Thread by @ThanjaiMadhavan

மரபுவழிக் கலங்களும், அவற்றைச் செலுத்தும் நுட்பங்களும்...!

கப்பற்கலையில் பழந்தமிழர்கள் சிறந்து விளங்கி இருக்க வேண்டுமென்பதை அவர்கள் தொன்றுதொட்டே மேற்கத்திய நாடுகளுடனும், கிழக்கத்திய நாடுகளுடனும் கொண்டிருந்த கடல் வணிகத்தின் மூலம் அறிந்து கொள்ள முடிகின்றது.

அதற்குக் காரணம் தமிழகம் மூன்று பக்கங்களிலும் கடலாற் சூழப்பெற்றுள்ளமையேயாகும்.

பழந்தமிழ் இலக்கியங்கள், வெளிநாட்டுப் பயணிகளின் குறிப்புகள், வரலாற்றுச் சான்றுகள், கல்வெட்டுகள், தொல்பொருள் சான்றுகள் ஆகியன நமக்கு இவ்வுண்மையைத் தெளிவுப்படுத்துகின்றன.

தமிழகத்தில் பயன்படுத்தப்பட்ட #கலங்கள் கடல் வணிகத்திற்கு மட்டுமல்லாமல் மீன் பிடிப்பதற்கும், நீர் வழிப் பயணத்திற்கும், நீர்நிலை விளையாட்டிற்கும், கடற்கொள்ளைக்கும், போட்டிப் பந்தயங்களுக்கும், கடற்போருக்கும் தொழில் திறம்பெற்ற வல்லுநர்களால் ஆக்கப்பட்டுச் செலுத்தப்பட்டு வந்துள்ளன.

#கிரேக்கர், #யவனர், #பாபிலோனியர் ஆகியோர் தமிழகத்தோடு கடல் வணிகத் தொடர்பு கொண்டிருந்தனர் என்பதற்கு,

இந்தியாவில் கிடைத்திருக்கும் உரோமானியக் காசுகளில், 90 விழுக்காடு தமிழ்நாட்டில், அதுவும் அதிகம் கொங்கு நாட்டில் கிடைத்திருப்பது இதற்கு ஒரு சான்றாகும்.

பழந்தமிழர்கள் மேலை நாடுகளோடு பொ.மு 7-ஆம் நூற்றாண்டிலிருந்து வணிகம் தொடர்ந்து நடைபெற்றதாகவும்,

#கிரேக்கர்கள் பொ.மு 6-ஆம் நூற்றாண்டிலேயே வணிகத் தொடர்பு வைத்திருந்தனர் எனவும்,

கீழை நாடுகளான #சீனா, #மலேசியா, #சாவகம் ஆகியவற்றோடு பன்னெடுங்காலமாகவே வணிகம் செய்து வந்துள்ளனர் எனவும்..

பொ.மு 1000 அளவில் சீனத்தோடு தமிழர் வணிகத் தொடர்பு கொண்டிருந்தனர் எனவும்,

பொ.மு 7-ஆம் நூற்றாண்டில் தமிழகத்திலிருந்து பொருள்கள் சீனாவுக்கு ஏற்றுமதி செய்யப்பட்டு அங்கு விற்கப்பட்டதாகவும்,

சீனத்துப் பட்டும், சர்க்கரையும் தமிழகத்துக்கு வந்தன எனவும் குறிப்பிடுகின்றனர்.

▪︎ கலங்களின் வகைகள்:

தமிழ் இலக்கியங்களைப் பொறுத்தமட்டில் 18 வகையான கலங்கள் கூறப்படுகின்றன.

பொதுவாக, கலங்களை உருவத்தின் அடிப்படையிலும், வளர்ச்சி நிலையிலும், கட்டுமானப் பொருள்களின் அடிப்படையிலும் மூன்று வகைகளாக பின்வருமாறு வகைப்படுத்தலாம்.

1) கட்டுமர வகைக் கலங்கள்:

இவை மீன் பிடித்தொழிலுக்கும் (அகநானூறு 280:7-11), புனல் விளையாட்டுக்கும் (குறுந்தொகை 168:5, பரிபாடல் 6:3) பண்டைக் காலங்களில் பயன்படுத்தப்பட்டு வந்துள்ளன.

