Thread by @Arshadyousafzay

جنرل ضیاء کو اسلام باور کرانے والوں میں ہمارے احسن اقبال کی والدہ آپا نثار فاطمہ پیش پیش تھیں۔ عاصمہ جہانگیر کو پہلی بار توہینِ اسلام کے تختے پہ کھینچنے والی آپا ہی تھیں۔ آپا نے ہی مخالفین کے تابوت میں آخری کیل ٹھونکنے کے لیے پارلیمان میں توہین رسالت کا بل پیش کیا تھا۔

غازی علم الدین کو جیل ہوئی تو قائد اعظم محمد علی جناح نے اپنی خدمات پیش کیں۔ انہوں نے غازی علم الدین کو بچنے کے سارے راستے سمجھائے مگر ترکھانوں کا لڑکا سخت ثابت ہوا۔ وہ قائد کی بتائی ہوئی کسی ایک بھی بات پر نہیں پگھلا۔ سب دیکھتے رہ گئے اور غازی علم الدین کو پھانسی ہو گئی۔

عطااللہ شاہ بخاری دیوبند مسلک کا ایک قابلِ فخر کردار ہیں مگر سچ یہ ہے کہ زندگی اشتعال دلاتے ہوئے اور دستار کھینچتے ہوئے گزری۔ مرحوم کی ہی تقریر تھی، جس سے پھوٹنے والی چنگاری نے غازی علم الدین کے خاکستر میں شعلہ بھڑکایا تھا۔ غازی علم الدین نے راج پال کی جان لے کر جیل پہنچ گیا۔

یہ خبر زمانے میں پھیلی تو علامہ اقبال خوشی سے جھوم اٹھے۔ وہ قانون دان بھی تھے اور مسلمانوں کو سیاست کے آداب بھی سکھاتے تھے۔ علم الدین کے اقدام کو مگر بالکل جائز سمجھتے تھے۔ اس بات پر دکھ کا اظہار بھی کرتے تھے کہ یہ کام میرے ہاتھوں کیوں نہ ہوا؟

علم الدین کو پھانسی ہوئی تو آخری رسومات کی ادائیگی کے لیے سلمان تاثیر کے والد ایم ڈی تاثیر نے خصوصی چارپائی دی اور کچھ مول دان کیے۔ فرماتے تھے، ہمارے دامن میں اور تو کوئی نیکی نہیں ہے، شاید یہی چارپائی روز حشر کام آ جائے

اب کچھ سوالات ہو جائیں!
سلمان تاثیر بیچ بازار میں بہت بے دردی سے قتل کر دیے گئے۔ ایم ڈی تاثیر کی چارپائی سامنے رکھ کر بتائیے کہ ان کے بیٹے کو قتل کرنے والا شخص کیسے غلط ہے؟

2018 انتخابات میں توہینِ رسالت کا سکہ سینے پر سجائے ایک شخص سر تن سے جدا کا نعرہ لگاتا ہوا جلسہ گاہ میں داخل ہوا اور احسن اقبال پر فائرنگ کر دی۔ آپا نثار فاطمہ کی سیاسی جدو جہد کی روشنی میں سمجھائیے کہ ان کے بیٹے احسن اقبال پر فائرنگ کرنے والا شخص کتنا غلط تھا؟

چنیوٹ میں چھوٹے سے ایک گاؤں کی مسجد میں تبلیغی جماعت ٹھہری ہوئی تھی۔ حافظ اکرام کو لگا کہ یہ گستاخی کے مرتکب ہو رہے ہیں۔ اس نے دو تبلیغیوں کو قتل کر دیا۔ حضرت تقی عثمانی صاحب کی رائے کی روشنی میں جائزہ لے کر بتایا جائے کہ یہ قاتل کہاں اور کیسے غلط ہے؟

کیا میں اس بیانیے اور تاریخ کی مذمت پہلے صفحے سے شروع کر سکتا ہوں؟ اگر ہاں، تو سری لنکن شہری کے قاتل میری نظر میں واقعی مجرم ہیں۔ اگر نہیں، تو سری لنکن شہری پر سنگ باری کرنے والے ہاتھوں میں ایک ہاتھ میرا بھی تھا۔ آئندہ بھی ہو گا!
dw.com/ur/%D8%B3%D8%B…