Thread by @Raamraaj3

#சிதம்பரத்தை நடராஜர் கோவில் என்று குறிப்பிட்டாலும் இங்குள்ள மூலவர் *ஆதிமூல நாதர்* என்னும் பெயரில் லிங்க வடிவில் அருள்புரிகிறார்.

கைலாய நாதரான சிவபெருமானின் நடனத்தை பூலோக மக்களும் தரிசிக்க விரும்பிய பதஞ்சலி, வியாக்ரபாத முனிவர்கள் தில்லைவனமான இத் தலத்தில் ஆதிமூல நாதரை நோக்கி தவமிருந்தனர்.

அம்முனிவர்களின் வேண்டுதலை ஏற்ற சிவபெருமான் தைப்பூச நந்நாளில் உச்சிப்பொழுதில்
*திரிசக்ர முனிவர்கள்* என்னும் தில்லைவாழ் அந்தணர்களுடன் எழுந்தருளி நடன தரிசனம் அளித்தார். இதைவிட சிறப்பாக யாரும் நடனமாட முடியாது என்பதால் ஆடலரசன் என்னும் பொருளில் *நடராஜர்* எனப் பெயர் பெற்றார்.

இந் நடனத்தை பார்வதிதேவியும் நின்று ரசித்துப் பார்த்தாள். இதனால் இவள் *சிவகாமி* என்று போற்றப் பட்டாள்.

சிவபெருமான் அருவம் உருவம் அருவுருவம் என இந்த மூன்று வடிவங்களிலும் அருள்புரியும் தலம் சிதம்பரம். மூலவர் திருமூலநாதர் *அரு உருவம்* ஆக லிங்க வடிவிலும், நடராஜர் *உருவம்*  வடிவிலும், சிதம்பர ரகசியம் என்ற வெட்ட வெளியில் *அருவம்* நிலையிலும் அருள்புரிகிறார்.

ஏனைய கோவில்களில் பூஜையின் போது மட்டுமே மணி அடிப்பது வழக்கம். ஆனால் சிதம்பரம் நடராஜர் கோவிலில்  நேரத்தை அறிவிக்கும் விதமாக ஒவ்வொரு மணி நேரத்திற்கும் ஒரு முறை மணி அடிக்கின்றனர். இதனை *நாழிகை மணி* என்று அழைக்கிறார்கள்.

*திருச்சிற்றம்பலம்*

🙏🇮🇳