#தெப்பம், #மிதவை, #புணை, #பரிசில் ஆகியன தமிழ் இலக்கியங்களில் கூறப்படும் கட்டுமர வகைக் கலங்களாகும்

2) தோணி வகைக் கலங்கள்:

கட்டுமர வகைக் கலங்களில் போதிய பாதுகாப்பும் வசதியும் இல்லாததால்,

தனது வசதிக்கேற்ப நீண்ட பெரிய மரத்தின் நடுவில், குழித்து அரை வடிவ சந்திரன் அமைப்பில் கலங்களைச் செய்திருக்கிறான்.

தமிழ் இலக்கியங்களில் கூறப்பட்டிருக்கும் #தோணி, #படகு, #சோங்கு, #ஓடம், #முடுகு, #கைப்பரிசு ஆகிய இக்கலங்கள்;

மீன் பிடிப்பதற்கும் (குறுந் 123), புனல் விளையாட்டிற்கும் (பரி 10), கடற்கொள்ளைக்கும், கடற்போருக்கும் (புறம் 126), முத்துக் குளித்தலுக்கும் (அகம் 350) பயன்படுத்தப்பட்டன.

3) வள்ளம் வகைக் கலங்கள்:

மேற்கூறப்பட்ட இருவகைக் கலங்களும் நீண்ட தூரக் கடற்பயணத்திற்கு ஏற்றதாகக் காணப்படாததால்,

அதைவிட வசதியும் பாதுகாப்பும் பெரிதுமான கலங்களைச் செய்ய, #ஏரா எனும் அடிமரத்தின் மேல் இரு பக்கங்களிலும் பலகைகளை அடித்து இடைவெளிகளில் நீர் புகாதவாறு...

பஞ்சு, தார் பூசி பெரிய கலங்களை உண்டு பண்ணினர். இதுவே, #வள்ளம் வகைக் கலங்களாகும்.

இவ்வகைக் கலங்களைச் செய்ய #வங்கு என்ற சட்டங்கள் மூலக் கருவாகப் பயன்படுத்தப்படுகின்றன. அவை ஆங்கில எழுத்தாகிய #U வடிவில் இருக்கும்.

#வள்ளம் வகைக் கலங்கள் கட்டும் பணி தமிழகத்தில் #கொற்கை, #காயல், #குலசேகரன்பட்டினம், #பூம்புகார் போன்ற பகுதிகளில் நடைபெற்றுள்ளன.

சங்க இலக்கியம் கூறும் #மரக்கலம், #நாவாய், #வங்கம், #மதலை, #கப்பல், #பஃறி, #அம்பி, #திமில் போன்ற கலங்கள் இவ்வகையைச் சாரும்.

#வள்ளம் வகைக் கலங்களின் முன் பாகமாகிய #அணியம், #யானை, #குதிரை, #சிங்கம் போன்ற முகச் சாயல்களில் அழகூட்டும் முயற்சியில் செய்யப்பட்டிருப்பதை #சிலப்பதிகாரம் (13:176.179) எடுத்தியம்புகிறது.

▪︎ காற்றின் பயன்பாட்டு அறிவு:

கடலில் கலங்கள் செல்வதற்கேற்ற காற்றின் பருவ நிலையை நன்கறிந்து கலங்களை ஓட்டியுள்ளனர் நம் தமிழர்கள்.

இதனை #புறநானூற்று வரிகள் பின்வருமாறு தெளிவுபடுத்துகின்றன.

காற்றின் உதவியால் பழந்தமிழர்கள் #திமில் எனும் ஒருவகை மீன்பிடிக்கலத்தைச் செலுத்தியதை அகநானூற்றுப் (340:18) பாடலால் அறிந்து கொள்ள முடிகிறது.

மேலும், காற்றின் துணையால் கலங்களைச் செலுத்தியதற்கான எடுத்துக்காட்டுகள் தமிழ் இலக்கியங்களில் பரவலாகக் காணப்படுகின்றன.

• கடல் நீரோட்ட அறிவு:

கலங்களைக் கடலின் நீரோட்டத் திசையிலே செலுத்திச் சென்றமையை #பரிபாடல் (10:102) மிக அழகாக எடுத்து இயம்புகின்றது.

அதில் விசையாய் ஓடும் #திமில் எனும் கலத்தில் ஏறி, விரைந்து ஒழுகும் நீரோட்டத்தோடே ஒரு சேரச் செலுத்தினர் என்றுள்ளது.

