Thread by @rasali_sdk

அரசியலில் கட்சி விட்டு கட்சி தாவி, நம்பகத்தன்மையிழப்புக்கு தான் தற்போது மதிப்பு என்பதற்கு இவரும் இலக்காகி விட்டார்.

#JyotiradityaMScindia வின் தந்தை குறித்த ஒரு பதிவு இது..

வெற்றி உறுதியாகிவிட்டது என்று நண்பர்கள் சொன்னபோது உற்சாகமாக இருந்தது வாஜ்பாய்க்கு. குவாலியரில் 1/n

அவரை எதிர்த்து வலுவான வேட்பாளர் எவரும் நிற்கவில்லை. ஆக, தொகுதி பற்றிக் கவலையில்லை, கட்சியின் மற்ற வேட்பாளர்களுக்குப் பிரசாரம் செய்ய அதிக நேரம் ஒதுக்கலாம் என்று நினைத்துக் கொண்டார்.

வாஜ்பாய்க்கு வசதியான தொகுதி புதுடெல்லிதான். கடந்த தேர்தலில்கூட அங்கிருந்துதான் வெற்றி 2/n

பெற்றிருந்தார். ஆனால் இந்திரா படுகொலைக்குப் பிறகான தேர்தலில் அனுதாப அலை ஆவேசமாக வீசிவருகிறது. யாராக இருந்தாலும் அடித்துச்செல்லப்படுவார். ஆகவே டெல்லி வேண்டாம் என்று சொல்லிவிட்டார்கள் கட்சிக்காரர்கள். வெற்றி வாய்ப்புள்ள வேறு தொகுதியைத் தேடினார்கள். குவாலியர் என்று முடிவானது. 3/n

வாஜ்பாய்க்கு இரட்டை மகிழ்ச்சி. இந்துத்துவ ஆதரவாளர்கள் அதிகமுள்ள தொகுதி அது. வாஜ்பாய் பிறந்ததும் குவாலியரில்தான். போதாது? மண்ணின் மைந்தருக்கே வெற்றி மாலை என்று சொல்லி வாஜ்பாயை உற்சாகப்படுத்தினார்கள் சக தலைவர்கள். அமைதியாக ஆமோதித்தார் வாஜ்பாய். வேட்பு மனுவைத் தாக்கல் செய்தார். 4/n

பிரசாரத்துக்குக் கிளம்பிவிட்டார்.

பிரசாரத்துக்கு நடுவே அவருக்கு ஒரு செய்தி வந்தது. மறுநொடி வாஜ்பாயின் முகத்தில் சோக ரேகைகள். கூடவே கொஞ்சம் பதற்றம். விஷயம் இதுதான். இளவரசர் மாதவராவ் சிந்தியா குவாலியரில் போட்டி!

நெற்றியைச் சுருக்கினார் வாஜ்பாய். காரணம், மாதவராவ்சிந்தியாவின் 5/n

சொந்தத் தொகுதி குணா. குவாலியருக்குப் பக்கத்துத் தொகுதி. கடந்தமுறைகூட அவர் அங்கிருந்துதான் வெற்றிபெற்றிருந்தார். இப்போதும் அங்குதான் வேட்புமனு தாக்கல் செய்திருந்தார். குணா தொகுதியில் ஒட்டப்பட்ட சுவரொட்டிகள், விளம்பரங்களில் எல்லாம் சிந்தியாவே சிரித்துக்கொண்டிருந்தார். 6/n

காங்கிரஸின் அதிகாரப்பூர்வ வேட்பாளர் பட்டியலிலும் அவர் பெயரே இருந்தது.

எனில், ஏன் இந்த திடீர் மாற்றம்?

