ பரிமாற்றங்களை இது குறைத்துவிடும் என்று அச்சப்படுகின்றனர்.
வரிவிதிப்புக்கு, கிரிப்டோகரன்சிகள் அவற்றின் செயல்பாட்டின்படி பிரிக்கப்பட வேண்டும்.

அவை:
1. கட்டண டோக்கன்கள் (payment tokens)
2. பாதுகாப்பு டோக்கன்கள் (security tokens)
3. பயன்பாட்டு டோக்கன்கள் (utility tokens)
கிரிப்டோ வருமானங்களை வருமான வரியின் கீழ் மூலதனச் சொத்துகளாகக் (Capital Assets) கருத முடியுமா என்பதில் தெளிவு தேவை.

GSTயைப் பொறுத்தவரை, அணுகுமுறை சற்றே சிக்கலானது. இதை என்னவாக கருதவேண்டும் (Goods / Services) என்பதையும், அது எந்த வரிப் பிரிவின் கீழ் வரலாம் என்பதையும் அரசு தெள்ளத்தெளிவாக குறிப்பிட வேண்டுமென்று Industry bodies அரசிடம் வேண்டுகோள் விடுத்துள்ளனர்.

குழப்பம் எங்கே தொடங்குகிறது?
இந்த மசோதாவின் சுற்றறிக்கையில், "இந்திய ரிசர்வ் வங்கியால் வெளியிடப்படும் அதிகாரப்பூர்வ டிஜிட்டல் நாணயத்தை உருவாக்குவதற்கான ஒரு கட்டமைப்பை" உருவாக்க இருப்பதாகக் கூறுகிறது.

மிக முக்கியமாக, இந்த மசோதா "இந்தியாவில் உள்ள அனைத்து தனியார் கிரிப்டோகரன்சிகளையும் (Private Cryptocurrencies) தடை செய்ய முயல்கிறது" என்று கூறுகிறது.
அரசால் கட்டுப்படுத்தப்படாத அல்லது உருவாக்கப்படாத எந்தவொரு கிரிப்டோகரன்சியும் தனியார் கிரிப்டோகரன்சிகள் என்றே classify ஆகிறது.

உலகில் எந்த மூலையிலும் அரசு கிரிப்டோ (Public Cryptocurrencies) என்று எதுவும் கிடையாது. Bitcoin, Ethereum மற்றும் DogeCoin போன்ற தனியார் கிரிப்டோகரன்சிகளின் அதிகாரப்பூர்வ வரையறையில் எந்தவொரு தெளிவும் இல்லை. இதுவே குழப்பத்திற்கான மூல காரணம்.

அரசு, 'தனியார் கிரிப்டோகரன்சி' என்ற சொற்றொடரைப் பயன்படுத்துவதால் தேவையற்ற குழப்பம் உருவாகியுள்ளது. 'பொதுத் துறை' மற்றும் 'தனியார் துறை' எப்படி segregate செய்யப்படுகிறதோ, அதே போன்று இதையும் segregate செய்ய முற்படுகிறது. இதுவும் குழப்பத்திற்கு ஒரு முக்கிய காரணம்.

இது, முதலீட்டாளர்களையும், இதை உருவாக்குபவர்களையும் (Developers) ஒருசேர குழப்பத்தில் ஆழ்த்துகிறது. மேலும், Blanket Ban என்ற 2019 ஆம் ஆண்டு மசோதாவை இதனுடன் சேர்த்து படித்ததினால், முதலீட்டாளர்களிடையே பரபரப்பும், பயமும் நிலவியது. அதிக அளவில் sell-off நடந்தது நினைவிருக்கலாம்.

2021 மசோதாவில் தெரிவித்தது போக, அரசிடமிருந்து இதை தெளிவுபடுத்தி ஒரு அறிக்கை வந்திருந்தால் நன்றாக இருந்திருக்குமென்று விஷயமறிந்த முதலீட்டாளர்கள் தெரிவித்திருந்தார்கள்.

அரசு ஆதாரங்களை மேற்கோள் காட்டி, காலையில் இருந்து பல செய்தி அறிக்கைகள், blanket ban இருக்காது என்று பொதுமக்களுக்கு உறுதியளித்துள்ளன. பிறகு, தடை போன்ற வார்த்தைகளை ஏன் பயன்படுத்த வேண்டும்? 2019 மசோதாவிலிருந்து விவரங்கள் நகலெடுக்கப் பட்டதோ (Copy-Paste) என்று ஐயம் எழுகிறது.

முதலீட்டாளர்கள் என்ன செய்ய வேண்டும்?
1. அமைதியாக இருக்க வேண்டும் (Don't Panic).
2. முழு அறிக்கைக்காக காத்திருக்க வேண்டும்.
3. அவசரப்பட்டு முதலீடுகளை square-off செய்ய வேண்டாம்.

அரசு வட்டாரங்களில் பகிரப்படும் தகவலின்படி, தற்போது சட்டம் மட்டுமே இயற்றப்படும், செயல்படுத்தல் தொடர்பான விவாதங்கள் அனைத்தும் அடுத்த பட்ஜெட் அமர்வில் மட்டுமே எடுத்துக்கொள்ளப்படும். அதற்கு பிறகுதான் இந்த சட்டம் அமலுக்கு வரும்.

அதுவரையில் காத்திருப்போம். 🙏🙏🙏

<End>