மேலும் 'செல்யாற்றுத் தீம்புனலிற் செல்மரம்போல', 'நீடு புணை வாங்க' எனும் #பரிபாடல் அடிகளாலும்,

'நீர் வழிப் படூஉம் புணைபோல்' எனும் #புறநானூற்று அடியாலும்,

பண்டைத் தமிழர்கள் கடல் நீரோட்டத்தினை நன்கு அறிந்திருந்தனர் என அறியமுடிகிறது.

• கலங்கரை விளக்கம்:

கலங்கள் திசையறியாமல் தத்தளிப்பதைத் தடுப்பதற்காக, ஒவ்வொரு துறைமுகங்களிலும் கலங்கரை விளக்கம் இருந்தது.

மொழி மாறுபட்ட வேற்று நாட்டிலிருந்து வருகின்ற மரக்கலங்கள், துறையறியாது ஓடுகின்றவற்றை இது துறையென அறிவித்து அழைத்ததற்கான விளக்குக் காணப்பட்டதாக...

#சிலப்பதிகாரம் (6:141) கூறுகிறது.

மேலும், #பட்டினப்பாலை(111-112), #பெரும்பாணாற்றுப்படை (348-351), #அகநானூறு (255:5-6) ஆகியனவும்,

பழந்தமிழர்கள் கலங்களைச் செலுத்துவதற்குக் கலங்கரை விளக்கத்தைப் பயன்படுத்தியுள்ளனர் எனக் காட்டுகின்றன.

• படகு பழுதுபார்த்தலும், பாயின் பயன்பாடும்:

#கலங்கள் செலுத்துபவர்கள் மிகவும் தைரியத்துடனும், திறமையுடனும், ஆபத்துக்களைத் தவிர்த்திருப்பதை பின்வரும் இலக்கியங்கள் வாயிலாக அறியலாம்.

#பரிபாடல் (10:53-55),

பாயும் கயிறும், இன்மரக்கட்டையும் கெட்டொழிய காற்றால் அலைப்புண்டு ஓடும் மரக்கலத்தைப் பயின் எனும் ஒருவகை அரக்கினாலே சீர்திருத்தி,

அதன் உள்ளிருப்போர் நடுக்கத்தைக் களையும் திசையறிந்து செலுத்துதல் வல்ல கப்பலோட்டியைப் பற்றிக் கூறுகிறது.

#புறநானூறு (30: 10,19),

பாய் மரத்தையும் பாயையும் இறக்காமல், அதன் மேற்பாரத்தையும் குறைக்காமல்,

ஆற்று முகத்துக்குள் கலத்தைச் செலுத்தியிருக்கும் கப்பலோட்டியின் திறமை நன்கு எடுத்துக்காட்டப்பட்டுள்ளது.

#நாவாய் போன்ற பெரிய படகுகளில் பாய்களைக் கட்டிக் கலங்களைச் செலுத்தியதற்கான சான்றுகளைச் சீவகசிந்தாமணியில்
(2793:1) காணலாம்.

இதிலிருந்து பாயின் பயன்பாட்டினைத் தமிழர்கள் நன்கறிந்திருந்தனர் எனத் தெரிந்துகொள்ள முடிகின்றது.

மேற்கூறப்பட்ட இலக்கியச் சான்றுகளின் மூலம் பழந்தமிழர்கள் கப்பல் கட்டும் திறமையில் மட்டுமல்லாமல்,

அவற்றைச் செலுத்துவதிலும் மிகவும் தேர்ச்சிப் பெற்றிருந்தார்கள் என்பது புலனாகின்றது.

கலங்களைச் செலுத்துதற்குத் தேவையான அனைத்து அறிவையும் பெற்றிருந்தது அவர்களது மரபுவழி அறிவே காரணம்.

இன்றும் நாம் அந்த அடிச்சுவடுகளைக் கிராமப்புறக் கடலோரங்களில் காண முடிகின்றது.

பண்டைய புலவர்கள் அறிவியல் அடிப்படை இல்லாதவர்களாயிருந்தும், இவ்வரிய செய்திகளைத் தங்களது இலக்கியங்கள் வழி வெளியிட்டிருப்பதன் வாயிலாக...

உண்மையிலேயே பண்டைத் தமிழர்கள் கப்பற்கலையிலும், கலங்களைச் செலுத்துவதிலும் சிறந்து விளங்கியுள்ளனர் என்பதை உணர்ந்து கொள்ளலாம்.

- நன்று.