மாற்றத்தின் சூத்திரதாரிகள் இருவர். ராஜீவ் காந்தி மற்றும் மாதவராவ் சிந்தியா. குணாவில் பிரசாரம் செய்துகொண்டிருந்த மாதவராவ்சிந்தியாவின் மூளைக்குள் திடீரென ஒரு மின்னல்வெட்டு. 7/n

சிங்கத்தை நாம் ஏன் சீண்டிப்பார்க்கக்கூடாது? நாம் ஏன் வாஜ்பாயை எதிர்த்து குவாலியரில் போட்டியிடக்கூடாது? மனத்தில் ஆயிரம் கணக்குகள் ஓடத் தொடங்கின. உடனே ராஜீவைச் சந்தித்தார். விஷயத்தைச் சுருக்கமாகச் சொன்னார். அதன் உள்ளர்த்தம் ராஜீவுக்குத் துல்லியமாகப் புரிந்தது. 8/n

எதிர்க்கட்சிகளின் வலிமைபொருந்திய தலைவர்களில் வாஜ்பாய் பிரதானமானவர். இந்திராகாங்கிரஸின் தீவிர விமரிசகர். #பாஜக ன் வெற்றிக்கு #வாஜ்பாய் ன் பிரசாரம்தான் அச்சாரம். தப்பித்தவறி பாஜக ஜெயித்துவிட்டால் அவர்தான் பிரதமர். அப்படிபட்ட ஆளுமையை நாடு முழுக்கபிரசாரம் செய்யஅனுமதிப்பது ஆபத்து. 9/n

ஒரே தொகுதியில் முடக்குவதுதான் சரியான உத்தியாக இருக்கும். அதற்கு இளவரசர் சிந்தியா போன்ற காத்திரமான வேட்பாளர் களத்தில் இருக்க வேண்டும். ஆகட்டும் என்று சொல்லிவிட்டார் ராஜீவ்.

ஆகப்பெரியவரிடம் இருந்து அனுமதி கிடைத்துவிட்டது. ஆனாலும் அமைதியாக இருந்தார் சிந்தியா. ஒருநாள் அல்ல. 10/n

மூன்று நாள்கள். கனத்த அமைதி. குவாலியர் திட்டம் பற்றி யாரிடமும் மூச்சுவிடவில்லை. செய்தி கொஞ்சம் கசிந்தாலும் வாஜ்பாய் சுதாரித்துவிடுவார். தொகுதி மாறிவிடுவார். திட்டம்தோற்றுவிடும். ஆகவே, விஷயத்தை அரவமில்லாமல் அடைகாத்தார் சிந்தியா.

வேட்புமனுத் தாக்கலுக்கான கடைசிநாள். மதியம்மணி
11/n

இரண்டரை. இன்னும் அரைமணிநேரமே மிச்சமிருந்தது. சட்டென்று குவாலியர்தொகுதி தேர்தல் அலுவலகம் நுழைந்தார் சிந்தியா. வேட்பு மனுவை கொடுத்தார். சாதித்தமகிழ்ச்சியோடு சடுதியில் வெளியேறினார். என்ன நடக்கிறது என்று சுதாரிப்பதற்குள் எல்லாம் நடந்து முடிந்திருந்தது. இனி செய்வதற்கு எதுவுமில்லை.12/n

உதட்டைப் பிதுக்கிவிட்டார் வாஜ்பாய்.

தேர்தலின் முடிவில் சுமார் இரண்டு லட்சம் வாக்குகள் வித்தியாசத்தில் மாதவராவ் சிந்தியா வெற்றிபெற்றார். வாஜ்பாய் பெற்ற மாபெரும் தோல்வி இது.

(நான் எழுதிய இந்தியத் தேர்தல் வரலாறு புத்தகத்தின் முதல் அத்தியாயத்திலிருந்து…)13/n

வாஜ்பாயை வீழ்த்திய மாதவராவ் சிந்தியாவின் மகன் ஜோதிராதித்ய சிந்தியாவைத்தான் தற்போது மோடி வசப்படுத்தியிருக்கிறார். அதுவும், மாதவராவ் சிந்தியாவின் பிறந்த நாளன்று!

அரசியல் சக்கரம் முன்னும் சுழலும், பின்னும் சுழலும்!n/n

- ஆர்.முத்துக்குமார்.